carlosXblanco

Abenayá asoleyé esti chiste costumista en forma de dialógu en Glayíu. Ta dedicáu a los rexonalistes de la “montera d´honor” y a los bablistes folklóricos que, en siendo un día pioneros, anguaño tán percontentos cola situación autonómica y llingüística d´Asturies (y quiciás cola propia personal), d´ehí vien el títulu del pequeñu sainete , asomeyáu a otru que lleí como llibru una vegada, y n´homenax a esos “asturianistes” que sienten tanta gayola. El que nun se conforma ye porque nun quier.

DIÁLOGU DE LA CALZADA

Diálogu ente Xuacu Naide y Toribio sobre dellos asocederes políticos y non políticos que se dieron n´Asturies nel tiempu d´ellos.

(D´autor desconocíu)

Recopila: Carlos X. Blanco.

Xuacu y Toribiu alcuéntrense nel barriu xixonés de La Calzada. Foron collacios nel colexu. Xuacu Naide yá ye perconocíu. Toribiu, más entá, por cuenta de ser la reencarnación del Toribiu delos diálogos clásicos n´Asturianu.

TORIBIU: Ai, miárguma. Que vengo ablucáu. Quiero cuntante milenta coses, Xuacu, y anque nun sepia facer versos, ye mester facelo n´Asturianu.

XUACU: ¿Y eso? ¿Fales bable y nun yes poeta? Hai milagros nesti mundu, pero esi qu´amueses ye perestremáu, y yo, desde llueu, nunca lo vi. Tú, Toribiu, teníes que ser el Toribiu de siempre, esi que sal nos versos célebres. Que hai mester d´educar al pueblu neso de que l´ Asturianu solo val pa facer versos célebres, nun “célebres” como se diz en cazurro, porque versos talos solo los conocen les güeles en casa a la hora de xintar, sinón célebres en bable, que quier dicir, que fain rir.

TORIBIU: Ay, válame la marrabera. Qu´en tiempos de Marirreguera...Ay non, que güei debemos falar en prosa, que yá son otros los tiempos... Bono, lo que te dicía. Vengo ablucáu. Toi de camareru nel Llevante, y nun llego a eso que nomen perhí un “mileurista”. Nin toi bien preparáu, nin me presta un res ser “entamador”

XUACU: “Emprendedor” quies dicir.

TORIBIU: Prendíu con pinces toi al mundu, fíu, colo que gano, que toi d´alquiler nun cuartucu enllenu de cocaraches. Y n´Asturies solo hebía visto cocaraches nos anuncios de Cucal... Sedrá´l calor (la caló, que-y dicen pel Sur, o el calorcito, que-y dicen pel Medio). El casu ye que, como emigrante que soi, tengo de tar agradecíu a la política del Prencipáu. Que-y dieren perdayuri la “Montera d´Honor” por tratanos tan perbien, y trabayar ellos asgaya eso de l’ “asturianía” (güeyélo equí: http://www.asturnews.com/index.php?idn=3380) ) Y yo nun tengo nada escontra d´estos señorones, pero pemeque yá se tomen el mundu per montera, y ente ellos ponénse medalles y van a fartures, pero los paisanos míos nun fain más que colar, y el Prencipáu del Cristu que lo Fundó ta más bien tomándonos por mazcayos. Cuando yo salía n´otros diálogos célebres, en sieglos pasaos, yo tenía ganes de rir entá. Yera coñón, ya eso diba con mi calter, tan asturianu. Agora danme ganes de cuspiar na cara de los mandones, que con tantu rabalbu, tochez y provincianismu ponen ya dan eses monteres a mamplén. A min, como si quieren da-y el premiu Préncipe d´Asturies a Melendi, pero los inframileuristes de güei yá tamos enrabiaos y nun somos a aguantar tantu indinu. ¿Premiar esa política de desertización humana del país? Hebíemosla premiar a pedraes. Pero yo nun soi un apolexeta de la violencia, non. Esto que te digo ye desafogar namái, ye puramente “teórico” (nun me vaigan a llevar presu). Los antepasaos mios, otros Toribios que colaron pa Madril pa trabayar d´aguadores, yeren oxetu de pedraes, rises y espreciu. Yéramos los “coritos” alló en Cazurrandia. Dende Cuadonga, mira que llovió, nun tiramos un xigu nin un regodón. Baltiar Asturies, y empobinar les piedres y los chuzos escontra nós, too lo que quieras. Y sinón, mira pa min, Xuacu, que yo nun fixe carrera como tú, anque gano cásique lo mesmo. Nun soi´l “corito” d´anguaño. Non, pa los grandes “rexonalistes” de güei, como Gracia Noriega y otros apóstoles de la Fabada y la Ñublina. Los fíos de Pelayu fiximos que los moros mercaren alfombres namái, y non algamaren otra vuelta imperios comos daquella. Yo, que quiés, voi meteme a lo de les alfombres, como diz Gracia Noriega de los moros, que lo de poner copes nun da pa pipes.

XUACU: Nun comprendes a los rexonalistes y autonomistes d´anguañu, fiu del alma. La so idega d´Asturies ye nidia, cristalina, facer un Paraísu Ñatural de Cinco Estrelles au los camareros nativos nun tengan mester dir a Benidorm, sinón quedase equí mesmo. Y que toos pongamos la montera, nun como símbolu de tradición nacional, sinón como gayola de turistes. Como nos top-less escoceses, au les moces ponen faltines percurties a cuadros (y para de cuntar) pa que la clientela foriata sepia onde, en qué nación, ta refrescando.

TORIBIU: Falando de piedres y de cristal... ¡qué mal se lleven! Cuando vine de vacaciones a Xixón, vi dende´l Muro media Providencia tapecía por un caxón de cristal, y que yera un hotel como aquellos au trabayo yo, nel Mediterrániu. Y dicen que van facer otru, un “Pirulón” pa contra Poniente, de quésiyo cuántos pisos... Piedres y cristales, ¡qué mal se lleven! Pero apórtenme malos talantamientos... Mira que si la Santina, en gloria tea, nos aidara como daquella tirando unes piedruques... Pero cuando aplastó a tantu moru en Cuadonga, nun yera xenófoba pa la xente daquella. Agora, metíenla presa solo de pensalo, yá que non por facelo. Tan los tiempos malos fasta pa la Santina.

XUACU: Abandona, collaciu, el camín de la violencia, porque peques contra l´Orde Constitucional, de pallabra, obra y omisión. Como dicen los nuestros filósofos, que d´esto saben muncho de los sos años de “llucha escontra Franco”, como Xuan Cueto, los asturianos somos intelixentes abondo pa siguir esi camín. Pa cristianos, nós, que sabemos poner la otra mexella. Por eso les corrides de toros y les procesiones de Semana Santa cásique son testimoniales equí, foriataes, ente nós. Nada hai de “morisma” ente nós.

TORIBIU: ¡Meca! ¿Qué tien que ver? ¿Eses coses aportaron colos moros?.

XUACU: ¡Qué pocu sabes, amigu Toribiu! Aportaron colos de l´alfombra, que diz Gracia Noriega, el que tien muncha gracia. Yá lo diz Areces: la personalidá del pueblu asturianu ta mui estremada. Por eso, somos estremaos afartu, y nun hai mester sopelexar señes d´identidá, y menos de les polítiques. Ye una personalidá que consiste en querer esaniciase, como la ñublina, esborriase na nada. Nun ser un res. Somos esistencialistes coleutivos.

TORIBIU: Plasmo. Nun caltrio nada.

XUACU: En fin, Toribiu. Tantu gustu d´alcontrame contigo. Agora toca dir al pulgueru, qu´a les siete sal el mio autocar pa Madril.

TORIBIU: Yo tamién debo dir pa España. Esto d´andar peles colonies da-y a ún por pescudar coses mui estrañes. Enantes d´espidime, voi cuntate lo que me pasó estes vacancies. Caniaba pela playa de San Llorienzu cuando sintí  qu´un grupu de turistes ríense a les mies espaldes. Coime. Dixe yo pa min. ¿Sedré raru? Les mis pintes ¿son mui aquello?... ye nidio que nun son como les d´ellos.  Emprimé a sintime estrañu na mio propia casa. Yera, otra vuelta, el “corito”, pero dientru d´Asturies. Sintime como los aldeaninos del anunciu de la fabada, esos que l´afechisquen nel intre pa que la xinten los de la ciudá a la qu´aportaren. Un vieyu-mozu ruralizáu, un homucu con boina invisible, daqué rancio y ensin reconversión posible. Y nun llego a los 30 años... ¿Cuántos habrá como yo? Ya nos charon. Agora toca la chifla, y en casa.

XUACU: Anda con güeyu, Toribiu, qu´a lo primero queríes tirar piedres pa contra los hoteles, y agora fales como xenófobu. Y nun sabes lo que-y fixeron al mio primu Lin, que los “progresistes” cásique lu llevaren pal Cuartón. Y alón.

MENCIÓN ESPECIAL (ASTURIANO) nel Concursu de Microrrelatos Mineros "Manuel Nevado Madrid" de la Fundación Juan Muñiz Zapico (CCOO), IV EdiciónCarlos Javier Blanco Martín: "Maestru"

http://www.fundacionjuanmunizzapico.org/ConcursoManuelNevadoMadrid/2007_2.htm#txt1

"Maestru", yera como lu llamaben. Taben toos tan agradecíos, que-y llevasen regalos cásique toes les selmanes Comida fecha pela ma, una botella vinu, un cartón de güevos, galipos de fabes. Asina, l´home diba tirando. Cháronlu de la escuela cuantayá. Nunca nun tuvo carné, pero acabantes d´entrar les tropes gallegues, unos civiles aportaron a la escuela de rapazos. Ellí siguía´l "Maestru", el de verdá, como si tal cosa. Denunciáralu un vecín. Que si yera roxu. Que si se ponía de parte los mineros. Foi espantible. Dexáronlu baldáu d´una cuelma delantre toos los rapazos. Dellos tiráronse a les perneres de los guardies. Ehí quedó l´home, chando´l sangre pela boca. Dellos críos corrieron a casa ente llárimes y glayíos. Nel intre les mas de toa la reciella arrodiaron a los civiles, apellidándo-yos de too. Cuenten qu´ellos tuvieron que tirar tiros al aire pa escorreles.

"Maestru" foi curáu en casa d´una vieya a la que nun-y daba yá más nada. Nin represalies nin gaites. Vilda de cuando la Revolución, con dos fíos cayíos nel frente, pa la parte Noreña, la muyer sacólu alantre. Na cama, meyoró tomando caldinos bien probes pero daos con ciñu. "Maestru" nun quixo falar en meses. Tamién elli foi mineru. Sabía lo que yera la vida d´un esclavu. Entró de guah.e, como´l pa, como´l güelu. Cásique nun tenía ropa. Quitase la porcancia y mordigañar pan yera too lo que podía naguar n´acabando´l turnu. La camioneta circulante trayía llibros. Les lletres, cada vuelta meyor lleíes, abriéron-y un mundu. Yá de mozu féxose maestru. D´aquellos qu´había, ensin títulu dalu. Un día, al esbarrumbase la galería, quedó baldáu enforma. La cosa yera que yá nun podía vivir d´otra cosa que d´enseñar a los neños.

En alicando, "Maestru" punxo escuela na cuadra valera d´un vecín. Tolos diís vinía´l gallegu aquel de bigotes, un falanxista, col envís d´amedranar. Pero los neños trataben al so braeru "Maestru" col rispetu col qu´ha tratase un dios o un sabiu. Sabiu yera, anque too lo deprendía a la manera de so, lleendo lo que podía y au podía. Presentábase en cuartel toes les selmanes. Les menacies y los insultos yá yeren el pan de cada día. Los rapacinos colaben-y de la escuela en cuantes yeren granducos. "Maestru" dicía que la tierra los encloyaba. Nunca quixo qu´unes vides como aquelles, tan nueves, tan llozanes, fueran escosase embaxo tierra. Pero la mina, la fame, y el vivir propiu d´un proletariáu vencíu y militarizáu, nun dexaba marxe a la infancia aquella. Trabayar, morrer. Trabayar, morrer.

El falanxista abrió la Escuela Nacional. El primer día de clas taba cásique sin neños. Al pasar delantre les cases sintió como un pueblu enteru lu esprecetaba. Yera un ruxerruxe sordu, fondu, testoneru. Nes miraes de les mas, nos güeyos de los neños, había odiu. N´aquel pueblu namái había un "Maestru". Un fíu de la Tierra, baldáu por ella y pol enemigu, un paisanu de verdá, como toos ellos.