Nuevu formatu pal mio blog. Los collacios y visitantes que queráis una clave p´ameter comentarios, habéis contautar conmigo. Un abrazu.

http://carlosxblanco.blogspot.es/

Con una forquiella de 6.000-7.000 votos ta claro que tienen la obligación moral de constituyise nesi centru de gravedá, o polu d´atraición d´asturianistes y nacionalistes tantu a la izquierda como a la derecha del so pequenu espaciu. El testimonialismu a dambos llaos tenía que quedar rebasáu por un “nacionalismu centráu” que n´Asturies ta allugáu al centru-izquierda mayoritariamente. Inda con eses, nun salen les cifres, claro, pero les cifres medraríen si se-y vieren les oreyes al llobu del Casqusimu, si hai desengañu pa col FAC como húbolo pa con IU, etc. Les cifres medraríen tamién si s´afitara la llínia ideolóxica del Bloque-UNA nun sen identitariu, nacionalista ensin complexos o, polo que paez, van caltenese nel mesmu error de siempres. Y equí ye onde quiero llegar.

¿Hai nacionalistes n´Asturies? Yo voi viendo que pocos, y que nun mos tenemos qu´engañar. O  “Compromisu por Asturies” da´l pasu de ser una formación con clara vocación nacionalista o sinón, pal 2015 va quedar al mesmu nivel de votos que´l Conceyu Abiertu, ye dicir, puru testimonialismu y autismu grave: 1.500 votos y una autocrítica consistente en dicir “nun tuvo nada mal”. ¿Que nun tuvo nada mal? Señores del Bloque-UNA, señores estrategues y cerebros grises: mirái qué vos falla na vuestra imaxe, nes vuestres consignes, na vuestra comunicancia colos que sienten y piensen Asturies, mirái.

Pocu más de 6.000 votos y malapenes naide sal a dicir un res. Cuido que solo lleí unes palabres pa salir al pasu. Nun pasaron diez díes, y yá ta Rafael Palacios, internacionalista él, corriendo pa Gaza. Tenemos un apartheid d´aupa n´Asturies y el que debía ser cabeza de la nuestra segregación mátase por causes que pa nós nun son inmediates. Pero señores, pero collacios: con tol ciñu del mundu: la vuestra Axencia de Cooperación fue, en tiempos, unu de los inventos más impopulares nel mundu asturnacionalista, y eso nunca lo quixistis ver. Tantu viaxe y tantu calcu estéticu, emocional y ideolóxicu de la sempiterna Izquierda Unida d´Asturies nun vos va bien, nin nun mos va a los demás. Pa una versión piquiñina d´Izquierda Unida, la xente yá gocia cola versión más grande. ¿Por qué vos da tantu apuru sacar la tema identitaria a la lluz? ¿A qué tenéis mieu? ¿Sois toos nacionalistes, como dixo l´otru, que tienen mieu a ser y a proclamase nacionalistes? Espero que non.

Creo que lo que más mos esmolez, dientru d´esi nacionalismu acomplexáu y adexetivu, ye lo voi a dicir darréu: que los vuestros “hermanos” de fe, hermanos izquierdistes, vos puedan dicir: “Eso de la Nación ye de fachas”, “eso de l´Asturies milenaria ye de nazis”, “eso de mirar tantu al pasáu y a la señardá de la llingua y los vieyos vezos ye esencialismu románticu”.

¿A que ye verdá? Tenéis medrana a lo que vos pueda dicir la Izquierda Española y el Asturcomunismu. Queréis tenelos al llau no que cinca a les cuestiones, digamos, actuales y sociollaborales. Grave error. Grave, señor Palacios, grave, señores Zapico y demás. Una izquierda unida en pequeño con sabor asturianu ye un pinchu pincháu con un palillu. Meyor el menú de tres platos, con pan, postre y vinu.

Grave error tamién, yo diría qu´una irresponsabilidá histórica, permitir qu´esa autovergüenza por ser nacionalista dexe´l tarrén llibre a los Stalinistes, ye dicir, a los Totalitarios. A esos que nos dicen de contino que somos

-interclasistes-

-nazis-

-xenófobos

-xovinistes

-etc, etc.

Esa supuesta izquierda “soberanista” o “independentista ¿cuántos nacionalistes lleva dientro? Ah, ah, ah…. ¿Y cuántu estalinista? Ah, ah, ah….Esi ye´l raigón de lo que mos pasa.

Por un Partíu Nacionalista Asturianu!

Depués de seyes años, si mal nun recuerdo, al serviciu vuestru y del nacionalismu asturianu, decidí pesllar los comentarios al mio blog.

A esta casa aportaron bonos amigos, curiosos, comentaristes casuales y críticos acérrimes: toos ellos bienllegaos. Pero tamién babayos y cibertrolls.

Los últimos tiempos foron mui cafiantes en cuantes a la invasión d´esta la mio casa: invasión por xente non bienllegada y tarrecible. Teo más coses importantes que facer qu´andar borrando mensaxes insultantes ya inda amenazantes... Siéntolo polos amigos y visitantes qu´avezabais venir per equí, pero´l mio esfuerzu por puxar un nacionalismu seriu y (auto)críticu nun se ve compensáu. Nun hai nacionalismu de verdá n´Asturies, y a esa conclusión toi llegando dafechu. Con tristura.

Previo al pieslle definitivu d´esti blog (cosa que toi pensando seriamente yá va un tiempu) voi pesllar los comentarios.

Esti ye´l problema cimeru del nacionalismu asturianu: los cobardes, los anónimos, los llinguateros, los talibanes, los destructivos, los bocayones de chigre, los sectarios. Y que munchos que dicen ser “patriotes” nun lo son. Son alpenes una marxinalidá radicaloide y lumpem, pocu más. A toos ellos, pa siempres, alón. A los amigos y visitantes corteses, a los patriotes de verdá, quiero dicíi-yos que lo siento, que, de mano, voi siguir escribiendo dalguna cosuca, pero pocu más. Yá veremos. Nunca digamos nunca enxamás.

Lleendo les páxines de Barbero y Vigil (La Formación del Feudalismo en la Península Ibérica) podemos acolumbrar los rasgos distintivos de los pueblos astur-cántabros y, en xeneral, de los demás pueblos nórdicos de la Península a lo llargo de la exa cántabro-pirenaica. Estos rasgos apunten haza lo que se pue considerar una sociedá xentilicia, onde la fema taba equiparada xurídicamente al varón, perbelicosos y altamente comunitarios tocántenes a la esplotación económica de la tierra. Esta organización que los historiadores tienden a denomar “indíxena” o “arcaica”, foi esgonciándose al rodiu del añu 1.000, pero ye bien cierto que se caltuvo a lo llargo de les dómines postreres, inda hasta los díes d´anguaño. L´añu 1.000 o 1.100 marca l´aniciu de la feudalización y, poro, la homologación de los reinos cristianos peninsulares colos d´allende´l Pirinéu.

El reinu astur nun fue feudal. Seique hai dalgo d´esaxeración na imax que Sánchez-Albornoz tresmitiera d´una islla de propietarios llibres, de campesinos guerreros metanes una Cristiandá feudal. Les “ventoses” (sic) de les que falaba don Claudio, ye dicir, la nobleza y los cenobios, escomencipiaron a furrular ceo, emprestando bienes a los aldeganos apuraos por un xuiciu, una delda, un engañu. L´envís “institucionalista” (más dau a centrase nes superestructures xurídiques y nes fontes notariales qu´había daquella) nun ye a tapecer del too l´arispia Llucha de Clases que por entós entamaba adulces. Pero yera verdá que cola espada nuna mano y los aperios na otra, los repobladores baxaron de los Montes qu´una vez los abellugaron y, en garapiellos de triba comunitaria y xentilicia (tovía güei hai pueblos que se nomen “asturianos”, “vascones”, “gallegos”, etc. al sur del Cordal), organizaron l'espaciu ermu per aciu de la figura de la “presura”.

Tamién ye esaxerada, escurque, la imaxe albornoziana del Ermu de la meseta, ente´l Dueru y la Cordalera. Yá Menéndez Pidal dicía qu´esi ermu nun yera tantu ermu, y Barbero y Vigil corroboren tala posición. Los moros nun llegaron a gobernar dafechu ciudaes mesetaries norteñes como Lleón, y la “repoblación” de los Reis Astures a esti altor ha entendese más bien como “apropiación” y “reorganización” d´unos territorios que pocu antes nun yeren nin de los astures nin de moros. Yeren, en realidá, espacios desorganizaos pero poblaos por “hispanos” dexaos de la mano de Dios al afuxir d´ellos les élites visigodes que los remanaben previamente. La Reconquista fue, dafechu, una Conquista nel sen políticu y militar. Y nun too fue espulsión de moros y llabor de faelos recular hasta´l Sur. La capacidá militar y demográfica del Reinu Astur nes primeres dómines nun daba pa eso. Más bien fue cosa d´una espansión, d´una integración de xentes que quedaron “en tierra de naide”, xentes hispanorromanes y godes que, pola mor de simplificación, podemos denomar mozárabes masque nos primeros años del nuestru Reinu, l´influxu árabe fue bien superficial, cuando non reducible a cero: ha tenese en cuenta que les sublevaciones de les guarniciones bereberes que debíen custodiar la meseta Norte y la Galecia del Sur facilitaron el llabor espansivu de los Reis Astures y la fácil integración d´esos hispanos al continxente de norteños que diben a convertise nos nuevos amos y, poro, “reorganizadores” del espaciu al norte del Dueru.

Don José Orlandis, gran conocedor del mundu visigodu, sostién que´l nivel cultural del Reinu Toledanu yera, seique, el mayor d´Occidente, solamente comparatible col Imperiu Bizantinu, allalantrones, al Oriente. El rellumo y lluxu de los bizantinos yera asonsoñáu conscientemente polos reis y nobles godos que yá teníen bien d´”orientales” na so estética, nes formes y maneres. Teníen un nivel cultural muncho superior al de los invasores islámicos, invasores éstos panada homoxéneos no étnico, y muncho engarraos ente sí. Pero los decadentes godos, col so exércitu formáu por servos (ellos sí esperimentaren una “protofeudalización”) nun fueron a faer frente a la fola mora. ¿Ye tovía creíble qu´esos godos qu´afuxeron como llocos haza tierra de francos o que pautaron rindiciones al moru con tal de siguir viviendo bien, ye creíble  que diban a resucitar tres el Monte Auseva, na Cueva “onde se salvó España”? Non, por Dios. El tapecimientu d´Asturies entama yá nes propies Cróniques. Comparando l´Albeldense coles del ciclu d´Alfonso III bien se ve´l tapecimientu de los astur-cántabros en pro d´una “España” progoticista que se quixo inventar dende tiempos llonxanos. Dende´l sieglu IX o asina. Pero la manipoliación de la Historia d´Asturies ye imprescindible pa crear el mitu fundacional d´España, y nun me voi cansar de repetir esto.

Ye datu bultable que nos testos más antiguos, más “indíxenes”, o lo que vien a ser lo mesmo, menos pro-goticistes (como los atropaos na Crónica d´Albelda) falárase dafechu de la guerra de los astures “contra Spania”, y esa Spania significaba “la España mora”. Yá nes Cróniques del ciclu d´Alfonso III el Reinu d´Asturies ta concebíu como´l socesor del Reinu Godu: una “España” a recuperar. Sicasí, tuvieron los godos más bien del llau de la morisma, qu´enfrentaos a ella: ha recordase´l valir simbólicu del parzamicu d´Oppas (¿hermanu de Witiza?) con Pelayo. Seique los godos taben colos bereberes en bona midida cuando lo de Cuadonga. Asturies nun yera España. La monarquía toledana nunca nun pudo remanar dafechu a los pueblos nórdicos, y agora con xente africano mayormente, los sos socesores trataben de facelo otra vuelta. Nun pudieron. Cuadonga, Cangas, Uviéu…nun foron los socesores de Toledo. La socesión de Toledo, no cultural, no político, no militar, fue a parar a Córdoba. Los astur-cántabros de Cuadonga nun yeran “España”. Asturies nun debió ser nunca España.

Nun hai bocayones más grandes n´Asturies que los que falen –cola melota esperluciada- del “esencialismu”. Esto ha ser consecuencia d´esa gran fábrica de burros que foi la LOGSE. Una educación deficiente xunto la subcultura del porru y la llitrona ye parte del problema de delles deficiencies del nacionalismu asturianu.

Pero precisamente los que reivindicamos el papel fonderu de la Historia a la hora de conformar la nuesa identidá, tenemos un ciertu procuru a la hora de manexar tan importante categoría filosófica como ye la d´Esencia. El que-y concede un status ontolóxicu cimeru a la Historia d´una Nación pa qu´ésta sía considerada tala, sostién que les esencies –en casu d´esistir- seríen estructures relativamente estables per aciu de les qu´una sociedá va definiéndose a sigo mesma énte´l territoriu qu´ocupa y énte grupos o sociedaes rivales .

Somorguiándose na obra inxente de don Claudio Sánchez- Albornoz ún pue  anguaño estremar ensin dificultá, el so prexuiciu “tradicionalista” o “españolista” qu´arrinca de Menéndez Pelayo (El Reinu d´Asturies foi l´aniciu o trubiecu d´España, el Cuadonguismu, ya eso) de lo qu´esquita real y verdaderamente de los estudios, tan apiegaos a les fontes, y, poro, difíciles d´ameyorar: qu´hebo una sociedá astur dotada de “poder” ya independencia enantes y depués de la invasión mora, y dafechu al marxe de los visigodos. Y tamién: que l´alzamientu pelaxianu nun foi, al entamu, panada una empresa goda, empresa retóricamente goda que solamente a partir d´Alfonso II, per aciu de les influencies ya emigraciones mozárabes (ye dicir hispániques o “godes”) faise una reinterpretación goticista d´un episodiu dafechu asturcántabru n´autoría y causalidá.

Hai munches otres xoyes a espigar nos volumes de don Claudio. Preséntase ellí la sociedá altomedieval astur panada bárbara como dacuando se nos quier dar a entender. Sacantes los más conocíos de los espíritus cultivaos, el Beatu de Lliébana, el propiu Rei (sobre manera Alfonso III) y otros personaxes de la Corte, que teníen una cultura homologable a la d´otros reinos cristianos de la dómina, el propiu pueblu llanu sabía bien de veces lleer y/o escribir (nun porcentaxe abegoso de saber, pero non mínimu). Igual qu´agora, vemos a pequeños propietarios roblar n´escritures, conociendo la so importancia xurídica, entendiendo dafechu l´actu de donación, compra-venta o otros que pa entós se facíen,  y sabíen de les consecuencies del mesmu. Personaxes mozárabes que viaxaben a cenobios norteños estelaben davezu al atopase cola bayura de les Biblioteques ellí allugaes, llugares pa ellos terremotos, calteniendo clásicos que nes tan ponderaes ciudaes de Córdoba o Toledo –en manes mores- nun se conocíen…

El papel de los astures, del so ethnos, de la so xeografía, ye crucial na hestoria de los pueblos peninsulares y don Claudio sorráyalu como naide. Repite: como naide. Sicasí, nós refugamos la ficción d´una “España” yá presente y real (masque fuera solo potencialmente) na dómina medieval. Eso nun hai quien lo trague. El cuadonguismu de don Claudio, trespasáu al planu políticu, el d´una Asturies como madre formalmente criadora de la España política, ye inalmisible. Pero de los testos qu´él esbilla y apurre sí hai una maternidá  d´otra triba: culturalmente, civilizatoriamente, España -o la Península Ibérica- sedría un cachu d´Oriente o d´África, de nun ser poles instituciones xurídico-económiques apurríes polos astures y los sos confederaos norteños a la España repoblada y arramplada a los moros. El cómo se repobló hasta´l Dueru, cola espada y la fesoria al empar, col caballu y el yelmu guerreru al llau la pareya gües … sedría dignu d´una épica muncho más rica que la del western americanu. Cuánto llevaron los nuestros mayores a unos territorios desorganizaos dafechu pola invasión estranxera, ye cosa incalculable. Si tuviéramos l´espíritu comercial d’Hollywood ¡cuántes xestes nun díbamos a recrear! Llabrar la tierra cola espada siempre cerca, y acolumbrando na llinia del horizonte les algaraes mores. Lluchar pa ser llibre y nun dir a parar a un harén o a un mercáu d´esclavos. Solamente arrincando d´una sociedá entá xentilicia, guerrera de pies a la tiesta, que nun tenía otra alternativa que lluchar o morrer, fue como surdió una Asturies nel sen políticu y una España culturalmente europea, occidental.

Pero esto, na xeneración del porru, la llitrona, y del “internacionalismu proletariu” nun se conoz. Ye tema marcianu pa dellos. Unos festexen al osu que mató a Favila, otros camuden la Cruz de la Victoria por ferramientes revolucionaries y símbolos estranxeros y los más faen burlla de la “Santina” y Pelayo. Asina ye como un pueblu muerre: cuspiendo contra los sos símbolos, depósitos inconscientes de lo sagrao. Asina nos va.

El nacionalismu astur, l´asturianismu políticu, vive al llombu de la Historia. Ye un movimientu cégaru. Quier un Futuru p´Asturies y quier rescatar una Asturies Tradicional que, paradóxicamente, desconoz en bona midida. Más p´atrás de Belarmino Tomás y la so prosapia, nun quier saber res. Paez, tamién, como si Asturies naciera con Antón de Marirreguera o col mesmu Xovellanos. El posu filolóxicu-lliterariu, d´una banda, y el revolucionariu leninista, d´otru, sume´l filu de la Historia pal asturianista estándar. Nun se quier reconocer que na llucha d´un Pueblu ta´l filu encarnáu de la so Historia metanes. Una Historia que se fai auto-consciente nes lluches contra romanos, godos y moros, al entamu, y na supervivencia énte Castiella y España depués.

Too esto vien al rodiu del famosu Diccionariu de la Real Academia Española de la Historia, institución tarrecible a la que yá-y dedicara entrada nel blog en 2009.

Ye don Luis Suárez un asturianu (pámeque de Xixón), medievalista y, poro, gran espertu pa falar de Franco a lo que paez. Diz de Franco nun sé qué coses terribles: que nun fuera realmente un dictador sinón gobernante “autoritariu”, etc. Diga lo que diga esti señor, yo nun necesitaba lleer nada suyo cincante al Caudiellu. Abastóme sentilu nuna conferencia, que vagamente recuerdo, fecha nel “Ateneo Jovellanos”, va 20 ó 25 años, pamidea. Y más recién, fue abondo lleer un llibru suyo sobre´l “Principado de Asturias”. Nin más nin menos, esti personaxe sostenía qu´Asturies caltuvo la so integridá territorial y la so personalidá como Rexón (ye dicir, nun esistiría Asturies daveres) de nun ser pol papel xugáu pola Corona Castellana. ¿Lleístis esi llibrín? Voi ver si atopo la referencia estos díes. Esto ye lo que m´esmolez: qu´a Asturies-y roben la so Historia. Los progres d´anguaño tán rasguiando les vistidures sobre les voces del Diccionariu dedicaes a Franco, la República, ya eso. Burraes filofranquistes habráles a esgaya. Pero los demócrates indignaos debemos preguntanos qué no habrá de burrada nos artículos dedicaos a dómines más vieyes.

L´asturianismu políticu ta a veles venir al respetive la Historia del País que diz defender. Nun tienen finxos a los qu´agarrase pa faer esa defensa de los nuesos raigones. Los “lliteratos” anden al rebuscu de güelgues bablistes en vieyos pergaminos y cartafueyos (llabor de gran méritu, pero non abonda pa la Reconstrucción Nacional). Los “revolucionarios” nun lleguen más p´atrás de Belarmino Tomás. Pero yo quiero dicivos: ¿cuántos nacionalistes foron a retrucar a esi Luis Suárez muncho enantes de qu´escribiera agora sobre´l franquismu? ¿Hai ente nós un rescate militante de la Historia Nacional? Non, non, non. Oxalá tuviéramos cincuenta o cien “Neville” faciendo llimpia ente tanta morralla colonialista y españolizante. Pero non, hai que metese con él, porque ye “esencialista” (Addenda: ye mui cómico ver cómo hai xente que ta diciendo per internet que Neville o Vilareyo y dellos más son “heterónimos” de mio: yo pártome).

Pero dígovos una cosa más: pescundando nes obres de Sánchez- Albornoz o Barbero-Vigil, p.e. yo atopo munchos más raigaños del País que debíamos ser que nos poemes de Tiadoro Cuesta o les obres satíriques de Dolfu Camilo: nes escritures llatines y los diplomes, y nes Cróniques Pervieyes, aprucen los horros, la sidra, los “indíxenes”, la tradición “llocal” pregoticista, la socesión matrillinial al tronu, los “reis” pre-pelaxianos a lo llargo del periodu visigóticu, el coleutivismu agrariu del Vieyu Reinu, l´Asturies medieval qu´aportaba hasta les Encartaciones, … Aprucen tantes coses que nun sabemos aprofitar, ¡Oh lliteratos! ¡Oh revolucionarios! Dambes estremidaes del nacionalismu astur –la “bablista”, la “roxa”- tán mutilaes del cuerpu mesmu de la Historia. Por eso nun espoxigamos: nun ye solo por que nun hai Xuntanza. Tamos na miseria y ¿sabéis por qué? Ye porque merecer, merecémoslo. Cagámosles a pulsu.

A los que fain esto:

Por favor, dexái d´enriedar con eses coses. Nun espublicéis nada col mio nome, anque sía pa ponese del mio llau. Cuidadín con eses coses. Lo meyor pa saber qué publico de verdá ye contrastar los artículos que salen en Glayíu roblaos por min colos que salen en webs onde nun hai llibre espublización o col mio blogue personal. Nun hai qu´usar Glayíu como un foru. Pa eso yá ta´l mio blogue, pa comentar sobre min lo que vos pete. Esta mesma guerra sucia yá me la ficieron va cinco años y corrió a cargu d´El Catoblepas. Vuelve a repetise la táutica. Ye como pa sospechar ¿non?

http://www.kaosenlared.net/noticia/asturies-centro-gravedad-nacionalista

Esti ye pa min el camín a mediu y llargu plazu. Pero esi Congreso ye más necesariu que´l comer. Entendese, falar, poner cartes enriba la mesa. Ye cierto lo que (me) dicen de que nun hai qu´echar les culpes al que tenemos al llau. Cierto, toles culpes non. Hai que faer un análisis posáu de por qué esto del nacionalismu nun espoxiga nun País con tantes condiciones obxetives como pa qu´espoxigara dalgo.

Hai unos carreros abiertos yá, y eso dame esperances. Hai que dir a les instituciones. Hai que faer Política en serio, nun entregar el asturianismu al caxón de xastre de “lo alternativo”, lléase marxinal. Hai que formar un piñu coherente, estrictamente políticu y non namás “cívicu” y voluntarista.

Hai torgues mui grandes p´algamalo: tracamundiar el nacionalismu d´izquierda col asturcomunismu, ye decir, comunismo escritu en bable y coles vergüences al aire. Por exemplu, el mieu a la palabra “nacionalismu”, o la llerza a la “identidá”.

Hai más torgues perconocíes: esa del que diz, o salgo YO na semeya o la cosa nun va conmigo. Personalismu. Cabeces de mur, que nun saben trabajar en silenciu como rau de lleón. Fai falta compromisu. Nun mos engañemos: el compromisu cola llingua y cola identidá ye escasu.

Falta tamién chapeta: esos mapes inventaos xunto cola foz y el martiellu, eses salides de tonu, esos cibertrolls que talmente paez que nun fain otro a lo llargo del día qu´emporcar, eses propuestes alucinaes, esi alegrase del fracasu del vecín…

Pero con too y con eso yo animaría a la cellebración del Congresu. Ensin resentimientu, ensin axustar más les cuentes, pero coles palabres clares y dando la cara. Ta claro que los nomatos de los foros allanquen les postures. Dando la cara, roblando y aceutando consecuencies de lo que se robla, ye la manera d´avanzar.

D´esi Congresu tenía que salir tamién una Caxa única pa les reivindicaciones unitaries más urxentes y prioritaries de la Nación Asturiana.

Hai dalgún post prestosu na blogosfera y nos medios dixitales (Llingua a pacer, Pablo R. Alonso, David Artime) que yá lo refierta: fízose más que nunca nesta campaña. Y esplande la elegancia y el trabayu descomanáu de Bloque-UNA, con bona imaxe, ensin victimismu, con sentíu del humor, amosándose con “normalidá”  (inda gasto´l términu normalidá nel sen psiquiátricu de la pallabra). Ye dafechamente cierto que´l nacionalismu asturianu ta poniendo puxu por presentase a la sociedá como un conxuntu de persones normales que piensen que son quién a camudar les dinámiques seculares d´Asturies, que piensen que la tema llingüística y la llaboral o la paisaxística son too uno. Que ye tolo mesmo: qu´Asturies tien pendiente una igua mui estremada de la qu´ufren los partíos que tradicionalmente ocupen el poder y que siempres recibieren el focu de lluz de los mass media y la cuasi total atención de la sociedá asturiana.

Toi contentu pesie a los resultaos por delles coses. Porque confirmáronme una cosa. Había y hai dos, y solo dos fuerces principales nel asturianismu políticu, nel nacionalismu astur: Compromisu por Asturies y Unión Asturianista. Les dos fixeron campaña en serio, con unos medios materiales escasos, como escasos son los sofitos que tolos asturianos-yos apurrimos. Toos, yo'l primeru. Agora ta mui claro otra vuelta que la suma aritmética de les dos flotes que salieran a la mar énte les elecciones representen una minoría d´asturianos, pero una minoría qu´esiste y que nun hai que dexar cayer en sucu baxeru. Una minoría que guapamente podía doblase una y bones haya xuntances y contestos más ilusionantes que los d´agora.

Y ye que los 10.000 votos que podíamos tener sacaos en casu d´aconceyanos con bon xacíu toos, de dir les dos flotuques xuntes diben ser solo l´aniciu de dalgo nuevo, non una igua definitiva al “Problema d´Asturies”. Yo nunca dixi que sacar el famosu diputadín fuera la igua de nada. Nin que fuera l´oxetivu máximu de les Xuntances. Xuntances entendíes por dellos, seique a mala fe, como maniobres electorales o electoralistes. Non: el famosu oxetivu del famosu diputadín yera (y ye) importante pa xirar definitivo toles estratexes del nuestru mou d´entender Asturies. Pa dar a entender a los “non convencíos” que nun somos un ghettu raru y enrarecíu, que somos una opción respetable, con diagnósticos ya igües na mano. Qu´antes qu´enllenar Asturies con Ikastoles y allambraes independentistes, queremos defender la tierra, los paisanos, los trabayadores, el paisaxe y ser vistos como parte normal y relevante de la Asturies real. Y qu´éticamente tamos perriba de les mafies oligárquiques que sapocen el País.

Refugo dafechu, espreceto y doi´l llombu a tolos malintencionaos que quixeron entender la dinámica de Xuntanza como asuntu namái electoralista y aritméticu. Mentira podre. Pa min ye tan importante o más el llabor a pie de cai, el llabor y la entrega de caún col so conceyu, col so coleutivu ciudadanu, col so compromisu colo más inmediato y local, el de caún asegún les sos posibilidaes. Si una cosa amuesen estos probetayos resultaos ye´l carecer d´una estensa rede de “cases del nacionalismu” per toa Asturies, bien afitaes territorialmente, a partir de les que se vaya espardiendo l´exemplu de que los nacionalistes tán al serviciu del Pueblu, y que nun son una camaretá d´energúmenos que se dediquen a reclamar la Lluna y a insultar pela rede. Qu´haya xente que canalice'l descontentu haza les Mines d´Oru de Narcea, los Campos de Golf del Cantábricu, los Muselones y Regasificadores, los ERES y les Feries d´Abril qu´usurpen la nuesa identidá, y usúrpenla non d´una manera señardosa y romántica (Ai, ¡l´Arcadia!) sinón cafiando profundamente a los nativos más averaos a tamañes colonizaciones. Esta ye la Colonización qu´hemos denunciar los asturianos y dexase de discursos sobre “les fuerces d´Ocupación” y demás fataes a les que mos tien acostumaos la lloria de los “puros” ya “irredentos”.

Y el tema ye qu´hai que ser contundente nel mensax, pero non kamikazes. Hai qu´apuntar bien, a fechos concretos qu´esmolecen a la xente de nuestro. Quiciás la elegante campaña de les dos flotines que salieron a la mar nun fueron abondo contundentes nel so mensax. Ello-yos resta color de contraste énte otres opciones más abultaes numbéricamente énte los asturianos. El Bloque-UNA, si nun resalta lo identitario más tovía, pierde votos énte IU y abre la puerta a que la marxinalidá de CA aproveche tala debilidá y reivindique monopolísticamente esti fautor. Y el PAS, pela so banda, si nun apuesta por un nacionalismu más esplíciu, va aprucir talmente a los güeyos de munchos como si fuera un hermanu probe del FAC de Cascos. Y muncha xente apuesta al caballu ganador, quier dicir vencedores, non dignos perdedores nin versiones en miniatura de lo qu´hai yá na escena mediática, muncho más dotao de fuerza y númberu de sofitos.

Nun veo otra igua que dir construyendo esa rede local y territorial de coleutivos y “cases del pueblu”, asina como de trabayu andechao, medrando n´esfuerzu y financiación, pues ye esti´l dieldu seguru que rique una representación segura nel Parlamentu y nos Conceyos, cosa que ye un mediu pero non un fin.

“Mui de xuru que nos prósimos dies tendría de llegar, sinon aporto yá, una carta unviada por Arturu Xosé Bermeyu, Secretariu Xeneral d’Andecha Astur, empobinada al Bloque por Asturies (BpA) y a Unidá Nacionalista Asturiana (UNA) proponiendo-yos un aconceyamientu inmediatu comu caberu  intentu na gueta d’un alcuerdu políticu ente les tres organizaciones de cara a les elleiciones de mayu de 2011. Camiento que, pa deceición de munchos, y mía personal tamién, nun pasará la cosa de ser, simplemente eso, un últimu intentu frustráu de que Bloque y UNA, enfotaos ciegamente na so fueya de ruta haza l’aniciu de nun se que sustitutivu d’Izquierda Unida, dígnense a aceptar facer política, falar de política y falar de les necesidades polítiques d’Asturies colos que representamos el soberanismu d’izquierda y l’independentismu n’Asturies y nun piensen sólo nos númberos y nel so particular intentu d’atopar una salida individual pa salvase de la quema elleutoral. “

[vide: www.infoasturies.net/index.php?option=com_content&view=article&id=9129:elleiciones-2011-icomulgar-con-ruedes-de-molin&catid=44:arbesu&Itemid=69]

(Imaxe d´una pseudo-xuntanza engaña-bobos)

Esti ye´l párrafu, si mal nun recuerdo, Qu´un día critiqué nun correu internu del Coleutivu Pola Xuntanza. Nun sé qué dirán de min los correos internos d´otros Coleutivos o Organizaciones, si dicen daqué, pero lo ético ye faer como que nun lo sé y como que nun m´importa, pues pa eso son correos internos. El casu ye qu´un topu, traidor o como se quiera denomar, fixo llegar crítiques de mio a la organización criticada, a l´Andecha yá rebautizada como CA.

Un coleutivu pa la Xuntanza tien que furrular sobro la base de la llealtá y la confianza mutua pencima de les diferencies de sigles ya ideoloxía (que les había nel CPX, pola so propia naturaleza). El casu fue que de les mies crítiques –dacuando dures nel tonu, he reconocelo- al PAS y al Bloque, nunca nun recibiera ataques. Pero resulta qu´”a los que representamos al soberanismu d´izquierda y l´independentismu” nun se-yos puede tocar.”

(Imaxe d´un clon de Pola Xuntanza: más tenderetes)

Pues nun ye asina, señores. Yo siempres tuvi mui cerca ideolóxicamente de lo que defendéis, collaboré altruistamente en dellos enfotos vuestros y nunca vos tenía criticado públicamente. Y en payares y avientu de 2010 vos paeció mal una crítica INTERNA de mio…

Pues mirái, la política nun ye la vida d´una secta. Ensin crítiques nun hai avance nin camín a denyures. Y vós tenéis mester, como tou fíu de vecín, como yo mesmu, de les crítiques. Quiciabes nun táis acostumaos más qu´a les crítiques chigreres, y la idea que abunda de la “unidá d´aición” nos vuestros ambientes sía la de compartir la barra del chigre. Pero tenéis qu´almitir crítiques y nun pensar qu´esos mil y pico votos son un ésitu, como anden diciendo trés o cuatro blogues que vos pasen la mano pel llombu. Tenéis qu´almitir que 700 y pico votos en Xixón compartíos col porno-comunismu residual nun ye precisamente un ésitu. Tenéis qu´almitir qu´unviar topos al Coleutivu Pola Xuntanza nun ye un modelu d´elegancia…Tenéis que reconocer que 1600 votos nel País ye calderilla y fracasu.

Y tán faltándovos les xides pa nun faer Xuntanza, inda siquiera pa esistir. Falástis de la “unidá d´aición” porque vos esmolgaba la presencia d´un “sospechosu” como Valledor na cabeza de les llistes. Sí, un “cimarrón”, como lu llamábeis dellos del vuestru ambiente. Pero Valledor quitárase d´en medio, nunca más se supo d´él, y agora ¿qué? Pues dixístis que los otros, los “posibilistes” nun quieren xunta dala… ¡Ala, el victimismu como argumentu!

Con 1600 votos lo meyor que podéis faer ye quitavos d´en medio o trabayar en unu o dos conceyos que se vos dean bien. Más nada. Nun voi a dedicar más artículos a la vuestra “Unidá d´Aición”.  Nun paga la pena siguir falando d´esto. Mirái la Campaña del Bloque-UNA: nun algamó lo esperao, pero seique fue la más profesional y elegante del asturianismu na so historia. Deprendéi aú ta´l camín.