Se muestran los artículos pertenecientes a Febrero de 2008.
Resumen
- 06/02/2008 08:24 - Que mos degüelvan el País
- 11/02/2008 10:36 - Discursín sobre´l calter nacional de los asturianos
- 13/02/2008 09:16 - Por un Frente Nacional Asturianu
- 18/02/2008 08:21 - L´Asturies que s´espande.
- 21/02/2008 08:59 - Don Gregoriu y “salir corriendo”
- 25/02/2008 11:31 - Más talantamientos pa un Frente Nacional d´Asturies
- 26/02/2008 08:18 - La llucha pola Nación ye una llucha de Clases
- 27/02/2008 08:15 - Esperimentos facistes con Asturies.
- 28/02/2008 08:58 - Frente Xúnicu y Allianza de Clases: Por Asturies.
- 29/02/2008 10:27 - Célules de llucha nacionaliega
06/02/2008
Que mos degüelvan el País
Que mos degüelvan el País.
Carlos X. Blanco.
Dalgún díi, si nós y los que vengan inmediatamente nun lo aparamos, a esti país naide lu va reconocer. Les tierres más barriales, aquelles que precisamente destaquen por tener homedancia y dar muncho granible, tán siendo asfaltaes. El formigón, el cimentu, el fierro y el paisaxe “duru” propios de la estética urbanícola y postindustrial tan desanciándolo too. Dellos arquiteutos, urbanistes y xeógrafos meritaben talmente dir a prisión. Más entá debíen ser separtaos del poder y del texemanexe de les perres públiques los milenta políticos y xestores que premiten esos atentaos. Cuando la estetica nativa del País siempres foi la de lo verdi, lo irregular, lo desnivelao, l´alternancia ente los usos campesinos (y polo tanto “civilizaos”) de la ñatura colos picaratos y biesques más xabaces, vemos güei n´Asturies un trunfu de la xeometría, de la llinea recta, del achaplamientu d´apisonaora, de los caxones de formigón armao, de los paisaxes golfísticos, como islluques de verde artificial (non la herba espontáneo) metanes fileres enormes de cases adosaes, yá asonsoñando l´arquitectura de Liverpool nes peores dómines del industrialismu, yá faciendo lo propio cola estética moruna de les canes blanques y mediterránies, que dexen a ún cégaru col sol meridional. Tantu nun casu comu nel otru, un gustu foriatu ya importáu. El gustu que impón el Colonizador sobre´l Colonizáu.
-
Al empar, les poques casones, horros y perguapes caseríes qu´entovía son a alzase arreches nel nuesu país, cuando nun son achaplaes pola escavadoria, son mercaes por xente oportunista y foriato, y les convierten en llugares de branéu onde llanten olivos, fontes morisques y rosales tipu L´Alahambra, cásique como si vivieren en Marbella, pero con menores necesidaes de riegu. Los que de forma ñatural debíen tar ocupando esos llares y eses tierres foron espulsaos debidamente por cuenta d´un “Terrorismu Económico d´Estáu”, col envís de dexar valeru un espaciu que se mercó a los de fuera.
-
Ye conocío que l´ermu saharianu ta avanzando dica´l Norte, y anque ye difícile que trespase´l Puertu Payares o el Güerna en pocu tiempu, tampocu va ser lo mesmo pa los asturianos tener de vivir a les puertes d´un clima desérticu. Si lo que agora ye meseta va camudar n´ermu, lo que agora ye clima atlánticu va camudar en mediterrániu. Dellos güeyos arteros yá truxeron les sos inversiones y por cuenta del augua entá abondosa, mercaron xalés y cases asgaya y remanen de sobra en dellos conceyos, onde son los nueos “señoritos” y mui enchipadamente fain y desfain los que-yos peta. El nativu –cola política demográfica de les caberes décades- nun tien otro que colar del país, sirvi-y en bandexa al invasor o arrenunciar a tener fiyos o casa propia. El nativu ve que lu tan chando de casa y que´l so propiu paisax de la infancia ta siendo robao.
-
¿Qué facer? Si alzamos la voz, hai mester tener concenxa de que les mordaces tan dimpuestes, y los palos represores tamién. Asturies perdió muncha polación y la xente ta enforma avieyao. Hai mester una nuea xeneración moza que nun tenga mieu a recuperar el país de so. ¡Degolvéinoslo! Esi va ser el glayíu de guerrea. Porque, préstenos o non, esto ye la guerra.
de "Barganaz Astur", na ueb del Partíu Carlista d´Asturies.
11/02/2008
Discursín sobre´l calter nacional de los asturianos
Discursín sobre´l calter nacional de los asturianos
¿Tien Asturies un calter coleutivo? Yo cuido que sí, y mui estremáu. Lo qu´asocede ye que científicamente cuesta bien de trabayu afitar dalgo tan intanxible. Lo más afayaízo ye apurrir datos hestórico-económicos, xeográficos, dir a la gueta d´un “Dieldu” del nuesu Ethnos, sabedores de qu´esi Dieldu va tresformase siempre colos cambeos nel Mou de Producción, les emigraciones de xente estraño, los nueos allineamientos sobroestructurales nel ámbetu internacional, etc., pero ¿Dieldu?, habelu, hailu.
Garrar ente les manes esi Dieldu ye enguedeyao ¿dacuéi? Pero hai que lo facer si queremos apurrir una desplicación de nós mesmos nel mundu, nel mundu occidental al que milenariamente pertenecemos. Nada más llonxe de les postures perescéptiques de Don Julio Caro Baroja, por exemplo, que les míes. Nun llibrín (“El mito del carácter nacional”, edit. Caro Raggio, Madrid, 2004) l´antropólogu vascu emburriaba contra tala construición diciendo, pencima de too, que´l calter nacional taba encadarmáu especialmente per aciu de tópicos mui vieyos asoleyaos davezu yá a cargu d´autores de l´Antigüedá Clásica, y que por caleyines más o menos tapecíes renacíen adaptaos a les circunstancies presentes, les más afayaíces nun momentu determináu de la Hestoria. Asina, los Españoles/Castellanos, a partir de tópicos grecorromanos alrodiu d´íberos y celtíberos, sedríen de calter imperiosu cuando estos taben enchipaos con un gran imperiu (“Ondel´l sol nun se tapecía”), y pela cueta, sedríen mui probetayos y míseres precisamente cuando política y militarmente l´imperiu español fechu por Castía yera eso, una cosa mui probetaya y mísere. O seya, nun hai oxetividá dala sinón oportunismu políticu estranxeru cásique siempres dimpuestu a esprecetar al Otru, arriendes d´una tresmisión falsaria de tópicos que amuesen raigones pervieyos na lliteratura y rescataos con un envís mui oportunista. Non. Tantu escepticismu nun tengo. Reviéntame, por embargu, l´iñorante emplegu de tópicos asturianos a cargu de propios y estraños, y equí l´escepticismu ye bien recibíu. Ye ablucante l´almiración del nativu y del turista pola forma nuestra d´escanciar sidra y de bebela, dalgo que ye bien recién en términos hestóricos y la iñorancia de los mesmos, propios y foriatos, al empar, haza l´idioma de nueso, dalgo muncho más definitorio y, amás, milenario. Ye pa reventar que n´España al dicir “soi asturianu”, te suelten aquello de “como Alonso” ensin que-yos venga a la tiesta otru prohome de más aquello. Tampocu hai ensayos bonos sobro la “identidá asturiana”. Con tolos mios respetos, el de Carlos Rubiera, escritu en castellán cuido que nos 80, anque con bona intención, peca de gastar unes categoríes psicolóxiques antigües, tanto no formal como nel conteníu empírico. Dientro d´esti caberu capítulu, alcuérdome d´un puntu empíricu col que yo me sintía mui a favor. “Que n´Asturies la comida ta más bona”. Yera verdá pa min. La Cultura gastronómica popular del País taba tovía daquella mui encima de la española. Nun sé si les fames de posguerra foron diferentes n´otros llaos, o que les materies primes yeren inferiores, pero yo taba a favor de Rubiera n´esi aspeutu, falando –claro ta- en términos mui xenerales. Pero, ai, vieno l´afoguín turísticu p´Asturies y vamos, pali que pali, quedando frayaos. Davezu vas a comer, mesmo a sitios de costa y destinos turísticos, y talmente paez que tas comiendo basoria como les que ponen en Madril a muertos de fame con perres y a iñorantes gastronómicos: fritanges, conxelaos, too comida-catering desenraigoná del País. Asina entós, si yá la categoría “comer meyor” no formal podía ser oxetu d´alderique, qué nun dicir no cincante al so algame empíricu: que la cosa ta camudando y que les porqueríes famientes del estilu de Ferrán Adriá van popularizase rápido. Entovía cuido qu´hai xente asturiano asgaya que sabe comer y que sabe beber, muncho más que n´otres comunidaes yá arrasaes nel aspeutu identitariu (castellanes, llevantines, etc.), anque ye cierto eso de que les comparances son odioses. El milagru asturianu, no que cinca a música, instruición, poesía, apiegu al campu, etc., y, por qué non, no que cinca a saber comer y beber, ye cenciellamente eso: un mlagru, y por eso dificile d´esplicar. Yo, que llevo munchos años fuera, entrúgome tolos díes por qué somos tan estremaos de los españoles. Ye una manera tan distinta de ser distintu, que por eso cuido que tien muncho de misteriu. Quiciabes seya la normalidá cola que llevamos pel mundu esa estremancia. Quiciabes tamién por ser una nación de poca población y mui desconocida nel estáu y nel mundu, nunca nun tuvimos munchos espeyos nos que miranos. Antañu, la xente salía de casa pocu, y decatábase numái que de les diferencies col del otru valle o conceyu. Agora la xente sal más, pero va a Benidorm o a Cancún, que ye como facese lobotomíes identitaries. Falo de una cosa mas en serio: la de siguir siendo asturianu ente una mayoría que nun lo ye. La de nun poder ser otra cosa y saber, cada díi más, qu´España, la de la “paellita” y la del “pescaíto” ye puru inventu.
13/02/2008
Por un Frente Nacional Asturianu
Por un frente nacional asturianu .
Asturies ye una colonia. Lleva décades siendo una colonia del capitalismu industrial forastero. Como colonia que ye, d´ella sacaron materies primes, bienes intermedios, enerxía y, a lo cabero, de resultes de too ello, plusvalíes. Agora tresformóse nuna rexón menos productiva por cuenta de les llacerioses reconversiones industriales, que malapenes ye quien a compensar la perda col sector del turismu. Megaproyeutos como El Muselón, les milenta autovíes, los centros loxísticos, les urbanizaciones con campu golf y demás, ponen un futuru mui prietu al país, por cuenta de que nun falen en favor d´una productividá mayor y en serio, que dea puestos de trabayu, estables y de calidá, que frene la emigración, qu´evite´l deterioru ecolóxicu y paisaxísticu. Más bien sirven lo contrario. Pa frayanos más entá.
Too esto ye sabío. ¿Qué facer? Arriendes de los métodos tradicionales de llucha obrera, vecinal, axitación na cai, propaganda de cartelos ya interné (porque la prensa y demás medios de comunicancia censuren mayormente dafechu), hai mester d´algo más qu´evite que la oposición al poder tea muda, sorda ya impotente más de la cuenta. ¿Qué ye eso que fai mester? Una concenxa intelectual xunida. Perriba de les siegles, les militancies concretes, les estremaúres ente persones y grupos, ye nidio que nun hai una voz coleutiva, una sola voz que, como si surdiera d´un solo gañote glayara: ¡Non! Non, vais tenenos en contra, con nós nun podéis cuntar, vais ver lo abegoso que ye tener esi poder de colonialistes y autoritarios col pueblu enfrente, con una concenxa coleutiva xunida y en oposición. España: tú nun yes un Estáu seriu, tú yes un inventu, l´inventu del xuegu suciu, l´inventu del agraviu ente naciones y rexones, Tú tes l´Estáu del “garzonaes” y les falcatrúes. N´Asturies sabríemos facer les coses d´otramiente. Escaecímoslo, y asina manda sobre nós una mafia, una xentualla, que se dicen asturianos pero que son numái que marionetes con carné (y carné de “progresismu” pa más INRI). Yo lo que güeyo son, malapenes, voces en soledá. Ye cierto que dalguna representa dalgún coleutivu de más xente, normalmente poca xente. Otres falen en soledá, y escuquen en páxines llibres, normalmente n´interné, cola sensación, munches vegaes, de que se predica en ermu. Como diz un canciu, la verdá ye qu´arimamos pocu l´hombru. Pero non. Nun siempre hai predicación nin grayíos en ermu. Hai xente entá que llee, que comparte idegues, que se pon a pensar y actuar. Lo que falten, pamidea, son preseos de muerganización que sepan arreblagar perriba d´estremancies ideolóxiques muncho más cencielles de llibrar de lo que paez. Entámase sabiendo quiénes son los braeros y cabezaleros enemigos del país asturianu. Los que lleven dos décades esaniciando les señes d´identidá y de autosuficiencia d´un país. Los asturianos tamién tenemos de recuperar una “memoria hestórica” que precisamente los gobiernos socialistes nos quixeron tapecer y destruyir. Foron gobiernos socialistes, foi una FSA que nun fizo “paseos” como fixeron falanxistes, requetés, etc. Non, nun vayamos a comparar. Pero sí cometieron l´actu criminal d´haber torgao por tolos medios qu´Asturies tomara´l llugar que-y correpuendía nel ámbetu de les comunidaes del estáu. Un llugar cimeru en cuantes a productividá y nivel de vida y de rentes. Envede defender los intereses del país, dedicáronse a esgonciar pa décades tolos aperios de supervivencia económica ya de autosuficiencia. Aumentaron la dependencia y, lo que ye peor entá, la concencia de dependencia por cuenta d´una propaganda alienante que testoneramente repetía eso de que “equí yá nun valimos pa ná”. ¿Por qué fixeron esto? Escuros intereses que sedría abegoso pescancíar. Pamidea hubo una planificación “xeostratéxica”. La integración capitalista na Xunión Europea y na economía global que s´acolumbraba yá pa los años 80, desixía afitar un arcu mediterráneu de desendolcamientu, cola exa bien conseñada na capital madrilana. Cásique con un compás, afitándo l´obleru fixu en Madril, l´arcu sur-mediterráneu trázase enforma fasta los Pirineos catalanes. Por embargu, l´arcu atlánticu quedaba muncho más feble, y una Asturies minero-industrial a la que naide quixo remocicar nesti contestu, foi la que pagó el platu rotu nuna midida mayor. La “xeostratexia” quier anguaño camudanos nel Parque de Yellowstone pero con munchu trucu, como correspuenden a una edá de falsedá y virtualidá como la que mos toca vivir. Porque los parques temáticos que se van abriendo (y l´arcu mediterráneu tien ventaya y esperiencia de sobra énte l´arcu atlánticu, nesto) tapecen muncha basoria, desiquilibriu medioambiental, ladriyu, perres prietes, urbanismu alloriante, asfaltáu de playes, etc. Asturies va ser l´amestu de vertederu y parque temáticu que Madril y los sos caciques de la FSA quieren que seya. Esta xente ta siendo la peor torga al desendolcamientu del país, y malapenes tan teniendo oposición (pos en custiones fonderes los del PP son mui asemeyaos nos sos enfotos, el PP nun ye “oposición” sacantes el sentíu formal y parlamentariu del términu). La “memoria hestórica” que nós reclamamos anguaño ye bien recién. Muncha griesca hubo pa defender puestos de trabayu, y defender la dinidá de proletariáu, del campesín y del pueblu asturianu en definitiva, nes dos caberes décades, polo menos. Pero ye una memoria feble, davezu. L´escaezu siempre beneficia al autoritarismu y al capitalismu. Nun solo hai mester de caltener la memoria a la hora de votar o movilizase, sinón a la hora de señalar col deu a los braeros culpables de qu´Asturies tea nun estáu d´ablayu, de rodielles, nuna situación de país vencíu. Amás, el país asturianu cadez una triba de terrorismu non sangrín, pero terrorismu. En gran parte vien a ser un terrorismu d´estáu. Y pa más señes, yo llevo un tiempu escribiendo que´l nome más afayaízu pa desplicar el fenómeno del que voi falar sedría “terrorismu económicu d´estáu”. Cuando una gran parte de los trabayadores tienen que colar del país onde tuvieren nacencia, a la fuercia, ñegándose-yos dafechu´l drechu a vivir y trabayar nel país de so, eso ye terrorismu, nun ye otro. Pos hai sobre la xente, sobremanera xente mozo, una menacia: el paru, la fame a mediu o llargu plazu, la marxinalidá, la dependencia sine die d´unos pás cada vuelta más vieyos, la menacia del contratu-basoria. La planificación formativa, llaboral y, en xeneral, productiva, del país asturianu sigue ensin pensar pa sigo mesmu. Trátase namai de formar xente (davezu de formala perbién) pa que otres comunidaes del estáu sean quien a saca-yos el xugu. Tamos rizando´l rizu como colonia d´España. Nun ye sólo que tean esplotando´l territoriu, el paisax, la enerxía y la clas obrero in situ. Tamién hai qu´esplotar a la so fuercia llaboral como “fuercia desplazable” más alló de les sos lleendes alministratives. En dalgún sen, hai “Asturies” alló onde viven asturianos, y perendayuri tán esplotando milenta de los nuesos, munchos d´ellos dotaos de numberosos años formativos y bona xera en capacidaes. Y eso ta perdiéndolo el país de forma llaceriosa. Tanto los de dentro como los de fuera tienen que facer una xuntanza en serio, perriba de les famoses etiquetes (nacionalistes, asturianistes, rexonalistes, progresistes, izquierda d´esto o d´aquello) y pensar sobre manera nel país de nueso, país asturianu que, enantes de definílu a priori, por más interés teóricu qu´ello tenga, tien de ser, con urxencia, oxetu de rescate. Si, hai que rescatar Asturies. Rescatala d´un secuestru horrible qu´ente toos tamos permitiendo a cargu d´un complexu sindical (SOMA-UXT, CCOO) y políticu-burocráticu (FSA con una IU cómpliz), arriendes d´una clas patronal parasitaria d´eses muerganizaciones qu´entá se nomen a sí mesmes como “progresistes” y “de clas”. Pa dir a la griesca escontra d´esti complexu cásique mafiosu, col rodiellu electorial bien montáu, hai qu´ensayar muérganos d´opinión qu´espresen una voz crítica, implacable, solidaria pa con toos los que se sitúen “a esti lláu”, el llau críticu de la dictadura colonialista del PSOE. Envede andar tol día sacando a rellumar los trapos sucios ente milenta fuercies y voces dixebraes ente sí, hai que converxer, facer una triba de fuercia de choque coles palabres y cola disidencia. Asturies tien potencialidaes asgaya pa encadarmar esi “frente popular” y nacional. Pa ello hai que aconceyar una “concenxa coleutiva”, orgánica, revolucionaria. Eso implica una llealtá y una brenga por cuenta de les persones y les fuercies qu´entá nun s´acolumbra. Pero la nuesa supervivencia va n´ello.18/02/2008
L´Asturies que s´espande.
21/02/2008
Don Gregoriu y “salir corriendo”
Onde tea lo natural, que se quiten los inventos. Esto va pola sencia de la Nación Astur. ¿Qué pue nomase dafechu una Nación Astur? Un pueblu que caltién ensin interrupción dala mentes quésiyo cuántos sieglos una concenxa de ser un pueblu homoxeniu qu´habita de forma estable un territoriu bien definíu. Pegoyos cabezaleros son 1) cuntar con llingua propia, 2) cuntar con derechu civil propio (recomiendo l´artículu de X. Vilareyo “El societarismu familiar asturianu”, na web del Aconceyamientu de Xuristes pol Asturianu, http://www.xuristes.as/SocietarismuFamiliar.htm) , 3) caltener demientres bien de tiempu una Constitución Política d´autogobiernu propia, la Xunta Xeneral del Principáu, dende un aniciu indefiníu na Edá Media fasta 1836, 4) haber sío un Reinu bien de tiempu, el primer Reinu cristianu-occidental de la Península na Edá Media, 5) haber furrulao como sociedá independiente y autogobernada dafechu, polo menos dende la dómina de los Reis Católicos fasta los Borbones, ya inclusu haber experimentao comportamientos propios d´algame internacional dixebraos del Reinu Español (nel sieglu XIX, 1808) y de la II República Española (años 30 del sieglu XX). Caún d´estos pegoyos (y nun escosé los mesmos) puen recebir delles interpretaciones hestóriques estremaes, y yo nun voi entrar n´elles agora. Pero cuido qu´asina como los pongo, ensin más aquello, son abegosos de custionar. Falta un pegoyu, y ye perimportante dientro d´esta Democracia Formal de Mases, onde la Opinión Público remánase de contino na TV y los tabloides madrilanos: esa voluntá de siguir siéndolo a traviés d´un gran frente o movimientu de reconstruición nacional. Equí paez que los asturianos vivimos de glories pasaes, grandonismos y simbolismos valeros. Tien razón Gregorio Morán al criticar el famosu grandonismu ástur, pero non a la hora d`encamentar que faigamos como elli, que salgamos corriendo. Les coses yá nun son como antañu yeren. El Pasáu tien de valir pa tomar la midida de lo que podemos llegar a ser. El Pasáu tien de valir pa nun lo escaecer, para tar arguyosos de lo que sía mester asoleyar de la nuesa hestoria compartida, pues en contra de lo que diz esti periodista emigráu, tamién hai abondos complexos na personalidá coleutiva de los asturianos. Mirái la llaceria del nuesu idioma, cómo lo guardamos énte los visitantes de fuera, cómo nos ponemos un aquello coloraos sigún en qué sitios y circunstancies. ¿Ye eso arguyu d´asturianos? ¿Y qué me dicís d´esi discursín pseudonacional que se noma “asturianismu” de la esquierda vergonzante, el Bloque pal Engañu (¡son tantes lletres que nun sé escribir el nome de la Coalición ¡) cuando faló de “Oficialidá ensin Imposición”? Medranes bobes d´una esquierda acomplexada, salida de les sacristíes asina como de les catacumbes ideolóxiques del sovietismu... Non, señor Morán. Yo nun encamiento a naide que cole d´Asturies. La necesidá yá va encargase de que milenta mozos emigren, como siempres s´emigró, cuando nun hai otro. Pero prefiero que los más xóvenes se queden nel País y lluchen por defender el solar. Tán chándonos de casa, y los nueos amos van remanar a los pocos que queden cola fin de convertilos en criaos. Asturies, dios te guarde de Castiella. Llevo munchos años xubiendo al ALSA de Madril, y sé de sobra lo que ye´l “suañu de la Tierra Prometida” madrilana (o española). Veo como xuben al bus nueves xeneraciones de mozos con cara murnia, peresplotaos. La mesma cara del que foi engañáu, o espulsáu del verde País que lu vi ñacer, condergada a compartir pisacos vieyos y bufardes con cocaraches: esa ye la cara de los compatriotes deportaos. Don Gregoriu; nun afale a colar a la xente. Yá´l terrorismu económicu español fadrá´l so llabor. Nun s´esmoleza. Los que queden dientro, yá fondones, darán el votu “útil”. Votu pal xenocidiu silenciosu.25/02/2008
Más talantamientos pa un Frente Nacional d´Asturies
26/02/2008
La llucha pola Nación ye una llucha de Clases
La llucha pola Nación ye una llucha de Clases. En cuantes qu´hai una Nación primía hai un Pueblu Trabayaor primíu. Comu yá ensayara Roma cuantayá, el Poder Imperial recluta elites cola fin de “llendar”, talo como si pastores foren, a les partes indíxenes menos favorecíes de la situación colonial. Pal Poder Imperial ye fundamental cuntar, sinón col aplausu de la xeneralidá del Pueblu, al menos cola collaboración de los cooptaos pa que los dominadores tengan el patiu tranquilu. Salvando les distancies, tamién los nazis reclutaben presos xudíos pa xixilar y representar a los collacios de raza, y eso que taben toos nel mesmu barracón y del mesmu lláu del allambre. El modelu romanu, con too, ye l´ancestru más fiel del godu y del castellanu. L´Imperium de molde clásicu supón un pautu puramente teóricu y asimétricu ente vencedores y vencíos. D´ehí vien la parola “Provincia”: vencía d´antemano. Nun hai mester una derrota real na Hestoria. Basta con qu´haiga una derrota moral ya simbólica. Yo nun sé qué derrota foi la que podría marcar simbólicamente la derrota nuestra énte los castellanos. Pémeque les amarraces d´Urraca, Gonzalo Peláez o don Alfonsu, conde de Xixón, queden mui llonxe, anque debíen ser más estudiaes polos escolinos nuestros. Cásique de xuru foi´l nuestru Ochobre de 1934 el finxu en que, depués d´haber sio “Provincia” bien de tiempu, pudimos llevantar la Cabeza y ser un oasis de llibertá proletaria. “Provincies” tamién foron les Catalanes y Vasques, pero supieron rescribir entainando la so hestoria metanes la llamuerga que foi la España de la Restauración fasta la España d´esta II Restauración (la de Xuan Carlos). Especialmente, en morriendo Franco, estos dos países despabilaron, pero nun ye que l´ablayu nacional fore muncho estremáu del nuestru énte Castiella. Simplemente, como digo, dende´l Ochobre Asturianu, la direición de la clas obrero, y les fuercies de la esquierda asturiana apavoriaron de cualisquier “aventura”(como nomaron la Comuna Asturiana en Madril), y foron a parar a les manes del centralismu “internacionalista”. Aquelles fuercies son güei mayormente Altísimos Funcionarios que van de progresistes, y tamién políticos y sindicalistes profesionales que nunca nun dieron un palu al agua, o que lo escaecieron dafechu, depués de 30 años de despachu oficial. Los que nos llevantamos a les 6 de la mañana pa dir a trabayar, y non a escalecer asientos como ellos, alcordámonos muncho d´esa xente y de la demás familia. Si yo tuviera una escoba... como diz la canción... Agora, cásique del otru día p´acá, esa esquierda millonaria y “cosmopolita”, alcuérdase de la llingua pa facer campaña, esa “esquierda” oficial ex-minera (¿) xunta la del milloniariu anti-sistema Joaquín Sabina, que va pocu vieno a Asturies a rise de les cosiquines nuestres del bable, ye la de los verdugos del país. La Poesía de Sabina y demás sofitos de ZP ye a España, lo que la Poesía de Villa (non Pancho, sino´l del SOMA) a Asturies.
27/02/2008
Esperimentos facistes con Asturies.
La opresión nacional y la opresión de clas súmense, compleméntese, y una ceba a la otra. Asina entós, el proletariáu d´una nación primía cadez una doble forma d´estruyón y esto marca caminos específicos de llucha. Una nación pequeña tien mester d´iguar preseos d´autodefensa muncho güeyables. La visibilidá internacional del so conflictu ye clave p´algamar solidaridá internacional y evitar l´escaezu, el despreciu a priori o cualisquier consecuencia d´esi conflictu tapecíu.
El casu ye que´l conflictu asturianu foi quedando bien callandino, cásique como si foren problemes de xuguete, xigomencies que nun son mui aquello, testoneríes de minoríes embaíes. Nada d´eso. ¿Quién mos degüelve´l nuesu tamañu demográficu? ¿el nuesu pesu industrial nel estáu? ¿la nuesa capacidá d´influyir nel movimientu obreru estatal ya européu? Naide mos lo va degolver Fixeron una Asturies pequeñina, a la escala pequeñuca d´un burgués sentáu en pantufles delantre la TV, nun pisu la cai Uría, lleendo La Nueva España. Una Asturies desarmá pa una burguesía que nun quier conflictu dalu. Que quier ser una pensioná del Estáu español, estáu que-y va dar bien de pan y circu (y pa circu, por ciertu, munchos toros). Pues ná d´eso. El Pueblu Proletariu Asturianu tien de ser ugual que Xesucristo cuando dixo: “Vengo a traer la guerra y non la paz”. Díxolo Xuasús, ¿recuérdenlo esos comunistes de sacristía que tantu medraron nel País? Guerra de clases, nidiamente. Cuando encarcelaron a Carnero y Morala, depués de milenta detalles más, dime cuenta de la triba d´esperimentu que queríen facer con Asturies. Un esperimentu de “rebaxe de fumos” nuna comunidá (pal Estáu “rexón”) pequeña y mui castigada comu yera Asturies, pa ver si con unes dosis de facismu controláu podíen aplicase darréu eses mesmes terapies notres fasteres demográficamente más pesaes. Tamién decateme d´eso col tema del puxu de grupos ultraderechistes na década de 1998-2008, y asuntos como´l de Cangues d´Onís. Tratábase de ver, a efeutos de Neutralización d´Asturies, si la rempuesta obrera, esquierdista y nacional de les fuerces asturianes taba ablayada del too, si entá quedaben áscuares de la nuesa tradición combatiente. Los facistes –quiciás, por hipótesis- seyan emplegaos estatalmente como “variable independiente” pa ver si daveres tamos los asturianos de rodíes del too ante provocaciones mayores que tán por venir.28/02/2008
Frente Xúnicu y Allianza de Clases: Por Asturies.
La llucha pa dexar de ser colonia interna del Estáu español tien de ser, por fuercia, una allianza de clases. Nun ye una batalla que presente´l proletariáu namás, daes les circunstancies d´anguaño. Ye una allianza interclasista por dellos motivos ente sí complementarios:
a) L´estatus actual del proletariáu volvióse dalgo roino tres les reconversiones industriales ya mineres. Ye un exércitu demográficamente rebaxáu en potencial, en comparanza colo que yera. Arriendes, quiciabes haiga seutores cansos, depués de la represión xabaz cadecida pente 1978-2008. b) Entovía hai seutores del proletariáu que tán engañaos y embaíos poles fuercies centraliegues na esquierda sindical y partidista. Nun hai, a lo que paez, una llucha desatá con visibilidá dientro d´eses organizaciones pa que la militancia derive del centralismu obrerista y economicista dica la llucha pola lliberación nacional. c) Un sentimientu o concenxa de lliberación nacional tien, por necesidá, de sofitase en clases pequeño-burgueses, intelectuales, medies, etc. , a lo menos nes primeres fases, cola fin d´algamar un discursu movilizador total, un discursu que se separte de la simplaya reinvindicación economicista o llaboral que, en suma y nel fondu, almite les riegles de xuegu impuestes a nivel estatal. La cuña d´ataque na llinea de flotación del sitema consiste precisamente nun “efeutu Fuenteovejuna, toos a una”, onde la reivindicación na cai arrama los calces avezaos de la llucha contra la esplotación y ufre un programa ilusionante a munchos otros seutores descontentos de la sociedá. Nun hai “Nacionalismu” fasta que la parola “Asturies” nun signifique, pa toos los que pisen el suelu d´esti país, una visión totalizadora: defensa del idioma, defensa del mediu paisaxísticu y del mou étnicu d´habitancia (La Casería), devolución d´un autogobiernu diferenciáu y másimu pal País, terminación de la emigración d´asturianos pa España, fin del usu y abusu de la Nación como basureru y colonia enerxética. La parola “Asturies” y “por Asturies” entós, tien de significar necesariamente un compendiu de la llucha revolucionaria que´l pueblu tien mester desendolcar pa emancipase. A la lluz de les esperiencies de descolonización en dellos países del mundu a lo llargo del sieglu XX, y acordies cola teoría leninista del drechu de les naciones pequeñes al autodetermín, el marxismu ufre´l corpus teóricu afayaízu pa encadarmar esa allianza de clases qu´ha dase nes primeres fases, embrionaries y precaries, de desarrollu d´un movimientu lliberador. Hai mester nun pecar enxamás de dogmáticu y nun ser nunca marxista “de catecismu”. La teoría marxista-leninista requier l´analís concretu de la hestoria de cada país y l´estudiu de les condiciones más afayaíces pa francer l´esllabón más fríngole del sitema. L´aición revolucionaria requier una estratexa na qu´haiga un Frente xúnicu, que nun cause alloramientu ente´l pueblu indecisu. Frente xúnicu con mensaxe xúnicu. D´otramiente, la hexemonía había conquistase con un testoneru llabor “misioneru” nes organizaciones de trabayaores y nos movimientos sociales col envís de qu´”Asturies”, y “por Asturies” seya´l resume brareru de les sos parcelizaes reivindicaciones y motivos pa la so esistencia plural. La verdá ye que queda muncho por facer.29/02/2008
Célules de llucha nacionaliega
Yá llevo un tiempu señalando dellos diagnósticos sobre la Colonia. Tán toos ellos encadenaos, son esllabones d´una cadena llarga, la cadena d´ablayu hestóricu, socioeconómicu ya inclusu simbólicu del País Astur. Yá se que soi pesáu, pero hai mester ordenar los esllabones con esactitud: asina qu´equí pongo los más cabezaleros col envís de deducir d´ellos propuestes d´aición o llucha.
- Asturies, comu Colonia, sigue tando alministrada mayormente pol Estáu, como s´amuesa al ser una Autonmía de tercer categoría, el culo d´España, onde los sucursalistes españoles na Provincia nun son a camudar l´estatutu nin a amestar reivindicaciones nacionales del mayor altor por mieu y complexu, pero sobre too, por obediencia a los sos xefes en Madril. - Los cipayos sucursalistes vense recompensaos en forma polos sos xefes madrilanos, per aciu d´una riestra de promeses a cambeu de la llealtá amosada: cargos cabezaleros dientro de los tres partíos d´ambetu estatal (PSOE, PP, IX), posibilidaes de ser dalgún díi diputaos o senadores en Madril y asina dexar de ser “provincianos” o caciques de tribu (que ye lo que nunca van dexar de ser inclusu anque lleguen a ministros), direutores xenerales, etc. El beneficiu mutuu que se dan los cipayos de la Provincia y los xefes de Madril ye la estructura típica de tolos imperios colonialistes, dende que Roma atacó Asturies, pasando polos matrimonios de criadores de gochos estremeños (rimbombantemente nomaos “Conquistaores”) al casase con princeses inques o azteques. L´imperiu siempre quier cooptar a los caciques indíxenes, amestase a ellos, reclutalos como funcionariáu colonial y aprofitase de los sos servicios como gobernadores eficaces en nome de la Metrópoli. Lo mesmo fexo l´Imperiu Británicu n´Africa o la India, los franceses nel Magreb y tamién nel Africa Negro, etc. Hai milenta exemplos. Trátase, asonsañando un pocu la terminoloxía de Michel Foucault, d´una braera “Tecnoloxía d´Aprofitamientu de la Traición”. El Traidor a los suyos esguila na escala social creada pol Imperiu sirviendo al imperiu, ya l´imperiu, pela cueta, aforra guapamente funcionarios qu´amás iñoraríen la sicoloxía del pueblu domináu. - Como resulta qu´una Colonia nun se va desarrollar económica y socialmente con llibertá, sinón que les sos estratexes tienen que tar subordinaes a “estratexes más amplies”, ye decir, “superiores”, los cipayos o caciques llocales –cégaros- nun ven otro que les conseñes xenériques que-yos dan dende Madril. Y entós, por eso, ye nidio que caigan en xacobinismos y en borricaes que nel mesmu Centru Metropolitanu nun se captaríen bien. Ye lo que se noma “ser más Papista que´l Papa”. Los cipayos, con Tini y Villa a la cabeza, nun saben del too bien que´l so llabor consiste en tener seliquino´l patiu internu, dexar al Estáu facer, desarticular la “Rexón” pa qu´esta seya una simplaya redolada al serviciu del desendolcu de la Matrópoli y de delles autonomíes asociaes a los planes de tala Metrópoli. Asturies en Madril tien la conseña de nun esistir, nin tan siquieramente. Eso sedría igual que si una pedanía de Xixón tirará-y a la cara el PGOU y toles ordenances, menaciando con separtase por tantos agravios. Nun se-y diba consentir ¿verdá? Pero la verdá, gracies a los tres partíos españoles, les sucursales, eso ye lo que somos anguaño n´España: una pedanía... de Madril, de los gallegos, en fin, de tolos vecinos que tean mester de territoriu, enerxía puerco, capital humano, salida al mar, agua, en fin, lo que seya. La Pedanía “Asturies” ye agora mesmo un territoriu de llibre dimposición pal que tenga mester de daqué, incluso pa la recolocación de profesores de gallegu (o portugués, porque lleí a una moza perende que n´Asturies se fala portugués, mamina del alma, y yo ensin sabelo). -Pa llantar cara, pa llantar griesca a esta doliosa situación ¿qué facer?: pues, siéntolo muncho, voi ser mui clásicu. El métodu de los comunistes, ye decir, el métodu de les célules. Unes cuantes presones de vanguardia metíes n´ámbetos clave del País. Hai qu´entartallar el furrulamientu normal de la Colonia dende dientro. Ehí la mocedá ye clave, porque´l llabor de pocos mozos tien efeutu “Bola de Ñeve”. Por exemplo, al Represor llingüístico na Universidá, nel Principáu, nel Ayuntamientu...canta-y les cuarenta... en bastos. Non con una Pita. Con un cientu d´elles. Al agresor mediuambiental, al represor de la clas obrero, a los sos collacios y a los combayones. Nun dar tregua. Nota: Yá se sabe que vivimos una dómina mui “sensible”. N´esta cabera campaña electorial, en distintes partes del estáu, unos pocos chavales con cartelos diciéndo-yos coses a dellos políticos, glayando sí, namás que glayando, valen pa sacar los collores, pa baxar los fumos a della xente. Pero llueu van esos politicastros y faciéndose les víctimes, falen d´”agresión”. Agora resulta que manifestase ye ¡agredir! Vamos en camín d´un facismu mediáticu, de xuru... - Unes célules presentes auquiera de los ámbetos institucionales dan “visibilidá” a una parte del Pueblu que nun conoció otro que´l dimir del Terrorismu Económico d´Estáu. Paru, emigración, toa una nación escorripiá namás que col fin de que los forasteros la merquen de saldu. Asturies ye güei un chollu pa los especuladores. Esta ye la estratexa de Neutralización y “clearing” (llimpieza) qu´España sigue pa con Asturies. De mano, hai que char al nativu de casa, curtiando-y toles maneres básiques d´autosuficiencia. Darréu, hai que quedase coles sos cases, tierres, col solar nacional, baxo la xida de que vivimos nun mundu globalizáu. Asina, cola casa valera, ensin los llexítimos amos, vendrá´l colonizador daveres. Entós, a los que queden dientro, incluyendo al cipayu que tantu los sofitó, nun van a valir pa otro que pa criaos. Total: Asturies = Pueblu de Sirvientes. ¿Queremos esto? Si lo queremos y lo premitimos, somos indinos.
.