carlosXblanco

Carlos X. Blanco. 

Nun ye tragu duce ver al to país derrotáu. Sicasí, esi ye´l xúnicu sen de tantu escribir sobre Asturies: facer lo que seya mester pa que´l país alce la tiesta, pa que dexe de tener tan gaches les cervices, animar a qu´otros y otres alcen tamién la so voz y qu´al altu la lleva digamos toos xuntos que yá tuvo bien. Habrálu perende que nun sepia ver otro que “victimismu”, ye decir, una enfilandrada de clangorios y patrioterismu n´artículos talos, llancia que nada nun vale pa salir alantre dica´l futuru. Si dalgo d´eso hai, victimismu asgaya,  ¿qué? Al menos ¿nun tenemos drechu a sintinos víctimes d´un xenocidiu planificáu, ensin sangre (abondo sangre tuvimos ente 1934 y 1975), pero xenocidiu a la fin? Dalguién tendrá que poner voz a tantes víctimes. Si tantu cacarexíu hai n´España con eso del “Patriotismu Constitucional”, ¿nun tenemos drechu equí a decir daqué, d´una vegada, tocántenes a un Patriotismu Asturianu? Como mínimo, el mesmu drechu. Y voi decir por qué. Por que n´Asturies hai abondes víctimes d´una política perfechamente planificada col enfotu de dexar fechu´l país un ermu agropecuariu ya industrial. Al reducir dambos los dos sectores, primariu y secundariu, a la so mínima expresión, el país nun tien otro qu´entregar la so capacidá decisoria al mambís d´un gobiernu central que mira pa otros porgüeyos. Y lo que ye peor entá, entregar el país a un gobiernu central que ta y tará remanáu les más de les veces por otres comunidaes autónomes que gocien anguaño, efeutivamente, de más puxu y autosuficiencia. D´esta miente Asturies, si yá va tiempu que furrula dafechu como colonia d´España, les tendencies autonomistes del Estáu facen que sía el país ástur una colonia, amás, d´otres comunidaes que mos instrumentalicen como reservoriu de mano d´obra cualificada, enerxía, vertedoriu, branéu, etc. En suma: Asturies vivie güei una alienación total. 

Soi d´una xeneración que foi viendo tou esi procesu programáu como con reló. Los asturianos d´otres dómines pudieron pasar tragos sin dubia peores que los del mio tiempu. Los mios güelos vivieron la Revolución y la Guerra. Llueu vieno la posguerra y el facismu. Cada tiempu tuvo lo suyo. Y hebio na hestoria años bien malos. Lo que yo soi a recordar como adultu, n´efeutu, foron tiempos materialmente meyores qu´aquellos yá mentaos, pero tiempos los míos d´un ablayu espantible de toes toes. De los años 80 ún guarda´l recuerdu d´una ñube gris-prieto espardiéndose per tol cielu d´Asturies. Delles foles de reconversiones industriales decretaes en Madril tuvieron al país embaxu una bota. Haber, hubo resistencia obrera. Ehí tán como semeya mental mía pa tola vida los neumáticos amburando metanes les cais y carreteres de Xixón y demás llugares d´Asturies. Dafechu, les barricaes inda aliquen a día de güei. Ye la llucha d´una especie n´estinción por mantener la dignidá: la especie del obreru asturianu defendiendo un mou de vida y un envís de clas que marcó pa la Hestoria un finxu. D´esos años 80 y 90 ún recuerda les furgonetes antidisturbios en filera énte´l semáforu de la Sindical asina como les que taben aparcaes en Begoña y que, d´esmenu, salíen d´ellí a carrenderes pa dar palos. O el camión aquelli que tuvo atravesáu, pémeque na cai Mariano Pola, quésiyo cuánto. Son semeyes de remebranza de lo qu´un día foi un país que, a traviés de la clas obrero, quixo aguantar. La so sencia demientres delles décades foi aguantar. 

Tamién hai otres semeyes menos grises, menos urbanes, onde yo güeyaba praos verdes asgaya, y paneres cargaes de panoyes d´oru. Los maizales al vientu yeren como mares. Los guah.es d´aldea diben engaramitaos nun carru –mecánicu o de gües- no cimero d´una melenona d´herba seco, allá a primeros de xunetu, canciando baxo´l sol y los sombreros de paya. Anguaño voi a l´aldea y yá nun veo guah.es dalos. El maíz esanició, y les vaques –ai, les vaques- cásique nun les veo. Estes bendites yá me paez que son más escases que los osos panda. Xusto cuando zarraben mines y fabriques, cásique yera un delitu daquella, años 80 y 90, tener una o dos vaques. Supe de paisaninos que lloraron como madalenes al ver qu´un decretu “europeísta”, ye decir, madrileñu-xacobín onde los haiga, vieno a quita-yos nun ya una fonte de perres o de proteínes lláctees, sinón un mou cultural de vida. Esos vieyinos despoxaos de les cuatro vaques collacies del so esistir foron la metáfora perfecha d´una Asturies derrotada. Avieyada, subsidiada, onde l´oru del maíz y el ganáu, el paisaxe mesmu de la infancia, too ensembre yá yera hestoria “pasada”. Un país nada autónomu, nel qu´un decretu emanáu de les más altes instancies burocrátiques ye quien a valtalu pa siempres, un simplayu decretu forastero y asesín, y que nada nun supo de vezos y lleis consuetudinaries, nada de tradición y rispetu al mou milenariu de vida. Un país malvendíu pel burócrata, el sindicalista progresista de los que namái pricuren progresar ellos, el políticu profesional, el cipayu iñorante y el sempiternu esguilador. 

Asina veo a Asturies va venticinco años polos menos. Como país derrotáu. Un país el de la mio mocedá con problemes, pero que gociaba daquella de la Institución de la Casería, tratando malapenes d´afitase nes nueves demandes que trayía la mecanización y la universalización de mercaos. Un país que, ensin dexar de ser rural y cuntar con un alma entá bien rural, tamién yera cabezaleru n´industria y en concenxa de clas. ¿Qué ye Asturies anguaño? La crisis que daquella ensin dulda había qu´iguar va un cuartu sieglu, sigue enforma, y sigue na psique coleutiva nuestra, principalmente por que nun dexaron que la iguáremos nós. Remanando, caciplando a más non poder nes coses de nueso, trataron a esti país como lo que de xuru yá yera entós y sigue siendo güei: una Colonia. Equí cualisquier babayu indocumentáu pue arreblagar pencima de más de mil años de tradición y endosanos unes cases suburbiales que recuerden davezu un barriu de Liverpool, nel meyor de los casos, o una cabila encaliada de la Costa del Sol o de Tánxer, nel peor d´ellos. Los maizales y praderes poblaes de ganao y maíz dieron pasu a la epidemia de los campos de Golf, pa los que va haber mester, el díi de mañana, les fesories revolucionaries de tou un pueblu solliviantáu n´armes, aperios de santu trabayu usaes d´una vez pa esaniciar esa peste foriata del too. Fesories qu´han alzase dalgún díi col envís de llibrase d´esa plaga esgonciando campos y devolviéndolos al ganao, a la pumarada y al güertu. Ye ablucante palpuñar cómo hai sitios d´Asturies onde la herba yá cuasi nun se ve. Ora porque ta to asfaltao, ora porque´l Golf y lo que nun ye Golf sinón mentalídá municipal y privada de golfista, curtien los tapinos “al ceru”, dando por supuestu qu´eso que les máquines curtien ye herba y non dalguna triba de productu sintéticu. L´esaniciu cultural o identitariu va de la man del esaniciu paisaxísticu, y ésti, al empar, vien arrecostináu pola estinción de la Casería como “unidá esencial” de la patria nuestra, la Institución que caltenía´l paisax dientro de les sos llendes ecolóxiques ya identitaries. 

Anguaño, paez que tol mundu quier ser “economicista”. Los de esquierdes lleen en Marx, bien de veces, como un determinista que reduz la totalidá social a una base económica que, más alló de ser namái qu´un “motor” de dellos cambios culturales y sociales, vien a encloyar, pela cueta, como nun furacu prietu, tolos demás elementos d´esa totalidá. Con ello, los reduccionistes de la esquierda vienen a coincidir curiosamente con la derecha neolliberal, que tamién toma como slogan esi de “¡la Economía, babayos, la Economía1”, esto ye, sigún ellos, qu´aquello no qu´hai que decatase ye namás nesa retafila d´indicadores econométricos y estadísticos qu´anguaño llamen “crecimientu” y “bienestar”. Vistes asina les coses, yá pue perdese l´idioma asturianu o yá esgonciase milenta horros, que´l paru va a baxar. Yá podemos renunciar a la “ocupación” efeutiva de la mayor parte del nuesu territoriu, si nesa descomaná Ciudá Astur que va a haber ente Xixón, Uviéu, y Avilés se faen polígonos, metrotrenes y “xacimientos d´empleu”, etc., etc. En suma: desarrollismu de la peor castra. Lo que Manuel Fraga llogró na Costa del Sol colos hoteles a pie de sable y les sueques en bikini, ye decir, la “Españolada”, t´aportando al Mar Cantábricu y al Pareísu Verde. N´Asturies tamos goberanos polos personaxes que fixeron rellumar la Españolada, interpretaos por Esteso y Pajares. Los fíos político-económicos de Fraga, por un igual a la Derecha o a la (Pseudo)Esquierda, tán metíéndonos la “Españolada” más monumental con cuarenta años de retrasu. Los “asesores” técnicos y los economistes de la FSA y la Universidá d´Uviéu, asina como los opinantes esternos que se paseen per La Granda o peles colunes de La Nueva España nun mos traen otro qu´Españolada y más Españolada. Lo que yá llamenten asgaya andaluces o llevantinos de bon xacíu, por cuenta de los estrozos irreversibles del desarrollismu de Fraga y de la Españolada, en tolo cincante al coste ecolóxicu y urbanísticu, pero sobremanera identitariu, a partir de los años 60, va lleganos a nós, xustamente cuando tolos palos a la nuesa identidá tán cayendo xuntos. Lo que nun va poder facer la represión llingüística y demás abusos de política cultural xacobina y museística, va consumalo el (sub)desarrollismu d´esta dómina. 

A quién voi engañar. Pa min esos indicadores econométricos y esa idea fixa y dogmática de “Crecimientu” ye puxarra. Tan mal me fiede esa basoria que yá cásique nun soi a lleer la mayor parte de los periódicos. Pa min, ser anti-capitalista, esto ye, revolucionariu, ye una manera de caltener la Tradición. Sí, sí la Tradición. Pues nun tolo tradicional ye malo, iñorante, atrasao, tercermundista, etc. Esi ye´l dogma, qué dogma, la falcatrúa de los progresistes d´esqueirda y de derecha. Hai nos vezos económicos y culturales de sobrovivencia d´un pueblu (y más d´un pueblu milenariu como´l d´Asturies) muncha más sabiduría, honestidá, xacíu éticu y prácticu, “saber vivir” en suma, y saber vivir en conformidá col mediu ambiente, qu´en toles planificaciones “desarrollistes” que los axentes del capitalismu tienen preparaos pa nós. Ello nun quier decir qu´haiga que volver a la edá de piedra nin a les fames y necesidaes d´otres dómines. Si la Casería tradicional asturiana nun foi quien a garantizar alimentu y bienestar a una población asturiano siempre creciente, ello nun foi debido a pilancos intrínsecos de la so institución, ni a la famosa “probitú” del suelu astur. La Institución per se yera bona de sobra pa garantizar la sobrovivencia de la unidá familiar siempre qu´otros factores “superestructurales” hubiesen quedao superaos nel so debíu mometu hestóricu. Ente ellos, el réxime de propiedá de la tierra tan inxustu qu´hebio cásique fasta 1950, más o menos. Pero una sólida rede de granxeros produciendo y viviendo ecolóxicamente, faciendo d´auténticos “xestores de la ñaturaleza y el paisaxe” astur, asina como caltenedores de los nuestros vezos y riqueces, sedría ensin dulda la meyor politica cultural (nel sen grande de la parola “Cultura”) a combinar con un texíu de pequeñes industries autóctones, llimpies, granibles, mayormente conectaes col campu y les condiciones climátiques y autóctones del país, amestando sabiamente la tecnoloxía más nuevo col rispetu al “saber facer”de los nuesos güelos. Una productividá con enclín d´autosuficiencia nacional –garantía pal ecoloxismu de verdá- y con pricuru d´evitar d´una vez la emigración servil de los nuestros. Tolo contrario de la Españolada que tán creando pa nós.

Cursu d´Asturianu pa Xente Pijo (o "Guapo").

"L´Asturianu va salvase cuando la xente guapa de Xixón o Uviéu lo fale" (B. Atxaga sigún Xuan Bello)

"La Hestoria de la Humanidá ye la hestoria de la llucha de clases" (Carlos Marx).  

Hai una zuna n´Asturies bien grande. Yá cásique ye un tópicu. El facenos de menos. Ye verdá que la zuna de facenos de menos los asturianos tien como compensación psicolóxica´l famosu grandonismu. Cuido que foi Xuan Xosé Sánchez ún de los que meyor vieron nel País esa zuna xeneralizada nuestra. Ye´l de so un diagnósticu puramente psicolóxicu, namás, al qu´hai mester apurrir xides y motivos hestóricos ya económicos de mayor calume p´avanzar con él. Pero con too, esti señor dio nel clavu n´esti asuntu, o polo menos dio un puntu d´arrinque. Pero hai que siguir pescudando n´ello, dir de la superficie de los fenómenos dica lo fondero del problema. El problema nuestru. Diz don Xuan Xosé en dellos ensayos que´l grandonismu asturianu (y falo de memoria ensin remitime a testos dalos en concreto) ye no más fondero un complexu d´inferioridá. Freudianamente ye cenciello deducir baxo la llei esa de “dime de lo que presumes, que yo te voi dicir de lo que cadeces”. Pura llei de les compensaciones psicolóxiques. Si los asturianos nun cadecieren d´un complexu coleutivo bien gordu, nun se podría desplicar entós el maltratu que-y facen –que-y facemos- a la llingua nacional nuestra. Toa la so situación vergoñosa a nivel oficial y público, el fechu de que la escuendamos sigún con qué castra de xente falamos, especialmente colos más ricos, los más cultos, colos ¡foriatos! ... que la tapezamos en toa una bultable serie de coxuntures, en fin, que guardamos la llingua (“represión” o meyor “autorrepresión”) y con ello, contribuyimos a la so muerte y al nuesu afondamientu nel complexu nacional de ser asturianos y como talos, del complexu de ser dafechu diferentes. Pero claro. Too esto son xeneralizaciones. Bien de xente foi camudando n´actitúes sobre la so identidá y sobre la so llingua. Hai mester más análisis serios sobre lo recién que foi esi procesu d´acomplexamientu coleutivo que sofrimos los asturianos. Ablucante diba ser pescanciar que nun siempres foi asina. Dalgunos de nós, de mediana edá, si miramos p´atrás na hestoria, quiciás podramos albidrar que llega esi procesu fasta les dómines de los güelos. Muncho más atrás non. Un fechu clave foi l´Ochobre Asturianu. Sí, la Revolución de 1934. L´ablucante y, por qué non, “reprimida” (falando de represión nel sen psciolóxicu) Revolución Roxa que vieno a ser la más grande Revolución Roxa d´Europa Occidental nel sieglu XX. Equí ye onde don Xuan Xosé y too eso que, envede ser nacionalismu arrechu, se llamó pela cueta “asturianismu”, esvariaron pamidea fasta cayer de brucies. Y ye que l´Ochobre de 1934 ta dientro de la concenxa nacional o coleutiva asturiana, anque seya de forma reprimida, cásique subconsciente. La represión que cadeció´l país nuestru nun sólo foi represión basada en tropes africanes, guardies civiles, cuelmes y tortures hasta la muerte. Foi una represión del mesmu recuerdu.  ¿Cuántos  asturianos de media edá nun tuvieron dalgún güelu roxu?  Yera mester vivir n´ambientes mui concretos daquella –dientro de la borbolla d´una burguesía de lo más conservadora -pa nun participar d´esi fechu coleutivu del pueblu asturianu  -mayormente obreru y campesín. Nun quiero idealizar el nuesu Ochobre, pero teo que tresmitir la sensación de munchos otros asturianos como yo, de que la represión estatal de la Revolución Asturiana tuvo que vivise talmente como una “invasión”. Una invasión que se repitió en 1937 y qu´achapló enforma la nuesa identidá, la nuesa llingua, l´autoestima... Falando va pocu con unos amigos, pude palpuñar qu´esti talantamientu nun yera esclusivu míu. Hai otra xente que lo piensa. Lo qu´asocede ye que, pa poder facer la terapia coleutiva oportuna que mos llibere de la represión mental, entra en xuegu la otra triba de represión, de la que n´Asturies sabemos muncho. La represión ideolóxica a cargu de l´Asturies Oficial, Provincia española y Principáu Borbónicu. En dos pallabres: Franco y la so España Africana exerció sobre nós una brutal Represión militar, cásique física. Depués, na posguerra y na dómina Borbónica, sucesora ñatural del franquismu, vieno la represión mental: “Neñu, nun fales d´eso, que al güelu nun-y presta”. El güelu callaba, y depués, la orde diba dándose más y más en castellán; “No hables de eso, te digo”. 

Llueu, depués de los años escuros, vieno don Xuan Xosé, Conceyu Bable, y too eso. Honores pal que los merez. Honores pal que fai un diccionariu, escribe milenta obres nel idioma del país, pal que pescuda la tradición y munches coses más. Pero esvariar fasta cayer de brucies col tema del 34, más nun pudo esvariar esti señor. Avergoñase del 34, dicir que foi un embarcazu onde la propia esquierda asturiana quemó cásique sin torna atrás los nuestros preseos d´un rexonalismu consecuente pa tar al menos al altor de la vecina Galicia... too eso ye un erru fundamental pal “asturianismu moderáu” que representen delles formaciones, por cierto, nun solo´l PAS. L´asturianismu moderáu foi a menos precisamente per aciu del so mesmu moderantismu qu´arreniega d´una cumal de la Hestoria del País. Dicir que foi una pena la testonería “internacionalista” de los nuesos trabayadores n´armes que frañó pa siempres la posibilidá d´un estatutu rexonal como´l gallegu, ye facer hestoria ficción y contribuyir con falsa concenxa a la falsedá espardía polos vencedores. Nun toi glorificando´l 34, güeyu, qu´esi nun ye´l tema d´estes llínees. Lo que toi diciendo ye si un estatutu rexonalista como´l de Gendín (futuru facista) en casu de salir p´alantre antes del 18 de xunetu de 1936 diba a ser un finxu mayor p´Asturies que l´esporpolle d´un movimientu revolucionariu tan específicamente asturianu comu´l 34. Hestoria ficción, señores del asturianismu moderáu. Hestoria ficción. Al arrenunciar a la nuesa Revolución Roxa vustedes tan mutilando una cumal inescaecible de la nuesa identidá coleutiva, y eso ye siguir na mesma llínea represiva (a nivel psicolóxico y a nivel ideolóxico) del franquismo.