carlosXblanco

Cuando Asturies nun yera España.

Munches vegaes se tien dicho qu´a los ástures nos presta tirar piedres escontra´l teyáu de nuesu. Si ye verdá que fomos, antañu, ansí de babayos, ye tiempu de camudanza. Pa compensar esi enclín, la mio migayina tien de valir daqué. Tampocu soi amigu de los grandonismos, y yá lo sabéis los que de mis escritos tenís conocimientu. Los grandonismos, cuando seyan mentira, nun son pegoyos pa construyir Nación dala. En cambeu, pa un pueblu como´l nuestru, que pasa por momentos d´autoestima tan baxa, tolo que seya afondar nel pasáu y saber, con testimonios a la man, lo bono que formaba parte de la nuesa sencia, hai que lo recordar.

Teo una idega dando vueltes al caletre cuantayá. Ye un talantamientu sobre´l famosu Sieglu d´Oru Español. Sieglu de la Decadencia Española onde lu haiga. Sieglu de los pícaros, de los lladruepos, de los bandoleros más sangrinos. España ensembre yera un Reinu de lladrones y criminales. Pero esi Principadín, ai, yera una esceición bultable. Asturies nun yera España. Nun sé si lleísteis esi llibrín tan prestosu de Luciano Castañón sobre los asturianos vistos polos de fuera (pémeque na editorial Ayalga, de Salinas, de los años 70 finales, y escribo de memoria). Ellí recoyíase lo qu´escribía nun sé si un inglés o francés: el testimoniu de qu´un estranxeru podia cruciar el Principáu d´un estremu a otru, ensin mieu a que lu robaren. Tolo contrario a lo qu´asocedía nos reinos vecinos a Asturies. España y bien de los sos reinos tenía fama de país de lladruepos. Asturies yera esceición... Yá toi viendo a más d´ún decir “lo de siempre, a vivir de glories pasaes...” “Nueves versiones del Cuadonguismu y del Grandonismu...” Pero´l casu ye que ensin dir al Sieglu d´Oru, namás va 20 años, yo recuerdo que les coses yeren entá mui pocu “españoles”. En Xixón, yo baxaba a a la cai a por pan y dexaba la puerte abierta. Nun tenía mieu dalu a qu´entraren na mio casa a robar. En cambeu, diba de Payares p´abaxu y había rexes nes cases auquiera onde dibes. Yo nun quiero esprecetar lo de fuera pa ponderar les coses de nueso, pero´l casu ye que les estremaúres siempres me paecieron mui bultables. Agora, por supuestu, tamos volviéndonos más españoles, inclusu a pasos axigantaos, y la puerte´l pisu hai que la tener bien pesllada.

Nun voi cansar de glayar qu´Asturies ye anguaño una puta Colonia tercermundista del Estáu Español. La metá del País cásique vive alrodiu de la Bahía xixonesa, especialmente si nos decatamos que´l Muselón va ser l´antoxana marítima d´una fastera central mui densa de polación, la yá talantada “Ciudá Astur”. El Muselón va ser un enorme parque enerxéticu a les puertes de la mayor concentración urbano del País. Un País que nun apara quemar carbón y enllenar l´atmósfera de porcancia, faciendo de los nuesos cielos los peores del Estáu. Un País que nun consume nin la metada de la enerxía que produz, y bona parte de lo que produz, ensin ellaboración intermedia, sirve pal desendolcu d´otres comunidaes deficitaries d´enerxía o que nagüen por enerxía barato (Madril, País Vascu). Un País que ta, poro, al serviciu del desarrollu económicu ayenu pero que, si mirara un pocu pa consigo, vería que nun produz más que podrén nos sos cielos y podrén nel so territoriu. Dixo un poeta “Asturies, tas n´ayén”. N´ayén y en Podrén. Asturies ye anguañu el vertedoriu d´España. Pa eso mos quieren.

Abertzales pero españolones (y viceversa)

Descubrí l´otru díi qu´estos dos estremos nun son incompatibles. Caben na mesma empanada de delles cabeces y uebs.

Teo pa min que la esquierda estatal, inclusu la esquierda que ta a la esquierda d´IU, tien una empanada monumental, o lo que vien a ser peor, una esquizofrenia perfonda.

Nun sé si la mio esperiencia, puramente presonal y muncho “virtual”, pue valir pa esclariar esos síntomes que detecto, pero vamos a ello. La cierto ye que, lleendo delles uebs d´esa esquierda a la esquierda pue sacase una imaxe esquizofrénica de dalgunos que se nomen a sigo mesmos “revolucionarios”. Yo noté va poco que dalguna ueb “roxa” ye más españolona qu´un toreru con tricorniu y, pa más guasa, aveza disimulalo con un carropotáu d´articulos “abertzales” sobre´l conflictu vascu. Un amigu míu comentó, cuido que con bon xacíu, que ye como si los ex-comunistones tovieren yá mui interiorizáu´l Mapa de les Autonomíes tal y como surdió de la mal nomada “Transición”, como cosa intanxible, y que´l Reinu d´España tien yá la cuota llimitada de Tres Naciones “hestóriques” (col paquete de nacionalistes electos incluyíos), y llueu ta esa cosa amorfa del “Estáu” o “Restu” onde tien que tar incluyía Asturies por ñarices. Ye una esquierda a la que se-y llena la boca col radicalismu que, al paecer, yos-llena de gloria heroica al facer “frente común” xunto col independentismu vascu, pero que  pal “Restu” namás mos queden les “lluches obreres” (engarradielles socioeconómiques ensin sencia “identitaria”). Toi fartu. Yo nun soi españolón nin tampocu abertzale: soi asturianu (y con eso teo bastante, como diz la copla), y teo que decir que me paez cafiante esa esquizofrenia y ciudo qu´amosa -nel fondu- un españolismu implícitu iñorante, y cuido tamién que nun ye tan estremáu del nacionalismu español del rodiellu PSOE-PP-IX.

Anguañu, Asturies nun pinta un res nel Estáu. Eso nun ye un descubrimientu, ye una verdá va tiempu palpuñable. Nun cuenta nes decisiones fundamentales del gobiernu de Madril, nun cuenta un res nos cambalaches ente lo central y los tres gobiernos nacionalistes reconocíos como “hestóricos” (vascu, catalán, gallegu), ná de ná. Lo qu´a modu voi descubriendo ye que tampocu pinta un res pa la esquierda a escala estatal, y repito que por esquierda nun me refiero a la falsa esquierda del PSOE ya IU, alrodiu de la cuala yá se me conocen les míes opiniones, sinón a una parte de lo que quier amosase como esquierda “revolucionaria”, “alternativa”, “marxista dafechu”... Esa que nun algama munchos votos a escala estatal pero ta activa nes uebs, nos movimientos de contestación callexeros o llaborales, etc. ¿Qué ye lo que cunta Asturies pa ella, digo, pa esa esquierda real de Payares p´abaxu?

La ordenación del Territoriu ye un estrumentu ideolóxicu. Cualisquier inventu de l´alministración, na midida na qu´ella esiste col envís de abrir calces a l´acumulación del Capital curiando al empar de nun tapecer dellos calces más, (aquellos que tamién son bonos pa la dicha Acumulación) ye ideoloxía y nada más qu´ideoloxía. Cuando emprimó a ponese de moda l´ecoloxismu, a lo primero n´Europa, depués en Catalunya, darreú nesi sacu qu´ellí nomen “El Restu” (y el Principáu ye un Restu perende), pasó satamente lo mesmo. El radicalismu de les primeres movilizaciones foi camudando nun sorteu de puestinos onde xente con formación en bioloxía, química, etc. , pudo pañar un despachín, un chiringu y un platu garbanzos. Los “informes demoledores”, anque esisten entá (y bien útiles que son pa la contestación social) camudaron en gran midida en “evaluaciones d´impactu mediuambiental”, feches a escote peles empreses que quieren emporcar, y siguir emporcando más si cabe, pero eso sí, colos papeles en riegla.

El Circu de Búfalo Bill.

Ye un vezu pensar, cásique ensin discutiniu dalu, que la postración d´Asturies ye, no principal, un problema nuestru, que nun ta planificao dende fuera. Como toles coses complicaes, la verdá ye que si y non. Pa un asturianu con un mínimu de patriotismu, ye de vergoña un ésitu electorial como´l del PSOE asturianu na cabera convocatoria a urnes. Van metenos la regasificaora, les llinees d´alta tensión, van tener a un pueblu enteru como rehén y como reservoriu indíxena pa la esportación d´enerxía, van siguir tratando el País como una Colonia, y ¡hala!, a ¡da-yos el votu! La deducción más cenciella ye la d´una castra de masoquismu, onde los asturianos vamos más allá de dar la otra mexella cuando mos cai una fostia (al estilu de Cristu) sinón qu´amás, pondríamos otres partes del cuerpu, culu incluyíu, pal bien d´España, y en xeneral, pal bien de los de fuera. Pero ye qu´esa descripción, que non esplicación, a min nun me comence. Q´un individuu seya masoquista pueo entendelo, pero qu´un pueblu ensembre mayoritariamente lo seya, pesie a años y décades d´humillación, xenocidiu sele y sordu y esplotación colonial, ye cosa que nun pueo aceptar.

Espulsar la foroña de Casa.

Voi dedicar unos minutinos a talantar sobre la Casa asturiana tradicional. La probe, merezlo. Yá va sufriendo ataques asgaya. Ye hora de que dalquién la defienda. Una de les víes d´agresión ye la ordenación del territoriu talo y como se vien faciendo nos caberos años. ¿Entiéndese que mos enllenaren d´adosaos el País? Pero ¿qué piensen, qu´Asturies nun tien los sos propios vezos contructivos? Tamién tenemos los arquitectos. Los arquitectos, sacantes esceiciones dignes, como siempre, avecen ser los más xabaces enemigos de la identidá ástur. Clangorien siempre contra les midíes restrictives de tipoloxía constructiva, pero ¿cuála ye la so alternativa? Llévase muncho lo de la “orixinalidá”, lo de l´”anovación”, pero de xuru que les fechoríes de Calatrava van tardar bien de tiempu n´esborriase. Una ciudá coquetona, elegante y caltenedora d´un cascu hetóricu guapu gupau, Uviéu, va camín de ser l´arrabalde tipu dormitoriu como los que se perpetren na redolada de Madril, talmente. Tovía entren-y ganes a ún de llarimar al ver les “coneyeres” del Rinconín de Xixón, una filera de nichos adosaos cásique bañaos pela mar, ellí, énte la preciosa estatua de la “Má del Emigrante”, que dalgunos playos nomamos –con ciñu- “La Muyerona”. ¿Quién dio permisu a esi crime estéticu de Les “Coneyeres”? Y lo de llantar cúbiques construiciones tresparentes –“vanguardia” llamen a eses tumbes de formigón- metanes un paisaxe de guapes quintanes, ¿cómo ye que nun foi, nun ye, delitu...?

Muerre la llingua, dicen perende. Tamién muerre la Casería, la Quintana tradicional ástur. La cosa, claro ta, nun ye d´orde estéticu namái. Ye d´orde productivu. Hai granxes productives nel País que más bien paecen naves industriales. Nun sé por qué la rentabilidá productiva tien que s´engarrar col mantenimientu d´una tradición. L´horru y la panera foron siempre reutilizables funcionalmente, esa foi la clave del so ésitu y difusión. Otres istalaciones podríen afechiscase ensin ruemper el paisaxe. Los asturianos debíemos evitar los erros d´otres fasteres, qu´hipotecaron la so mesma personalidá y calidá de vida pol enfotu de ser modernos. Caro Baroja ablucaba colos castellanos n´esto. Dicía l´antropológu vascu que nun conocía pueblu tan fríngole énte les novedaes de la Modernidá como´l de Castía, dimpuestu siempres a dexase seducir por ella, pero al empar tan testoneramente arcaicu y tradicional. Yo tamién abluco na Meseta. Corripios d´adobe, cases que nun sedríen bones nin pa los bichos, sirven de vivienda pa la xente, al delláu d´unos celleros y naves agrícoles ultramodernes descomanáes, amás de coches tootarrenos de lluxo aparcaos nel corral. Esa mentalidá monstruosa nun la quixera yo p´Asturies. Si dalgo tenía carauterizao al País foi la cenciella ya industriosa personalidá de los sos habitantes.

Pero, claro, la cosa camudó. Cuido que Gregorio Morán, nuna entrevista que-y lleí va pocu, tuvo una bona intuición. Dicía esti señor qu´Asturies foi de siempre asina: un País de xente simple nel meyor sen de la parola. Esa simplicidá del humilde trabayaor del campu, llimpiu y honráu, arguyosu al empar de la so quintana, braeru reinu en miniatura, trabayaor y rei d´una institución ella mesma que trescendía la singularidá presonal del titular de la mesma... La Casería, más qu´una granxa productiva y más qu´una residencia autárquica de tres xeneraciones d´una familia, yera un vehículu de tresmisión de la cultura ástur nel tiempu. La cultura del trabayu en pro de lo propio (nel sen ampliu, non lliberal, de lo propio familiar, de lo propio vecinal, de lo propio de la xigantesca andecha qu´un díi foi Asturies), por fuercia yera incompatible col barroquismu que nos foi llegando dende´l Puertu Payares p´abaxu. L´escesu estéticu y barroquizante del Sur, qu´anguaño güeyamos con horror al recebir imáxenes televisives de la Selmana Santa o la Feria d´Abril n´España, ye l´antipoda perfecha de lo asturiano tradicional. La intuición de Gregorio Morán, seique acertada, foi decir que l´enclín coleutivu de los asturianos emprimó a camudar cola victoria de Franco na nomada “Guerra Civil”. O seya, que ye un fenómeno sociolóxicu tovía recién y que guarda rellación coles coordenaes polítiques estrañes (una invasión) y de sometimientu d´una manera de ser nacional d´Asturies. Claro que Morán nun lo diz satamente asina, pero ye cenciello facer un reanalís en clave nacional de la idega suya. Fasta´l 34, o fasta la “Guerra Civil” (pa nós, meyor nomala “Segunda Invasión” afro-española), yéramos esi pueblu industriosu, mui igualitariu pela parte d´abaxu, con membrudos llazos de solidaridá, llazos que dende l´aldea foi fácile tresllantar al pobláu y arrabalde obreru... Pero cola victoria del Caudiellu, dende Uviéu, l´Uvíeu “Azul” espardióse en ondes crecientes un sentir falsu, emportáu, artificiosu a cargu de los vencedores-represores. Éstos foron un ñeru de falanxistes, catolicones de derecha, cures, burguesía reaccionaria, funcionarios de secano qu´aportaron equí p´aidar na represión y neocolonización... esi ñeru odiaba perfondamente la braera manera de ser de los asturianos. Esprecetaron fasta la médula la manera tradicional –lo que ye decir popular- del nuestru pueblu, y pricuraron na manera de lo posible facer d´Uviéu, y con él del País, un apéndiz de Castiella (la Castía del brazu n´altu) encostráu nun corazón verde – de cuerpu- y roxu- d´espíritu. D´ehí vendrá muncho del “grandonismu” famosu de los asturianos, del “auto-odiu” pareyu y complementariu d´aquelli. D´ehí, cabezaleramente.

Si tamos dexando de ser los asturianos, asturianos dafechu, eso ye d´un tiempu curtio p´acó. De cuando les invasiones afro-hispanes (valga la redundancia) de Franco, y por eso yo soi un optimista testoneru. Anden perehí cuntando votos atropaos polos dixebraos –ente sí- nacionaliegos ástures y dicen, ¡qué pocos! Pero nun emporta, la cosa nacional llatente ta ehí. L´escaezu del nuestru braeru enclín nun pue durar siempre. Hai ondes llargues de la hestoria que´l condergáu fíu de puta que foi Franco nun pudo esborriar. La hestoria y la antropoloxía tamién ye testonera. Igual qu´en dellos sones, en dellos bailles, en dellos rostros y vezos ún pue ver entovía a los celtes ástures qu´un díi fomos, tamién ye fatible ver nel nuesu paisax, nel nuesu pueblu, nel nuestru rostru coleutivu, lo que ye una Nación, dalgo milenario que munchos urbanites y descastraos nun saben ver. Un pueblu nórdicu destináu ensin torga dala a espulsar tanta foroña como nos metieron.

Al sur de la Cordalera empicipia España, una meseta de gran anchor y pocu poblada, sacantes delles ciudaes capitalines. Depués tán les prollongaciones de Castía, el Llevante, ye decir, vieyos reinos d´Aragón enforma castellanizaos sacantes Catalunya, y d´otra banda, Andalocía, que no que caltién d´Europa ye precisamente´l so enclín de prollongación de Castía. Pa nós, l´alteridá etnolóxica más inmediata, popularmente más sintía y palpuñable dende va sieglos, ye la parda estepa castellana: argutu contraste col verdor y orografía esuberantes del País Asturianu.

Un filósofu que nunca foi, como talu filósofu, mui aquello, Ortega y Gasset, trató delles vegaes sobre Asturies, anque trató d´ella más como periodista y como observador puramente empíricu que comu home de ciencia y sabencia. Nun sé ónde, pos yá nun m´alcuerdo, escribió alrodiu del conceutu de “pueblu” castellanu, como abellugu énte un campu ensin misericordia pa col humanu (“seyes meses d´hibiernu, y seyes d´ifiernu”) a onde´l llabriegu va a trabayar, nunca a esfrutar, talo como güei l´obreru va a la fábrica o un mineru baxa a la mina, non por gustu, non porque seyan sitios guapos. Váse a cumplir col castigu bíblicu: trabayar. El campesín asturianu tien una rellación bien distinta col campu. Por supuestu nél tamién hai sofrencia, mayamientu, dolor del cuerpu y (hebio) mieu a la fame munches veces. Tamién nel nuesu País el campu ye ifiernu del trabayu, pero non solo, non tol tiempu. El campu ye espaciu d´habitancia, d´esfrute, onde ún va a merendar, char parrafaes, a cortexar, a tirase pelos praos. Anantes qu´España descubriera´l turismu de curtio alcance, los asturianos yá lo llevábemos faciendo va sieglos nun radiu de dellos kilómetros facederos a pie, tomando comu centru la propia quintana. El campu ástur siempres foi dieldu de vida social y esfrute coleutivu, foi ñaturaleza domesticada magar la Edá del Fierro pamidea. Ortega dicíalo con otres paroles, pero la idega yera esa. Y esi “conceutu de vida” ta implícitu na mesma pauta d´habitancia del territoriu: dispersu n´Asturies (sacantes l´alta montaña, por razones obvies de supervivencia), y dispersu tamién en xeneral nel Norte peninsular. Tolo contrario, el poblamientu ye mui apetiguñao na Meseta castellana.

Poblamientu abiertu al campu, a la ñatura, nel casu asturianu, y d´espaldes al campu, a la fosca ñatura, nel casu mesetariu. Xuan Xosé Sánchez, camentando a Ortega, tamién escribió una fras qu´a min me paeció puesta con gran aceñu, dalgo asina como “Y n´Asturies tamién l´agru ye ñaturaleza” (escribo de memoria, otra vuelta, espero que nun m´engañe l´inconciente). Ye la pura verdá. Na Meseta hai “campu”, pero mui poca “ñaturaleza”. Véi esos campos de secano, cásique muertos gran parte del añu, nada de verde, ni una casa, biodiversidá vexetal reducía al mínimu per aciu de la violenta aición del home...

Too esto tien que ver cola forma de la casa campesina, que ye como decir, la casa “nacional”, onde hai un códigu de símbolos que lo espresa too. Quiénes son los habitantes, qué rellaciones (productives, termodinámiques, polítiques) caltienen cola redolada, qué quieren de la vida, d´áu vienen, qué comen... Otru filósofu –al que Ortega “saqueó”, pémeque, en forma pa sacar d´él idegues varies- el xermanu Ostwald Spengler, dixo otra cosa mui seria: L´aldeanu ye, de xuru, un home eternu, como una planta llantada na tierra, y la so másima espresión ta na casa de so.

La casa asturiana, la tradicional casería, t´abierta al campu, y ye l´epicentru de delles actividaes productives: güertos, praderes, brañes, biesques, montes. Nun ye emportante por si mesma, sinón como núcliu d´habitancia ente otres construiciones tan emportantes o más qu´ella: horru, panera, corte, etc. La familia entera, y non solo l´home (non solo´l varón, el machu proveedor de les sociedaes patriarcales) sinón tolos miembros de la unidá familiar, entren y salen, entren y salen ensin aparar col envís de facer milenta actividaes onde nun hai muncha distinción ente actividaes directamente granibles, d´una banda, y actividaes doméstiques, d´otra. Sí la hai, per aciu d´un patriarcáu que tamién penetró desgraciadamente n´Asturies, pero muncho más esvanecía qu´en Castía, el Sur o el Mediterrániu, patries del patriarcalismu más bederre.

Agora, analicemos la casa campesina mesetaria: separtada del campu, apegitiñada con otres y a la solombra la Ilesia. Sometía a un gran control social, “urbanu”, anque falemos de pueblos pequeños, de pocos cientos d´habitantes. Zarrada en torno a un patiu. La cultura del patiu tien perfondes resonancies mediterranies. Asina yera la casa “clásica” grecorromana, pero tamién l´afro-semítica. Nun ha de cayer embaxu que´l Mediterrániu nun ye solo un charcu onde apielguen les “Antigúedaes” grecorromanes, sinón les d´otres cultures que col tiempu amestaron con elles, les afro-semítiques, que truxeron tamien esa cultura “ultra-urbana” de pueblinos apetiguñaos, de cases zarraes con patiu internu, con fuerte estremancia ente funciones varoniles y femenines. La “casa” interior, na sociedá tradicional, aveza ser más femenina, per aciu del perespardíu patriarcáu (llimpieza interior, cocina, curiáu de vieyos y bebés, etc.). Pero la mio esperiencia ye que la casa “interior” ye más desaxeradamente un feudu femeninu al sur de Payares, seique como compensación del desplazamientu xabaz que sofrió la muyer baxo´l patriarcáu meditarrániu, ye decir, tantu´l grecorromanu comu l´afrosemíticu. Al cayer la muyer n´estes sociedaes na condición d´esclava del varón, o cuasisierva, al ser arrequexada de les actividaes “d´homes” nel campu, la guerra, el comerciu, la muyer hebio de guardase ente cuatro parés, baxo un techu y baxo la celosa mirada del machu dominante. Esa herencia que, entá, tien resclavos n´España, ye inalmisible n´Asturies. Esa mentalidá que dalgunos nel Norte consideramos “mora”, ye más propiamente (xenéricamente) afro-semítica. Los ocho sieglos de dominación musulmana sobre la Península nun afectaron un res a Asturies, y poro, les herencies mediterránies de les que los “moros” yeren al empar heriedos (fenicies, grecorromanes, xudíes, beréberes) a nós nun nos tocaron un res. Seique, dientro de los pueblos nórdicos d´Iberia, seyamos los ástures los menos influyíos por eses estructures sureñes. Más contautu y dominación sureña hebio pa colos vascones, a traviés del reinu moru de Pamplona, y colos galaicos, muncho más romanizaos y con mayor presencia “mora” (sobre too beréber) fasta que foi recuperada Galiza pa la Occidentalidá gracies a la so conquista por parte del Reinu Asturianu.

La casería asturiana espeya de xuru una sociedá más igualitaria, onde la muyer yera emportante ya inclusu tresmisora –nos vieyos tiempos- de dominiu y llinaxe, de lo qu´hai testimonios nos primeros tiempos del Reinu Asturianu. La so estructura yera indoxermánica cientu por cientu, pero más averada a la familia de los pueblos celtes qu´a la de los xermanos, pos estos amuésense  con una estructura pémeque más patriarcal que nel primer casu. El matriarcáu llatente, pesie a tolos intentos de la romanización y del cleru cristianu, yera bien palpuñable nes sociedaes campesines nuestres, les más matriarcales escurque de tola Península. La rellación ente un mini-reinu, como yera la Casería –espoxigada yá n´Alta Edá Media- abiertu al entornu, autárquicu y non depredaor, sedría un guapu tema pa pescudar n´Antropoloxía del Pueblu Ástur, sinón fuera que la nuesa Universidá “Rexonal” ta remanada por tecnócrates que nun son a faer la “O” con un cañutu, y por españoliegos amantes del mundu “meditarrániu”, qu´iñoren qu´esti ye pa nós un mundu impuestu.

Toi alcordándome, otra vuelta, d´un camentamientu de Caro Baroja, al respective de la subordinación y secuestru “más al estilu moru” de la muyer de pueblu castellana en comparanza cola del norte. Falaba esti gran antropólogu de cómo desplicar el llabor tan de filigrana que les castellanes facíen colos bordaos, por exemplu, un llabor inútil, empobináu namái qu´a la ostentación y que suponía pa la muyer hores y hores de tar sentaes baxo techu, ensin otra cosa que facer namás que dale que te pego coles aguyes o los palitroques esos de los bordaos... ¿Nunca nun vistis los vestíos tan barrocos esos de los “charros” de la parte Salamanca? Que los fixera una muyer d´aldea asturiana sedría inconcebible. Esta tenía muncho más que facer, aidando al home col ganáu, trabayando nel güertu, yendo a por lleña, etc., amás del llabor supuestamente “específu” femenín de la casa. Por necesidá, la Cultura Campesina Nórdica tendía a la simplicidá, a la elegancia de lo práctico y a lo funcional. Asina son tovía los pueblos nórdicos y centroeuropeos polo xeneral, a los que nun se-yos impunxo tantu la ciltura oficial sureña como a nós. Si tamos perdiendo eso anguaño, cola urbanización y la última fola d´españolización, ye otru cantar. El casu ye que, sacantes un machismu xenéricu mui espardíu per tola Península, la Casa tradicional “hermanaba” en forma a los dos sexos, a los dos socios que formaben un matrimoniu, y hebia una mayor apertura espacial tantu como de xéneru no que cincaba a les tarees del díi a díi, en contraste col modelu afro-semíticu, ye decir, español.

Nórdicos, atlánticos.

Espublicé la idega de qu´Asturies ye una nación atlántica, anantes qu´otra cosa, y fícelo emburriáu por un pruyimientu multillateral. De mano. el conceutu de “nación atlántica” quier ser adréi polémicu (de polemos, llucha, griesca). Trátase d´un conceutu dialécticu que s´alza énte otru pareyu y contrariu, el de “civilización mediterránia”. Tala construición dialéctica, como la que yo propongo, ye sin dubia peculiar de la Península Ibérica, un apéndiz occidental estremu de la Gran Eurasia. La Península Ibérica tien dos mares, y esi datu xeográficu condicionó dende la prehistoria dos moos de vida davezu incompatibles. Un fechu xeográficu puru, quiciás, nun tenía por qué condicionar desendolcos culturales o civilizatorios tan estremaos, el nórdicu de nuesu y el meditarrániu. Pa nós, fiyos d´Asturies, sí que mos condicionó desque hai noticies del nuesu ethnos.

De los ástures supo´l mundu “civilizáu” (mediterrániu) cuando Roma entró nuna Península que quixo facer suya, convertila en Provincia, esto ye, tierra vencida. Xente vencío, Tierra vencío. En toa empresa de conquista, los romanos alcontraron “bárbaros” esto ye, alteridá. Agora bien, l´alteridá de les xentes del Norte peninsular yera descomaná. Yá yera alteridá bastante lluchar colos pueblos célticos qu´había na Meseta Ibérica y nes Galies. Pero ye que les tribus cantábriques de les que nós venimos –ástures y cántabros, cabezaleramente- yeren más que alteridá céltica en xeneral, la gran alteridá occidental pa tola civilización clásica. Yera incompatibilidá estructural total. Esa incompatibilidá estructural d´Asturia hubo dase col romanu, col godu, col moru, etc. [desenrollé esti conceutu en dos artículos escritos pa Infoasturies.net: “Incompatibilidá Estructural ente Asturies y España”, I y II, y perdón pol autobombu].

Siempres cuidé qu´Asturies foi –y ye entovía en bon gráu- una nación celta, y d´ello hai abondosa información toponómica, etimolóxica, arqueolóxica, etnolóxica. Denguna d´eses apasionantes disciplines ye, por desgracia, la de mío. Pero sé que ñegar eses prebes del nuesu celtismu ye un fatura de les grandes. Ye´l tipu de fatura qu´aveza amosar la Universidá cuando afuxe de paroles “tabú”, y tabú ye falar güei del celtismu n´Asturies en dellos ámbetos de l´arqueoloxía oficial. Fálase del “norte pre-romanu”. Fálase de “cultura castreña”. Fálase d´”indíxenes”, y asina, pero falar de los ástures (y cántabros, quiciás un subgrupu d´aquellos) célticos ye como una herexía pa dellos académicos. La rocea hai que la pescudar. Yá escribí sobro l´odiu al celtismu, pero ye qu´esi tema ye de lo más complexo y nun se despacha en cuatro llinees. Oficialmente, l´Estáu d´España definese pel mundu alantre comu “país mediterrániu”. Esto ye asina dende bien de tiempu. L´ultimu finxu de la “Españolada” vieno de la man de Fraga y el puxu del turismu de Sol y Sable nel Llevante del franquismu serondu. La españolada cinematográfica y copletera espardió´l monopoliu cultural del flamenquismu xusto n´esta mesma dómina, años 60 del pasáu sieglu, pero tien raigaños románticos, de cuando España como Reinu quixo camudar (albortándose al empar n´ello) en Nación, y Madril –poro- tresformó su caris de pueblón manchegu, como recordó J.C. Loredo va pocu en Glayíu, en capital “nacional” y nun solo en Corte, arrampuñando pa si les estétiques del Meridión.

D´esa dómina romántica (s. XIX) procede un camín enfenitu d´arrequexamientu de la sencia céltica del Norte Peninsular (n´especial el NO), qu´amás España trató de contrarrestar col fechu de que la Meseta (La Castiella “paridiega d´España”) tamién foi celta y celtíbera, y pa too eso Numancia yera la xesta que ponía n´éstasis a los más españoliegos y centralistes. Tovía nos años 80, pamidea, sintí a un illustre caderalgu uvieín, ún d´esos que proceden de tierra de secano, que queríen ríse de los celtistes asturianos d´entós. Elli dicía que pa celtes celtes, los d´España adientro. Aquel caderalgu, axente colonizador y españolista, nun decía a los estudiantes una cosa perimportante, y con ello faltaba a la verdá: que los resclavos célticos en Galiza y n´Asturies taben vivos, y yeren entós bayurosos más alló de l´arqueoloxía, mentes que los de La Rioxa o Soria, por exemplu, tábenlo menos, cásique perdíos. Pero bono. Hai un gran repunu polo céltico n´Academia, y n´Asturies más. Eso ye nidio.

Muncho d´esi repunu t´aportando de Galiza, precisamente, gran trubiecu del celtismu románticu, y hermanos nuestros tocántenes a compartir esi posu celta. Hai una editorial –Toxosoutos- nel país vecín que paez qu´espubliza cualisquier cosa. Un rapaz o rapaza fai un trabayucu de clas na facultá, al que quiciás yo como docente pondría un “4” de nota, ye dicir, una mecigaya fecha con cuatro pegotes d´interné, y eso paez qu´ellí-yos val p´asoleyar yá un llibru en Galiza, y un llibru sobre celtes, pa más inri, que ye un tema científicamente seriu y difícile. Nun d´esos llibros que lleí en gallegu va pocu, por casualidá, una rapaza criticaba l´usu fechu del celtismu por parte d´Andecha Astur en nun sé qué campaña electoral. [Ana Ibarra: Da arqueoloxía ao soño popular, Toxosoutos, Serie Keltia, A Coruña; l´orixinal ta en castellán pero yo pañé casualmente la torna al gallegu]. Pero, oye tú qué coses tien la vida: El llibru, que tan críticu quier ser col mal usu non científico del celtismu, por embargu nun cita la llarga hestoria que´l nacionalismu gallegu –bien raciolóxicu nos sos ñicios, a diferencia del asturianu- tien fecho del celtismu. Ellí, el celtismu popular sí que ye una “estética ideolóxica” bien espardía, y mira per ónde, los exemplos a criticar van a sacase, por embargu, n´Asturies, en Cantabria, etc., como exemplos d´un celtismu popular sigún l´autora, un aquello “maníacu”. Eso, nun llibru editáu en Galiza... ensin mentara malapenes exemplos gallegos... ¿nun ye cosa curiosa, digna d´atención? . Por ciertu, la editorial ye la mesma qu´espublizó´l llibru d´un tal Carlos Marín, críticu col celtismu asturianista dende unos plantegamientos escolares, y al que me paez que yá-y dieren cumplida rempuesta dende´l coleutivu Belenos. Ye como si dende dalgún sector gallegu nun mos “dieren permisu” pa ser celtes los demás ¿non?

Entós, tornando al filu del entamu, Asturies ye nación atlántica y eso significa pa min, en bona midida, nación celta. De toes toes, uso muncho´l conceutu d´atlantismu porque dexa pal especialista la custión de si los ástures yeren otros indoeuropeos celtizaos en della midida o gráu, o si yeren dafechamente miembros d´una “civilización céltica”, por sencia una civilización poliétnica, etc. Hai que reconocer que l´océnau Atlánticu yera otru mare nostrum pa los pueblos cantábricos, bretones, escandinavos, etc. Y siguió siendo asina depués de la romanización, con gran puxu tres esbarrumbase l´Imperiu, colos ataques “vikingos” incluyíos, que, si bien zarraben rutes tamién les abrieron. Hayi toa una llínea diagonal dende l´Árticu fasta la costa portuguesa, que foi un exe de cultures -quieras que non- rellacionaes. Lo atlántico entamó anantes que lo céltico, col exe de megalistismu que percorrió esta parte d´Europa: les  foles céltiques nun foron más que foles civilizaores postreres a ésta. L´ablayu del Imperiu Romanu foi l´entamu del puxu d´esos pueblos bañaos pol segundu “mare nostrum” al Norte. Tán por pescudar los resclavos d´una cultura granxera común en tol Norte d´Europa y nel Centru, de la que nós, asturianos, somos heriedos cientu por cientu. Había qu´entamar proxeutos serios d´investigación sobro l´horru européu, y demás graneros y construiciones campesines rellacionaes, y en xeneral de l´arquitectura de la madera. Quiciabes les idegues alrodiu de la nuestra cadarma étnica se nos diben a esclariar, poniéndonos más del llau nórdicu y centroeuropeú, que de la mui oficial y mui artificial esfera mediterránia na que –por imperativu llegal- se nos mete.

“El que nun quier imaxinar una sociedá desalienada acepta l´alienación y, poro, incapacítase pa talantar científicamente el mou de furrulamientu de la sociedá. Si la ideoloxía ye la concencia falsa, alienada, d´una sociedá alienada, la ciencia d´esta sociedá nun ye separtable de la so ideoloxía. La ciencia real y totalmente desalienada nun esiste entá, pero somos quien acolumbrar la lliberación humana una y bones se ye consciente de la falsa concencia. Convién recalcalo: la razón y la emoción son los productos insepartables del ser y de l´actividá del home, animal y non animal, social ya individual”.

[Samir Amin: Imperialismo y Desarrollo Desigual, Fontanella, 1976, p. 94].

Asi