carlosXblanco

[Quieren facer de nós, los asturianos, una especie n´estinción: un xenocidiu sele. Nunca nun van a poder]

En nome del progresu decimonónicu, fixéronse bayurosos cancios d´allabanza dica los estaos-nación europeos, medianos y grandes. D´ellos, reconocíase´l so orixe ya inclusu'l so presente plurinacional. Pa entós yera “progresista” considerar que l´asimilación de les naciones pequeñes (y más si éstes yeren atrasaes) tenía que se facer, y facer de forma rápida.

Ansí por exemplu, Mill referíase a les ventayes que pal vascu tendría l´incorporase a la nación-estáu francesa colos consiguientes “privilexos de la ciudadanía francesa” envede permanecer “enfurruñáu nos propios peñascos, reliquia semiselvaxe de dómines pasaes, dando vueltes a la propia y pequeña órbita mental, ensin participación nin interés nel movimientu xeneral del mundu” [citáu por Hobsbawm, 1991: Naciones y nacionalismo desde 1780, Barcelona: Crítica, p. 43]. Lo mesmo pa galés o l´escocés de les Highlands.

El neodarwinismu, y peor entá, el darwinismu social aplicáu a les naciones ye refugable éticamente, y nun se xustifica tampoco llóxicamente. Nin lo grande ye meyor (y ehí ta la probitú bayurosa de millones de seres nos U.S.A, Xina, o Rusia), nin una potencia pel meru fechu de ser grande, y ser a escala mundial eso, “potencia”, tien drechu, por si sola, a esaniciar les naciones que comprendi interiormente y que más recién o más d´antiguamente ella vien colonizando. Ye hora de desamazcaritar a esos “ultres” de la nación española que nun tienen empachu a recurrir al “terrorismu económicu”, al estilu Rosa Díez, diciendo que los inversores estranxeros van salir de Catalunya, Euskadi o Ballears dando galmiaes (recuerden el casu d´Air Berlín). Ye hora d'enfrentase a tanta Guaxa Mediática, que mos trata a toos como neños, una Guaxa que sal diciendo que col desarrollu de les autonomíes y de les normalizaciones llingüístiques ta “frañendo la xunidá del Mercáu [español]”. ¿De Xuru? Cuido que´l McDonalds de Xixón procede d´un país estranxeru, ya invirtió na Cai Corrida ensin torga dala. Una nueva nación independiente, podrá ser capitalista o socialista, y esto sedrá lo determinante a la hora de que participe en más o en menos de los procesos económicos globales, pero non les fronteres polítiques en sigo mesmes. Estes, cierto, bien emplegaes, puen ser un requisitu “protector” de la propia economía productiva del País. Por exemplu, Asturies podría ser el día de mañana un estáu menos colonizáu, con unes inversiones centraes nella mesma como coleutividá y non como “parque estractivu, turísticu y enerxéticu” d´España. Una independencia –o un mayor grado de soberanía, al menos- nun ye garantía per se pa dexar de ser Colonia, pero en tou casu ye un preséu sine qua non pa ello.

Nun va ser fácil la llucha contra estos “darwinistes sociales” de les naciones. A nós, los asturianos, tiénennos dicho que somos probes, ineficientes, subsidiados, pocos, con escasu territoriu, aisllaos, que sin España nun somos nada. Cásique nun tenemos derechu a esistir. Y yo esto percíbolo nun solo lleendo artículos, sintiendo políticos, etc. Nótolo a nivel de cai, en xente español normal de distintos puntos xeográficos. Lo primero qu´hai que facer ye nun creer nin pallabra de too esto. Ye una mentira descomanada trabayada con gran pricuru y zuna dende´l Poder Colonizador. Si aumentamos l´autoestima d´asturianos podremos desmontar tantu mitu. Precisamente Asturies foi la que sacó alantre –en parte- a una España famienta, inculta, puramente rural, llatifundista y atrasada. Y asina nos salió. Estrozaron una inmensa rede de Caseríes y de Comunidaes autosuficientes, too pa dar de comer al que depués nos dio cola vara. ¿Ye eso ser colonia o non? Les naciones pequeñes tamién esisten, y dacuando amuesen na Hestoria que saben ser grandes y tar a l´altura. De nós depende.