carlosXblanco

Voi siguir falando de como cuatro individuos fabricaron la imposible idega –fecha realidá- d´una “Asturies Rexón Española”. Nun quiero facer un estudiu sesudu d´esi procesu hestóricu bien llargu. El corte pa escomencipiar podría ponese na criación del “Principáu d´Asturies”, en 1388, per aciu de la cual el Rei Castellanu, lliteralmente, reclamaba pa sí estos territorios. Podría ponese a lo llargo del Antiguu Réxime, cola fabricación d´un Estáu Absolutu asonsañando el francés, bien centralizáu y esaniciador de los países integradores del Reinu. Qésiyo: tamién podría tener un valir simbólicu la total desapaición definitiva de la Xunta Xeneral en 1835. O tamién, l´Ochobre Revolucionariu de 1934, con tol aplipayamientu nacional qu´ello supunxo. Y lo más de lo más, el franquismu y la nomá “Transición”, que dellos hestoriadores d´esquierda son a poner –cada vuelta con más seguranza- dientru d´un continuum. N´esti intre tamos anguañu: nuna Transición nunca acabada, que dalgunos quixeren talantar como “asintótica”. Ye dicir, como una premanente frustración tocántenes al restablecimientu de les llibertaes democrátiques más fundamentales, precisamente a causa del pecáu orixinal de xorrecer tala “Restauración” dende les coraes mesmes del franquismu, viendiendo al públicu nun paquete ensembre y compactu una serie de “pagos” y deldes pa cola dictaúra facista: imposición de la monarquía borbónica, y d´un Borbón puestu pol mesmu Franco, consolidación d´un Estáu unitariu, namás que descentralizáu desigualmente al encruz de les “autonomíes”, llei de puntu final pa colos crímenes del franquismu, enxamás condenaos oficialmente, y un perllargu etcétera...

Asina, ye cenciello ver qu´Asturies taba yá en parte desasturianizada (o lo que ye igual, colonizada) dende antes del franquismu, pero nel continuum Franqusimu-Transición esi procesu llegó a estremos bederres y de nidia artificialidá impuesta. Lo pecualiar d´una colonización ye que lo impuesto y artificial, acaba por camudase en “natural”, y ello sicasí nel plazu d´una o dos xeneraciones. Talo como los indíxenes con taparrabaos asumen que la so bébora natural ye la Coca-cola y non l´augua del regatu, tolos asturianos podemos llegar a sintir d´equí a pocu que la música de Melendi, por un dicir, tamién ye “nuestra”, o que les tonadilles de la Pantoja tamién son nuestres, porque “tooes somos – a la fin- españoles”. Esta castra de discurriatos nun ye cosa rara na “prensa rexonal”, y por eso nun artículu anterior recalqué l´enfotu que la “prensa rexonal” tien por espardir la idega de qu´Asturies ye España. El llabor de “La Vieya España”, dende los años que yo la voi siguiendo, ye bultable. Una lletura superficial del tabloide esti podía dar la imrpesión d´un altu grau de rexonalismu. Ai, sí. Precisamente rexonalismu de lo pior, de lo más malo qu´hai nel mundiu. Ye lo que Xuan Xosé Sánchez nomó una vegada, con aceñu, el “nacionalismu metafísicu”. Una víctima del “Katrina” o del Tsunami nun-sé-cuántos tuvo un bisgüelu asturianu, y la traxedia, per esa banda, yá ye “nuestra”. Esti tipu de rexonalismu, ente folklóricu y metafísicu, hai que lu curtiar dende´l raigón. Esa sí que diba ser una bona terapia de grupu. Rise na cara de la desinfinidá de tracamundios que Melchor, Neira, Gracia Noriega y demás axentes rexonalizadores, lleven faciendo cola Nación. Estropiciu mayor nun se pue facer, mamina del alma. Ye como esos tochos en fascículos que vienden, entitulaos “Asturies y ...”. De forma más que sibilina, ente artículos bonos d´especialistes reconocíos en dellos campos de temática asturiana, el propiu coordinador (por exemplu, aveza ser coordinador oficial, Javier Rodríguez Muñoz) entemez una llinea oficial determinada... “Rexonal”, provincial, non nonacional. Yá lo dexé escrito. Con dos periódicos, cuatro peñes taurines y dellos comederos empresariales (por exemplu hoteleros), yá pue construyise una Rexón que, previamente, yá cadez una mediatización político-económica descomanada.

Nesti sen, paezme bultable´l papel que desendolquen los veraneos norteños. Yo téngolos un pocu analizaos. Cuando una “rexón” se fai turística, ésta tiende a estilizase, a tracamundiar la propia sencia. Cimeramente, el procesu consiste n´ufrir una parecencia prestosa y gayolera al forasteru. Asina, dellos rasgos que por complexu d´inferioridá (rexonalista) dan vergoña, tienen de ser “tipificaos” (convertíos en tipismos) o arrequexaos dafechu, al empar que se fain bultables otros, ora xenéricos ora españolizantes, col envís de que´l turista se siente “como en casa”. Yá se tien visto qu´en dellos establecimientos del Oriente Astur les pizarres anuncien “Rabas” en cuenta Calamares, o “Pulpito” envede Pulpín. Tamién se tiene que tomar en cunta la campaña mediática d´El Comercio esti branu ufriendo toa una coleición de Tauromaquia, pémeque en DVD, talo que ún nun daba dos pasos en Xixón ensin ver propaganda taurina y ambiente toreru nuna ciudá más bien fría pa estos espectáculos selvaxes, propios de pueblos ensin civilizar. Son cosuques que había mester dir analizando, y si teo tiempu nos próximos dñies, trataré de facer...