carlosXblanco

La dialéctica de ser Nación: Asturies.
Carlos X. Blanco.

Onde hai un pueblu con llingua propia, onde hai un pueblu con concenxa de sigo mesmu dende va sieglos, hai Nación. Ser Nación implica un procesu hestóricu, formativu (la Bildung, na llingua xermana), territorial, y poro, combativu. Toos esos momentos desendolquen a la fin nuna cumal dialéctica. El procesu de devenir Nación ye dialécticu. Nel casu de la Nación Asturiana yo nun güeyo otra manera de talantar el ser de nuestro. Ye una dialéctica qu´implica non poco de llucha y camarzu, pero qu´amuesa al encruz la so propia necesidá interna, y que nun se va completar fasta que ún díi, nun se sabe cuándo, aporte la so coronación: un Estáu plenu, arguyosu ente los pueblos y naciones del mundu, llibremente federáu a la Humanidá por llazos solidarios y fraternos.

Entrín y non, ser Nación implica recuperar la llucha teórica y práctica en toos esos momentos de la dialéctica yá señalaos.

Recuperar la Hestoria, que mos la robaron abenayá. Asturies tien mester d´una nueva Cuadonga, pa reconquistase ella mesma, pa saber de sí, pa conocer de xuru –al marxe de lleendes- cuál foi´l trubiecu politicu suyu, y non el d´una España inesistente ya inversímil na dómina tardorromana y medieval.

Alicar no formativo: hai guerra entá fasta nos llibros de testu, la guerra de siguir mandando a la emprenta epígrafes como “la Rexón asturiana” o “el dialectu asturianu”, la guerra del adoctrinamientu españolista que sigue cadeciendo l´asturianu y el que nun lo ye, mentes seya alumnu o escolín. Nacionalismu ye llantar griesca a les mentires. Nacionalista ye denunciar la guerra de términos que dende sieglos vienen llibrando los centralistes del Ministeriu y cuantos seyan axentes periféricos y tentaculares suyos. Un gran llabor, perfondu, d´Educación del Pueblu, el gran llabor de recuperación nacional: recuperar gayasperamente una forma de falar, que va muncho más allá d´una oficialidá llingüística algamada. Implica decir al alto la lleva, “Somos Nación”. En masa, con naturalidá, a diario. Cuando na Escuela de neños, asina como na prensa y demás muérganos culturales, seya lo más normal del mundiu decir, y sentir decir, “Nación Asturiana”, yá sabremos entós que s´algamó una Paideia, Bildung. Sedremos un Pueblu, pero más qu´un Pueblu: Nación autoconsciente.

Momentu territorial. Un ethnos non nómada, siempres foi ethnos con territoriu. El territoriu ye´l cuerpu visible d´un alma coleutiva, d´una manera d´estar nel mundu y de definise (dialécticamente) énte los vecinos. Un Pueblu respetáu, una Nación nun sometida a discutiniu, ye´l portador d´un territoriu bien definíu y bien defendíu. A lo llargo de la hestoria, hebo mester d´apurrir el fierru de les armes pa la so defensa. Les politiques demográfiques d´infiltriación y colonización aportaron darréu. Güei, los ástures cadecemos inclusu los efeutos de politiques toponímiques, d´espansión cultural ayena (castellana y gallega, sobre too), ya inclusu nun falten los que dubien de la nuesa consistencia identitaria pa xintar, asina, el so cachu llambión. Cola política identitaria actual, nula, o más bien, galaico-afro-hispana, nun se quier otro qu´encloyar el cuerpu visible de la Nación Asturiana. Dexanos al nivel de la pura entelequia: vienden l´Occidente al vecín, asfalten el Centru, y l´Oriente camuda en barriu residencial vascu y madrilanu. Y yá ta vendíu´l País. Pero´l País tien el so cuerpu nel territoriu, nes sos lleendes hestóriques, nel so paisaxe ancestral y nes sos bones y vieyes formes de vida. Un Pueblu fala, y fasta glaya cola so llingua llariega, efeutivamente. Pero un Pueblu ye cuerpu y allianza santa cola naturaleza al traviés del Territoriu de so. Dialécticamente hai que saber una cosa: sedremos Nación daveres cuando teamos los ástures, otra vuelta, dimpuestos a defender nuestra piel territorial verde y prieta, si ye preciso, fasta col dentame.

Aporto al momentu combativu. De la cantidá –medrante- llegaremos al cambeu cualitatuivu. Lluchar, políticamente, ye tener una sola voz, un solu puñu. Discrepancies ideolóxiques, bienllegaes seyan. Pero indagora tamos nun tiempu nel que falar d´una “Nación Asturiana”, con tolo qu´eso implica, sigue siendo un llabor militante, combativu, de gran y llargu altor de mires, d´esposición incómoda a los peores insultos, esprecetaciones y marxinaciones. Pero too eso ye dialécticamente necesario pa que´l dii llegue, pa que les coses de la hestoria, empobinaes por milenta manes invisibles, aporten a una cumal. Allí arriba fíos o ñetos nuestros podrán güeyar lo muncho que costó esguilar, y lo necesarios que foron los sacrificios.