carlosXblanco

El requexu del bable? 03:23 hores :: 04/Mayu/2007 :: espublizao por josé carlos loredo narciandi :: [lengua] en Glayíu

Pueque tolos momentos hestóricos fueren importantes pa la reivindicación llingüística asturiana, pero paezme que'l momentu actual ye, quiciabes, críticu. Ye mui posible que se tean decantando les posiciones que se vinieren desendolcando dende la dómina de Conceyu Bable y que, poro, teamos viviendo unos años nos que lo que ta en xuegu nun ye sólo la supervivencia de la llingua, sinón tamién qué clas de supervivencia, en casu de dase, sedrá la que tengamos. Anguaño óyense cada vegada más voces aporfiando por dixebrar la reivindicación llingüística de les reivindicaciones polítiques, especialmente de les venceyaes al nacionalismu. Piénsase qu'asina sedrá más fácil algamar la oficialidá -¿cómo ye que nun se mos ocurrió primero?, deben entrugase dalgunos-.

Conceyu Bable foi'l ñeru del xorrecimientu de la conciencia bablista, pero tamién foi ñeru del xorrecimientu del nacionalismu cultural y políticu. Renegar d'esa herencia igual ye mui políticamente correcto nestos tiempos de “moderación” que vivimos, pero a llargu plazu ye una estratexa cegarata. Hemos ser claros: la reivindicación llingüística pura, dafechamente desvenceyada de connotaciones polítiques, val pa mui poco. No fondero val pa da-yos la razón a los antibablistes de tola vida: si n'Asturies toos somos quien a furrular en castellán, ¿pa qué enguedeyanos con eso del bable? La respuesta nun pue afitase sólo en criterios de drechos llingüísticos individuales, precisamente porque nun hai asturianu que nun entienda'l castellán y que nun s'arregle nesta llingua pa facer los papeleos que tenga que facer. Siendo pragmáticos, sóbranos col castellán. La respuesta al antibablista tien de ser tamién política: nun mos peta que l'asturianu muerra porque ye un patrimoniu cultural nuestru como pueblu, una seña d'identidá que queremos caltener y dexar a los nuestros fíos por motivos que nun son pragmáticos, sinón que tienen -y a muncha honra- un aquello de sentimental, dao que cinquen a l'autoestima colectiva y a la identificación con una tierra y un mou de vida. La oficialidá, entós, ye l'únicu preséu pa que la llingua asturiana nun muerra. Por embargu, nun ye un preséu suficiente. Ensin oficialidá l'asturianu ta condergáu a morrer, pero con oficialidá tampoco nun hai garantía absoluta de que sobreviva.

Últimamente delles organizaciones polítiques a les qu'enxamás nun-yos esmoleció nin gota'l tema de la llingua o qu'incluso tuvieron abiertamente escontra ella tán pescanciando que con dellos “guiños” al bablismu puen algamar votos. Como'l nacionalismu asturianu ta poco frayáu y ye poco feble, trátase de frayalu tovía más robándo-y una de les sos carauterístiques: la reivindicación llingüística. Non habéis ser radicales nin echavos al monte -dízse-yos a los bablistes-; falando entiéndese la xente y, si vos moderáis, podemos concedevos daqué, y a lo meyor hasta podemos conceder una oficialidá cola que yá vais tener que dexar de glayar pa siempre.

Esos cantos de sirena enmazcaren una de les opciones que na mio opinión son más probables no tocántenes al futuru de la llingua: que nun muerra porque quede restrinxida a un emplegu lliterariu y a una minoría a la que-y presta usala pa escribir poles razones que seyan (porque viven d'ello, por satisfaición personal: eso ye lo de menos). L'asturianu sedrá entós una llingua que naide fale, pero nun podrá dicise que se dexó pa prau porque, de fechu, caltiénse viva y hasta esfruta de sofitu institucional. Inclusive cola oficialidá -según cómo se faiga- pue llegase a un escenariu como esi.

Dixebrar dafechamente llingua y nacionalismu queda bien. Val pa llamar “talibanes” ya insultar a los que nun lo faen. Pero entós hemos ser consecuentes y arrecostinar colo qu'un dixebramientu talu pue implicar: aquello de "el requexu del bable", ye dicir, una llingua que naide va falar y que sólo va valir pa una secta d'escritores, pal cultivu escritu y lliterariu, pa un garrapiellín de xente aficionao qu'habrá tener la boca bien zarrada.