L´Asturianu nun ye una llingua atemporal y enllatada qu´aparez nel sieglu XXI magar que munchos quieren facela lo suficientemente aséptica y axeitada pa que puea ser una llingua amazónica, polinésica o lo que ye peor tovía una llingua española. L´asturianu ye la llingua d´un pueblu, d´una nación y tien que ser reconocida como tala. El movimientu de vindicación llingüística camudó en rellativamente pocos años munchos de los sos pegoyos fundamentales y fundacionales o meyor esplicáu, dalgunes presones y muerganizaciones apropiáronse d´esti movimientu abanderándolu o na solombra y camudando los sos entamos. Dientru d´estos cambios podemos atopar dende les postures españolistes y galleguistes con inventos de llingues incluyíu, hasta cualesquier desvinculación cola nación o´l país asturianu. ¿O ye que nun sabéis el dañu que´l nacionalismu asturianu ta h.aciendo a la llingua? Ye uno de los sos grandes estigmes, eso ye lo que dicen, los nacionaliegos asturianos destruyen Asturies y faen imposible que la llingua espoxigue. ¿Por qué-y tienen tanto mieu a Asturies?
Los españolistes y los que se denomen erroneamente asturianos y más acertadamente asturianistes empleguen argumentos que xuben de tonu sofitándose nel pueblu vascu y catalan, nel sentimientu nacional d´estos, n´ eta…too s´enguedeya de manera que les presones que defendin los sos pueblos son los braeros responsables de la represión exercida polos poderes fácticos y ayenos que-yos obliguen a emplegar llingües foriates. Nesti casu´l reinu d´España o la corte d´españolistes espardios perdanyuri qu´intenten cuayar l´inventu d´España magar qu´en tantos años nun fueron quienes a faelo. Nun tenemos por que engañamos y tenemos de saber onde tamos y quienes somos y que´l movimientu de vindicación nacional va tardar entá munchos años n´espoxigar y que siempres se cuerren riesgos de qu´otros seutores non asturianos intenten frayarlo o camudar los sos entamos como ficieron en parte col movimientu llingüísticu ya intenten faer agora col nacional. ¿Podemos entender la nación asturiana ensin la llingua vehicular de la mesma, ensin el símbolo y niciu d´indentidá más importante o la llingua ensin la nación, ensin el so pueblu? Los movimientos de vindicación llingüística y nacional nun se pueden entender de manera dixebrada, son un mesmu y eso hai muncha xente qu´intenta tapecelo. “L´asturianu ye de toos” dicen aquellos que s´apropien d´él y que naguen por que los partios españoles PSOE y PP apuesten pola llingua aséptica, non pola oficialidá qu´eso ye secundariu sinon pa tener más puestinos, más sobenciones, más futuru pa los sos bolsos y menos mal qu´entá nun descubrieron el mundu de les prexublilaciones pol asturianu que sinon teníen cola p´apuntase.
Aquellos qu´entamaron en Conceyu Bable nel CNA o ENA o los que lo ficieron na XPDLLA ven agora, cola perspeutiva del tiempu comu les coses cambien. Aquel primer movimientu, Conceyu Bable que nun supo estremar ente les custiones de país y la llingua del mesmu yá nun esiste y nun ye que nun supiera faelo, ye que nun se podía faer al igual qu´anguañu. El CNA o l´ENA tamién desapaecieron. Toos ellos marcaron un camín que munchos siguimos, un camín nel que la nuesa llingua ye perimportante y nel que les custiones nacionales s´entemecen coles sociales o llingüístiques. En cuantes a la XPDLLA yá nun ye la solombra de lo que yera, convirtiéndose nuna responsable más de la llaceriosa situación na que vivimos. Aquella antigua xunta pola defensa onde ensin dubia cabiemos toos conviertióse col pasar de los años nuna secta onde la pallabra nacional ye perseguida y onde aquellos que somos asturianos somos marcaos por nun comportamos comu asturianistes. Lo light manda, collacios, y lo “guai” d´esti movimientu ye sumar y sumar y sumar ensin importar a quien, siempres que nun-yos seyas a dicir que daque nun te presta o a plantegar siquiera que la llingua asturiana ye la propia de la nación asturiana, ¿Sabíeislo?, y nun preguntes que faen los lliberaos. Sé que munchos nun lo veis tan prieto sobre manera por que conoceis, como yo, a munchos mozos y moces engañaos que tan dientru. Pasu ente pasu. De toes formes encamiéntovos a que faigais un repás pol trabayu desendolcáu daquella y el d´agora, comu cambien los plantegamientos fundacionales y ye que nun hai qu´escaecer que la mayoría de los que la fundaron nun siguen ellí. La nación asturiana, posible o imposible, ye onde vivimos y escaecer la mesma nun va provocar que los españolistes decidan sofitar el nuesu idioma, ta comprobáu qu´esto vende sinon pregunta-ylo a los d´IU que-y la metieron doblada a tolos que naguaben por una solución rápida pa la nuesa llingua.
Estos grupos que controlen ensin dubia a seutores importantes dientru de los “asturianistes” esbabayen a la contra de cualesquier intentu de considerar qu´Asturies seya reconocida comu nación anque nun-yos importe asumilo en determinaos círculos o de forma que venda, nun escaecer que lo light vende, y el café prieto y el con lleche anque son café, nun saben igual. Atrévense incluso a dicir que son nacionaliegos pero que la llingua ye lo primero. ¿La llingua ye lo primero de qué? Parez que´l mieu a los nacionalismos vecinos (n´especial el vascu y el catalan que del Iraquí nun s´alcuerda naide y los galleguitos son amiguinos) tan presentes hasta nel caldu por estos seutores que s´enfoten en recordamos una y otra vez qu´Asturies nun pue aspirar a ser un país llibre, qu´eso de la independencia ye imposible y qu´eso agora nun toca. Ellos marquen el calendariu d´esti país ensin dexar los furacos abiertos pa qu´otros con tanta o más llexitimidá qu´ellos trabayen pol mesmu. El cincu de marzu de nun va tanto quedó bien nidio´l noxu que munchos-y teníen a un llema, “Llingua nacional, llingua oficial”. Por primer vez na hestoria de la vindicación llingüística que nun entama nel 69, una pancarta yera perseguía por aciu de la fuercia y el facismu mentantu qu´otres que falen de cuatru llingües p´Asturies paseen comu si nada ¡Coses d´Asturies! Nun voi esplicar equí (yá lo fadré cuandu toque) quienes son los responsables d´ello nin comu s´enmazcaren nel famosu cartelu del Ensame pala Oficialidá de la llingua d´Asturies p´atacar ya intentar baltar una idega, un país, una nación…la nuesa. Que siempres, manifestamientu tres manifestamientu molestába-yos enforma.
La independencia d´Asturies nun ye pa mañana eso ta nidiu pero fadremos los deberes pa que seya pa pasáu. Nos manifestamientos siguirán sintiéndose llemes naguando por que la nuesa llingua nacional seya la llingua oficial y estos seutores, los españolistes, los asturianistes, qu´a la fin vienen a ser lo mesmu, nun van a ser a evitalo. La nación asturiana tien a día de güei continuidá nos proyeutos de munchos grupos y de munches presones qu´a nivel individual saben a ú pertenecen. Mentantu la llingua asturiana va a pior ensin que seyamos a evitalo por mor del nacionalismu, por mor d´un nacionalismu llamáu español que ye´l que de verdá ta mancándonos y el qu´inesplicablemente nun ye condergáu y acorripiáu como l´asturianu. Muncha xente consideróse nel pasáu nacionaliego y acabó amuesando al so pueblu que nun lo yera, munchos quedaron y quedaran nos caminos hasta que consigamos la independencia d´Asturies pero esta llegará al igual que lo fadrá la oficialidá de la llingua d´Asturies. Los fracasos d´algamar la xunta Xeneral embobínenme a camentar que´l camín va ser llargu y que los enemigos pa torgar la nuesa llibertá son munchos y sedrán más, pero esi camín yá entamó va tiempu y agora hai que siguir afuracando nesta tierra, yá saldrá agua.
En cuantes al movimientu de vindicación llingüística, entá vive. Anque dalgunos intentaron camudar los sos plantegamientos nun lo consiguieron namai qu´en parte. Munchos aguantemos el 5 de marzo y siguimos faciendolo anguañu, munchos consiguimos llegar a la fin del camín aquel díi, a guelpes, emburriaos, calumniaos, cansaos…pero lleguemos como lo fadrá´l nuesu pueblu cola independencia. La vindicación llingüística tien que tornar a los sos orixes, mirar p´atrás y atalantar que daqué cambiara pa pior. Trabayar como nel pasáu pola oficialidá y non polos intereses de dalgunos partios o persones. Nesi llamáu movimientu llingüísticu hai xente válido que nun sabe realmente a lo que contribui y lo que fae. Yo, polo que me toca nun toi dimpuestu a collaborar un res con partios políticos incubiertos en xunta poles y prefiero a toes toes les coses clares, por entamar nueos proyeutos y a trabayar pol mio país y pola mio llingua comu intente faer siempres.
Dalgún día, nel futuru, allá alantrones daquién mirará p´atrás y estudiará too esto y espero qu´entós, cuandu Asturies tea reconocía comu un país, que selo yá lo ye, seyan a atalantar la importancia d´una fras, d´una idega, d´una velea pa munchos y un suañu pa otros:
LLINGUA NACIONAL, LLINGUA OFICIAL
PUXA ASTURIES LLIBRE
.