carlosXblanco

Carlos X. Blanco. http://partiucarlista.blogia.com/2007/061601-robennos-el-paisaxe..php

(de "Barganaz Astur" na web del Partíu Carlista d´Asturies)

¿Qué ye robar un paisaxe? No fondero ye igual qu´arramplar cola cultura, dexar a la xente ensin un llar, matar a toa una nación. Eso asocede agora mesmo con Asturies. Ye nidio pal que quiera güeyar alrodiu. Nun ye un esmolecimientu “específicu” de militantes ecoloxistes. Ye un puru fechu oxetivu. N´Asturies tamos quedando sin Asturies. Nun hai más. Y naide ye quien a paralo. 

Va munchos años qu´esti procesu arrincó. La Revolución Industrial nel país foi tardiega en comparanza con otres fasteres d´Europa Occidental, pero emprimó bien ceo dientro l´Estáu Español. Les mines y l´aceru llenaron de fumu y prieto un paisax que siempres toviere mozcáu pel verde y l´azul. Una Asturies de carbón, de fierru, de fumu, de contaminación. Una Asturies proletaria, y yá nun sólo aldeana. Un país pal asfaltu, pa la villa camudada en ciudá, pa l´aldega tresformada en barriada. Quedaron pa güei los cordurones llaceriosos nel paisaxe. Pero tamién nes concenxes, na memoria coleutiva, nes menes d´entender la vida y de trabayar n´ella. Memoria d´un Pueblu Trabayador campesín y obreru, fundamentalmente. Y arriendes, con munchos pasiellos comunicando aldea con mina o con fábrica, y viceversa, un fechu específicu asturiano ésti que nun se da en tolos llaos.  

Pero n´estos 150 años d´hestoria, los asturianos hemos deprender una lleción bien grande. Y yo nun sé si hai una masa social crítica que se decate enforma, esto ye lo qu´anguaño m´esmolez. La estaya “fabril” y “proletaria” que formó parte bultable de la nuesa sencia morrió mayormente coles reconversiones xabaces de los 80 y 90 del sieglu XX. Queden entá unos miles de proletarios nel sen clásicu, marxianu, de la parola. Endagora reciben los caberos palos de la policía y de les nueves reconversiones d´ultima hora. Pa ellos hai mester toa la solidaridá y sofitu nuestru, del pueblu en xeneral. Pero lo que quiero dicir ye que l´Asturies industrial y obrera yá nun ye lo que yera, y qu´esa dómina de 150 años, too lo llarga y relevante que mos paeza, tien de ser vista d´otra manera. Como un entemediu hestóricu del llargu camín de sieglos que va percorriendo esta pequeña y vieya nación.  

Ensin arrenunciar de lo que deprendimos lluchando escontra´l Capital, y de lo que ye dexase esplotar talmente como Colonia, pa que nos esgonciaren el paisaxe y la cultura, hai mester alcordase de que la nuesa sencia ta nel campu, nel valle, n´aldega, nel mar, na montaña, na casería... ¿Sencia? Yá sé lo poco que-yos presta tala pallabra a dalgunos. Esplícome: nun falo nel sen etenru, atemporal, aristotélicu. Sencia nel sen d´una cadarma cultural construyida dende llonxe, d´una perdurabilidá llargamente trabayada na dialéctica ente pobladores y suelu. Eso ye bramente Asturies como Nación Posible: una milenaria rellación ente unos pobladores y el so suelu. Esa estructura nació, políticamente falando, quiciás tres de la invasión imperial romana. Yá se sabe: un enemigu esternu, foriatu, atropa fuercies ensin concenxa y ensin fuerte cadarma común. Dende entós, na dómina monárquica y independiente (sieglos VIII-X) y depués, el Pueblu Astur caltuvo una rellación perdurable col so suelu, una rellación productiva-consumidora basada na autosuficiencia, y que ta perbién representada pola so Institución más característica, la Casería, dende la qu´emanen les parroquies, los conceyos, y la mesma Xunta medieval, como hermanamientu (nacional) de los Conceyos. 

La industria del XIX foi esaniciando munches de les tradiciones y estructures específiques del pueblu. Dende mediaos d´esi sieglu, aportó la gran fola de castellanización, por munches víes: accesu rodáu cola meseta, llegada d´emigrantes proletarios sureños, enseñanza reglada del castellán nes escueles, aprución del periódicu y otres manifestaciones d´”alta cultura” de mases, too ello en castellán. Yá esaniciare la Xunta y el vieyu autogobiernu, por obra del Estáu Lliberal, centralizador. La Modernidá llegaba de secute a un país que s´apigazó enforma dende´l sieglu XIV. L´Arcadia rural, que nunca nun esistió, morría inclúi comu suañu utópicu. 

Por embargu, n´esi suañu utópicu asítiase la única posibilidá de la nuesa sobrovivencia nacional. La pista ta, ensin señaldá dala, na Hestoria. Y ye que la Hestoria asturiana ye enforma una hestoria estremada de la de la España Mediterránea. La nuesa hestoria, ensin los caciplamientos de les altes nobleces, cleros y burguesíes, ye la hestoria d´una autosuficiencia y una sostenibilidá pa col mediu mui, pero que mui bultables. El pueblu asturianu, cuando nun lu afogaben los caciques, ni les quintes, ni los tributos inxustos... cuandu nun lu afogaba la fame, a la fin, caltenía unes instituciones bien democrátiques y socialistes tales que dengún “revolucionariu profesional” forasteru tenía por qué aportar equí a enseña-y (a enseñanos) un res. La Casería, la Democracia en Conceyu Abiertu y una Xunta soberana yá formaben parte de la nuesa tradición política indíxena. Al proletarizanos, perdimos el recuerdu de delles importantes coses “públiques”, les coses bramente de nueso. Agora, que yá nun somos tantu colonia industrial (sí lo somos no que cinca a lo enerxético, turístico y urbanístico), ye´l tiempu de mirar polo que fuimos, pa saber lo que hemos ser. Un país d´alma rural, densamente habitáu en caseríes disperses, aldees y poles mayormente por debaxu de los 15.000 habitantes. Un país onde´l nativu y les sos construcciones y granibles tan perfechamente integraes nel so paisaxe y na xestión local y socialista de los sos propios recursos y necesidaes sociales... 

Tien gracia qu´anguaño inventen la Agricultura Ecolóxico, la Sostenibilidá, la llamada a la supresión del tresporte de mercancíes y al menguar d´escala del circuitu producción-consumu. En suma: el Ecoloxismu. Nós yá yéramos ecoloxistes cuánta yá, pero too lo escaecimos. Agora mos asfalten con milenta autovíes esta guapa moqueta verde del nuestru suelu. Agora mos emporquen con llínees d´alta tensión, hélices, urbanizaciones y centros comerciales. Como asocediere cola Irlanda colonizada polos ingleses, trátase d´echar a la xente pa la ciudá, de mano, pa camudala en proletaria,  llueu pa que seya más bien consumidora de basoria que-y traen dende miles de kilómetros de distancia. Y el país, valeru, valeru.... Equí, que malapenes sumamos un millón d´almes, podíemos tener el doble o más de población si mos dexaren autoxestionar un socialismu agro-ecolóxicu y una industria pequeña (“lo pequeño ye guapo”, como dixo Schumacher), sostenible, llimpia, industria d´autoabastecimientu. Esti capitalismu, esta globalización, güei mos echa de casa. Un socialismu “fechu en casa” volvería a llenar de fiyos caún de los requexos de la Gran Quintana Astur. Marx dixo qu´había mester reconciliar la dialéctica ente campu y ciudá, civilizar el campu, dispersar la población, inxertar la industria (no que cinca a un mayor altor de calidá de vida) nel mundu rural, superar les contradicciones que´l capitalismu xenera subordinando´l campu a les ciudaes acumuladores de capital. Equí, esi campu densu (comparáu col Sur d´España, la Meseta, etc) tuvímoslo. Esa Casería y rede numberosa de llealtaes “socialistes” y “autosuficientes” tuvísmosles, tamién. Hai una tradición cola que conectar pa facer daqué nuevo, revolucionario. El casu ye que queramos.