carlosXblanco

Si esconsona Asturies...
Carlos X. Blanco.

1. De mano ¿ú tamos? El puntu d´arrinque, formalmente sedría bonu. Comunidá autónoma uniprovincial, o seya que nun debíen quitanos provincia nin cachu dalu. Xunidá y homoxeneidá garantizaes. Pos bien, nin un res d´eso. Un poco, si miramos pa otru llau, pel procedimientu del despiste, quitaránnos el cachu ente´l Navia y l´Eo.

Más puntos favoratibles, la llingua. Tenemos llingua propia, más vieya que´l español, falada por costume por munchos ciudadanos, y entendida por toos... pero nun ye oficial, y el día que lo seya, sedrálo de la mano del gallegu. Si arriendes se dictamina que l´asturianu nun va ser una llingua sinón milenta, envede “bable” vamos tener “babel”. Pocu nacioanlismu de mases tendremos demientres nun haiga oficialidá de la bona, con escolaridá n´asturianu universal, ensin metenos morcielles nin llagartos de por mediu. Una conseyería (¡nin tan siquiera el gobiernu enteru!) d´educación nacionaliega n´abertal sedría inversión de futuru, sedría rescate de la llingua y desendolcu de tol nuesu potencial identitariu d´equí a quince años. Ciencia-ficción agora.

Otru fitu, desperdiciáu, pa prau. La hestoria mesma, la nuesa independencia secular. Como avecen dicir los políticos españoles que remanen Asturies: “más hestóricos que nós, naide”. Sí, ye verdá. Hestóricos pa meter nun múseu. Asturies mesma camudada nel Muséu de los museos. La única comunidá autónoma del Estáu Español que coincide, nel nome y la identidá étnica con un perantiguu reinu independiente, ye “hestórica” ensin efeutos xurídicos. La so personalidá, llibertaes y franquicies (réxime de cuasi-foralidá) caltuviéronse fasta la esistencia del estáu español lliberal, sieglu XIX. ¿Valió esa hestoria pa que la Constitución vixente de 1978 reconociere daqué de los trastes vieyos? Non. Too pa prao. Típico d´Asturies, que dexamos que la casa los güelos caiga por nun ser quien a reivindicala.

Más situaciones de partida. Sobrovivencia del folclore, rasgos de personalidá, drechu consuetudinariu y tradicional específicu, música y lliteratura propies... Too ello caltiénse, meyor o peor, pesie a sieglu y mediu de industrialización y esaniciu d´esa mesma industria. Pesie a l´aculturación que supunxo la llegada de xente de fuera pa les mines y fábriques. Pesie al sistema d´enseñu centraliegu y castellanocéntricu. Güei, pesie a los medios de comunicancia, y los enfotos d´empreses informatives y publicitaries allugaes en Madril.

2. ¿Por qué nun s´esconsona la Nación Asturiana? Cainismu y griesques fratricides ente nacionalistes, “asturianistes” y, a la fin, ente toos. Altor de mires: en xeneral, nun hai. Hai mester creyer en serio qu´Asturies ye nación, sinón nun se podría entender por qué tanta xente “asturianista” se foi vendiendo al Poder por un platín de fabes. Esa “famélica lexón” nun val un res pa facer Nación. Hai que saber arriesgar, incluí yá s´arriesga poniendo´l nome o la cara por una causa na que se cree, anque haiga tiempos abegosos ya minoritarios pa con ella. Munchos de los que sienten arguyu por Fernando Alonso y Arturo Fernández nunca nun van a dar un rial pola so identidá. Ye verdá. Les coses tan asina. Pa reconocese miembru d´una coleutividá nacional hai mester de cierta cultura. Hai que dir escontra décades y sieglos d´enseñu torcíu y cacipleru. Hai qu´algamar concenxa llingüística y esaniciar prexuicios. Eso ye duro. Estudio. Reflexón. Davezu fai falta viaxar. Yá lo lleera va un tiempu na rede: l´españolismu cúrase viaxando. Y trátase d´emburriar un poquñín tolos díes. Comencer al esceúticu, seducir al dubiosu, prestixar a diario la llingua y los vezos de la nación. Enemigos, háilos, y muy membrudos y gafientos. Dixebración ente hermanos, tamién. D´eso hai enforma. Pero yo pienso que siempre ye tiempu de semar. La sobrovivencia d´una nación, quiciás pequeña y güei fríngole, ye un asuntu del mayor altor éticu. Inclusu pal que nun creya, metafísicamente, nes naciones, ye una responsabilidá moral en pro del pluralismu. N´esti mundu, el día en que se pierda´l pluralismu étnicu, idiomáticu, nacional, sedrá una braera cárcele. L´estáu español lleva sieglos siendo cárcele de pueblos. El mundu enteru, tamién. Tracamundiar el nacionalismu imperialista y espansivu, agresivu enforma, col nacionalismu de les naciones pequeñes y primíes, baxo un mesmo rétulu o conseña paezme cada vez más un actu de mala fe. Nes naciones pequeñes y soberanes, con concenxa y arguyu de los sos raigaños, ye onde suel haber mayor capacidá d´agospiu candial a los otros, mayor nivel de vida y civilidá. Eso siempre foi asina n´Europa. Los “patriotas constitucionales” (yá por min criticaos en Rebelión: Trías, Peces-Barba, Bueno) tiénenlo fácile, tienen detrás unes cadarmes nidies de poder y frenu: l´exércitu y la guardia civil. Qué casualidá, preseos hestóricos de lo que foi´l braeru nacionalismu expansivu y agresivu, l´español. ¡Que nun vengan agora los “vasquistes” d´un y otru llau a mareanos la parpayuela! Asturies ye una nación colos sos problemes específicos, y tien mester d´atropar –entainando- el so propiu camín emancipatoriu.