carlosXblanco

MENCIÓN ESPECIAL (ASTURIANO) nel Concursu de Microrrelatos Mineros "Manuel Nevado Madrid" de la Fundación Juan Muñiz Zapico (CCOO), IV EdiciónCarlos Javier Blanco Martín: "Maestru"

http://www.fundacionjuanmunizzapico.org/ConcursoManuelNevadoMadrid/2007_2.htm#txt1

"Maestru", yera como lu llamaben. Taben toos tan agradecíos, que-y llevasen regalos cásique toes les selmanes Comida fecha pela ma, una botella vinu, un cartón de güevos, galipos de fabes. Asina, l´home diba tirando. Cháronlu de la escuela cuantayá. Nunca nun tuvo carné, pero acabantes d´entrar les tropes gallegues, unos civiles aportaron a la escuela de rapazos. Ellí siguía´l "Maestru", el de verdá, como si tal cosa. Denunciáralu un vecín. Que si yera roxu. Que si se ponía de parte los mineros. Foi espantible. Dexáronlu baldáu d´una cuelma delantre toos los rapazos. Dellos tiráronse a les perneres de los guardies. Ehí quedó l´home, chando´l sangre pela boca. Dellos críos corrieron a casa ente llárimes y glayíos. Nel intre les mas de toa la reciella arrodiaron a los civiles, apellidándo-yos de too. Cuenten qu´ellos tuvieron que tirar tiros al aire pa escorreles.

"Maestru" foi curáu en casa d´una vieya a la que nun-y daba yá más nada. Nin represalies nin gaites. Vilda de cuando la Revolución, con dos fíos cayíos nel frente, pa la parte Noreña, la muyer sacólu alantre. Na cama, meyoró tomando caldinos bien probes pero daos con ciñu. "Maestru" nun quixo falar en meses. Tamién elli foi mineru. Sabía lo que yera la vida d´un esclavu. Entró de guah.e, como´l pa, como´l güelu. Cásique nun tenía ropa. Quitase la porcancia y mordigañar pan yera too lo que podía naguar n´acabando´l turnu. La camioneta circulante trayía llibros. Les lletres, cada vuelta meyor lleíes, abriéron-y un mundu. Yá de mozu féxose maestru. D´aquellos qu´había, ensin títulu dalu. Un día, al esbarrumbase la galería, quedó baldáu enforma. La cosa yera que yá nun podía vivir d´otra cosa que d´enseñar a los neños.

En alicando, "Maestru" punxo escuela na cuadra valera d´un vecín. Tolos diís vinía´l gallegu aquel de bigotes, un falanxista, col envís d´amedranar. Pero los neños trataben al so braeru "Maestru" col rispetu col qu´ha tratase un dios o un sabiu. Sabiu yera, anque too lo deprendía a la manera de so, lleendo lo que podía y au podía. Presentábase en cuartel toes les selmanes. Les menacies y los insultos yá yeren el pan de cada día. Los rapacinos colaben-y de la escuela en cuantes yeren granducos. "Maestru" dicía que la tierra los encloyaba. Nunca quixo qu´unes vides como aquelles, tan nueves, tan llozanes, fueran escosase embaxo tierra. Pero la mina, la fame, y el vivir propiu d´un proletariáu vencíu y militarizáu, nun dexaba marxe a la infancia aquella. Trabayar, morrer. Trabayar, morrer.

El falanxista abrió la Escuela Nacional. El primer día de clas taba cásique sin neños. Al pasar delantre les cases sintió como un pueblu enteru lu esprecetaba. Yera un ruxerruxe sordu, fondu, testoneru. Nes miraes de les mas, nos güeyos de los neños, había odiu. N´aquel pueblu namái había un "Maestru". Un fíu de la Tierra, baldáu por ella y pol enemigu, un paisanu de verdá, como toos ellos.

Lleendo delles obres sobre´l nacionalismu, ún pue decatase del gran puxu d´eso que yo nomaría guapamente “nacionalismu español reactivu”. Trátase d´una lliteratura qu´espoxiga de forma descomaná a partir de la década de los 90 del pasáu sieglu, y qu´espolleta especialmente tres l´asesinatu de Miguel Angel Blanco, anque vien d´atrás. Esta lliteratura, anque venga de presones con formación politolóxica y erudita, ta mui atrapada pel momentu hestóricu que vive l´Estáu Español en xeneral, y débese más de lo debío al día a día político-social d´Euskadi o Catalunya. Eso-y resta valir y oxetividá, nidiamente. Aveza tener sonadía la lliteratura de vascos “de pura cepa” posicionaos énte´l terrorismu d´ETA y, al empar, posicionaos énte´l nacionalismu en xeneral, acusándolu de ser cómplice de la banda armada. Ye entós una lliteratura “militante” qu´atacando al nacionalismu vascu, inclúi al que refuga la violencia, nun fai otro que recayer n´otru nacionalismu, el nacionalismu español reactivu. Al empar de defender, fuera del so país, yá dende Madril y dende los medios de comunicancia españolistas, un autonomismu pa Euskadi y Navarra, ensin más aquello soberanista, y una españolidá constitucional pa eses comunidaes. Jon Juaristi, Edurne Uriarte, etc., pasen asina, dende la so condición (supuesta) d´apestaos pa los nacionalistes periféricos, o inclúi amenazaos, a la condición d´estrelles mediátiques del nacionalismu español, pa les que nun-yos falten contratos de tertulianos y collaboradores pa periódicos o editoriales, cátedres llambiones, o presidencia d´altes instituciones españoles. Tamién del conflictu vascu procede la lliteratura “cosmopolita”, anti-nacionalista, como la d´un Fernando Savater que, coherentemente nun planu meramente discursivu, al oponese a les naciones en xeneral, incluyendo una nación vasca, dicen oponese tamién a una nación española. Savater dixo aquello de qu “España nun me da más”... Bono, la torna al asturianu ye mía, porque la fras castellana suena abondo más tocha. Pero quiero sollinear que dientro d´un planu DISCURSIVU namás, Savater sofita un cosmopolitismu anti-étnicu, anti-nacionalista. Porque lo que ye nidio ye qu´elli, en realidá, como gran parte de la socialdemocracia española, nun planu FUNCIONAL la so postura equival –cientu por cientu- al españolismu constitucionalista. Na práutica, esa guerra declarada a los nacionalistes vascos, acusándoles de fríngoles o collacios de los violentos, y d´achapladores de los drechos individuales d´emigrantes castellanofalantes, non euskaldunes, esa guerra digo bien, ye una guerra política. A la fin, como en toes les guerres, el tener un enemigu común xunce a los que, estremaos ideolóxicamente, tienen por fuercia d´arrexuntase nel frente. Ye lo que-yos pasa a los “patriotas constitucionales” españoles escontra los nacionalistes vascos. El so presuntu cosmopolitismu nun ye otro qu´españolismu funcional. Los discursos, nes guerres, acaben siendo “retóriques” y poco más.

 Esti conflictu vascu, tan doliosu, tien unes consecuencies tremendes pal nacionalismu asturianu. Abúltame ridículu´l “vasquismu” de los que tán a favor d´una nación asturiana como´l “vasquismu” simétricu de los que tán a favor d´una nación española. Esta xente que quier trayer al nuesu país una xerigonza y unos plantegamientos que sólo debíen ser contestualizaos n´Euskal Herria, ye xente que, una de dos, o nun entiende un res, o que sí sabe de sobra lo que fae,  una Estrapolación indebida, pero fecha a concenxa. Nacionalistes asturianos que glayen eso “¡Gora Eta!”  habrá dos o tres alloriaos perendayuri, descontrolaos  nun paí d´un millón d´habitantes como´l nuesu. Nun sé a cuentu de qué vien esa osesión de Gustavo Bueno, Gracia Noriega y otres plumes de brocha gorda qu´escriben en La Nueva España, y otros foros PROVINCIANOS a más nun poder. Hai xente ultraespañolista y osesionada qu´en cuantes tienen una oportunidá, tachen a tou nacionalista asturianu de “separatista”, “pro-etarra” y quésiyo qué más. Vamos, el demoniu en persona. Y esto dígolo sabiendo personalmente de lo que falo.  La cosa ye que si´l “vasquismu” ye bien ruinu nel ámbetu del nacionalismu asturianu y del asturianismu, pela cueta nel otru llau, de xuro bien a ser la osesión de los españolistes que viven n´Asturies y que tienen accesu a los periódicos y los foros de supuestu prestixu. Caderalgos y colunistes falando del “peligru” del bable a la hora de dividir la sociedá y a la hora de facer “imposiciones”. Xente que sollerta de la “batasunización” que la llingua asturiana pue trayer a la política o al sistema educativu astur... Pero ¿cómo pue la sociedá asturiana encloyar tantes tochures? Otru nivel críticu de ciertu públicu valdría pa tapar eses boques y escorreles del Puertu Payares pa baxo. O polo menos pa que siguieran viviendo selemente nos pisos de luxu de Uviéu o nos xalés de Somió calladinos y faciendo daqué más granible pol país –Asturies- que los abellugó de forma tan candial. Cualisquier cosa menos facer tantu l´indio. Tornando a la lliteratura nacionalista española “reactiva”, sacantes los llibros de los nacionalistes o abertzales vascos rebotaos (el casu Juaristi ye emblemáticu), y tresformaos en nacionalistes españoles, ta tamién toa una “pléyade” d´autores resentíos pela so condición d´emigraos españoles criaos en naciones “perifériques” (los nomaos maketos y charnegos). N´esti caberu casu, pamidea, los escritores criaos en Cataluya son mayoría. Partiendo de la so esperiencia de monollingües en castellanu fain crítica de les polítiques d´inmersión llingüistico y d´ehí a tolo que signifique nacionalismu non español. Pa min, ye mui difícile nun pensar que n´estos autores d´orix castellanofalante monollingüe (d´orix andaluz, extremeñu, manchegu, etc.) hai dosis bultables de RESENTIMIENTU. Resentimientu por tener formao parte del proletariaú catalán o vascu, por nun ser élite, por “sintise españoles namás, que ye lo que sienten los que nun puen ser otra cosa”, etc. El resentimientu ye mui triste, qué queréis que vos diga. Siguiendo a Nietzsche, cuido que nun pue trayer nada bono al alma que lo sufre. Habrá erros nes polítiques llingüístiques y culturales de los nacionalistes periféricos, nun digo que non. Pero´l deber del emigráu ye siempre conocer la cultura y la llingua del país onde quier vivir establemente no sucesivo. Si yo fuere emigráu en Catalunya o Euskadi, querría saber, arriendes del español y l´asturianu, les llingües d´eses comunidaes y ampliar los mios rexistros. Siempre arriquez. Toos esos que dicen que “se persigue al castellanu” n´eses comunidaes, pamidea, son unos “ultres” les más de les vegaes, y tampocu ye qu´aporten muncho a la bona convivencia. En cambeu, yo, que tamién soi emigrante dende va llargos años, y vivo na España más profunda llonxe d´Asturies, toi fartu de la iñorancia castellanocéntrica de los que dicen que los “vascos y catalanes son toos unos Fiyos de P...” (sic). ¡Toma nacionalismu intolerante! Nesti casu, españolismu.  Por ciertu, que cuando dalgunos escritores provincianos d´Asturies quieren comparar la situación de los equí nomaos “koreanos” cola d´otros emigraos n´otros países del estáu na dómina franquista, nun fai otro que mexar fuera de tiestu. Tres una rocea inicial de los asturianos, esplicable en cualisquier pueblu que se ve “invadíu” de sópitu por xente estraño, el nivel d´integración de los emigrantes sureños foi equí exemplar pa España y pal mundu enteru, diría yo. Y tamién, atrévome a dicir (anque nun teo estudios sociolóxicos a la man), que munchos “koreanos” deprendieron más el bable y otros vezos astures, faciéndose astures dafechu, que ciertos burgueses y oligarques de la “intelligentsia” uvieína que lleven viviendo nel pais dende la xeneración de Don Pelayo. Con too lo que llevo dicho, cuido que´l valir científicu de munches obres “anti-nacionalistes” ye mui superficial, y mui reactivu. Anti-nacionlismu periféricu, patriotismu constitucional y cosmoplitismu, avecen ser namás que sucedáneos d´Españolismu. Y toa esa vagamar, tien –n´España, n´Asturies- un efeutu perversu. Sirve de pegoyu intelectual PREVENTIVU contra´l nacionalismu astur. ¿Nunca pensásteis por qué diantres habrá tanta xente repitiendo esi mantra n´Asturies, como diciendo QUE NUN MEDRE, QUE NUN MEDRE? Por llercia pura y dura. La cúpula oligárquica que sofita´l PSOE Asturianu y al PP, ximilegu suyu n´esto del españolismu, sabe de sobra que la mayoría de nós tenemos un sentir: PRIMERO ASTURIANOS QU´ESPAÑOLES. Otra cosa ye que dambos sentires seyan escluyentes o non. En munchos ciudadanos del nuesu país, nun son escluyentes. Les coses como son. Pero la Oligarquía sabe nel fondu eso: que primero, ASTURIANOS.