carlosXblanco

Una nación antigua pero viva, un Ethnos, un Volk, ye como un árbol. Funde los raigones no más perfondo de la Tierra. Ye tierra y aliméntase d´ella. Ye tierra y ye pueblu. Les naciones vieyes como la nuestra son, de mano, Tierra. Pueden perder estayes d´ella, pero alica siempre un dieldu nel nucleu de la tierra y n´ella cobren más y más tiez.

Una nación antigua y sólida, como la nuestra, nun quier saber –nun tien que saber- un res de “cosmopolitismu”. Eso del cosmpolitismu pue valir pa les estructures imperiales (Roma, por exemplu, como Imperiu o como Ilesia, que tantu da). La “catolicidá” (universalidá) d´eses estructures foi, en realidá, una inmensa Voluntá de Poder dende la qu´unes élites oligárquiques foron quien a remanar milenta pueblos y milenta mases desenraigonaes. Un Imperiu cosmopolita nun ye nación: ye la muerte mesma de la nación. Los césares, los papes y los “pueblos ensin tierra” (los xudíos de la diáspora) siempre amaron el mitu de la “multiculturalidá”. Mitu muncho espansivu nes dómines de confusión, caos, decadencia y parasitismu envilecíu de les mases.

Querer facer de la Unión Europea, nun nivel, o del Estáu Español, n´otru, esa “comunidá” de pueblos n´amestanza, a los qu´hai que sumar una creciente presencia d´estraeuropeos emigraos, ye resucitar los sueños “católicos”, universalistes, los d´una muerte anunciada de la nación. Confundiendo y desplazando pueblos, unos pocos salen con ganancia de pescadores.

 L´Imperiu ye la muerte de la nación pequeña y persiguida, porque la nación fuerte y puxante suel parapetase detrás d´un proyectu imperial pa desendolcar so envís dominador. Castiella camudada n´España, Gran Xermania camudada en Unión Europea, y asina suma y sigue.

Pero non, la nación ye nación: ye troncu tiesu que funde raigones na Tierra. Nación ye falar una llingua que marca meyor la frontera que los ríos, les muries y les cordaleres. Ye facer habitable una estaya del mundu que puedan trabayala con ciñu y honestidá los sos propios fíos. Ye mantener a raya a los parásitos y facer fecundes les socesives xeneraciones, llenando de nueu los valles y les costes con nuevos frutos humanos dispuestos a humanizar brañes, montes, vegues, rases, y requexos mil qu´hai nun País.

Asturies sedrá nación mentes nun escaeza los raigones, la Tierra (única, don que separa al asturianu del “cosmopolita” ensin raigón). Va siguir siendo nación mentes sepa tovía la so llingua, una de les antenes coles que la cultura étnica garra´l mundu y ye quien a diferenciase d´él. Si perdemos la llingua, la tierra yá va ser de toos. Perdemos entós la dignidá. Convertirémonos, poro, en masa esclavizable, amorfa y de llibre disposición pa nuevos Imperios, o pa nuevos caciplamientos a cargu de los siempre resentíos cosmopolites, qu´odien lo qu´ellos nun tienen.

Que n´Asturies tamos perdiendo la nación...¿Quién va poner esto en dulda? Por razones económiques, por caltener un altor de vida que yá nun correspuende a les nuestres realidaes d´anguaño, porque yá nun vienen nuevos rapacinos al País. Tamos dientro de lleno na “modernidá” nel peor sen de la pallabra: avieyamientu descomanáu de la Población, perda de la identidá ancestral, arrequexamientu de lo propio en pro de lo ayeno, egoísmu consumista y en gran midida parasitariu.

Esti pequenu y gran País ta enllén de caminos qu´aporten hasta cada ti, asturianu (y has permitíme la paráfrasis). Enantes había milenta caleyes: agora yá tan tomaos polos artos a favor de les autovíes. Un mar d´asfaltu ye´l Cantábricu, antes azul. Un mar d´asfaltu ye l´Asturies enantes verde. La estroza por cuenta d´una industria que nun pidimos, que nun yera nuestra nin pa nós, esi esbarrumbe yá fizo abondo pa robanos l´alma. L´abandonu de la Casería y de la nuestra ancestral autarquía foi cosa que vieno de fuera, impuesta por una capitalismu siempre xabaz, siempre aculturizador.

Esos milenta caminos, esa “Asturies de caleya”, como dicen esprecetando nuesos enemigos, ye la qu´hai que recuperar. Que me dean caleya. Nes vieyes caleyes ente mugor, ente barru y humedanza llatía más qu´una Cultura, llatía una Civilización toa.

Una Civilización nacía del trabayu, de l´andecha de toos y toes, d´amar lo propio y lo ayeno que tamién se vivía, en della midida, como propio. Una llingua con milenta acentos pero que yera de toos, una villa que nun remanaba l´aldea y yera´l foru y el mercáu de toos. Unes montañes altes como muries olímpiques qu´abeyaben del invasor. ¿L´Arcadia feliz? Non, la patria: patria quier dicir trabayu, honestidá, llabor bien fecho, curiar de los neños, amar a los tuyos, güeyar con ciñu al animal y a la tierra que te da de comer.

Caleyes tapecíes por cultures ayenes, por desarrollismu allocáu, por banderes que nun son nuestres: Progresu, España, Europa, Crecimientu y bla, y bla, y bla.

Namás hai espaciu pa una fe na tierra que se trabaya, onde tovía medra la herba, onde pace´l ganáu y onde hai gadañes quitando maldá y peste cultural. Namás hai fe nun pueblu que, en siendo derrotáu pola puñeflera “Historia Universal” quier ser y siguir siendo. Un pueblu, una tierra: la Civilización Asturiana.

Editorial «Pola Xuntanza»

Col envís de poder coordinar meyor les informaciones, comunicaos, etc. , ente los simpatizantes y participantes na web Pola Xuntanza del Nacionalismu Asturianu d´Izquierdes, queremos facer un llamáu pa que nos unviéis un corréu electrónicu y el vuesu nome y apellíos y asina poder incluyir esos datos nuna llista de distribución de corréu. D´esta miente vamos poder contautar de forma rápida, discreta y direuta con vós. En dengún casu van salir espublizaos los vuestros nomes y direcciones.

Esta llista tamién pue sirvir pa coordinar una posible convocatoria de Plataforma pola Xuntanza, tal y como se fala nos foros de nuestra web. Tala Plataforma ha ser independiente de la web, que ye meru espaciu de crítica y reflexón y asina va siguir siéndolo.

Brindámonos equí solo pa coordinar esi posible Conceyu fundador del que, en casu d´alcuerdu, podría surdir un colectivu que nague pola xuntanza del nacionalismu asturianu ensin pretensión denguna de suplantar a los partíos, fuerces polítiques y coaliciones esistentes o futures, antes al contrario, nacer cola meta d´espardir les xuntances, restañar feríes y amestar fuerces.

En tal casu, una vez algamada tala plataforma, la web aplaudirá y ayudará al entamu de tala iniciativa pero la web Pola Xuntanza namás collaborará dando voz a cuantos comunicaos se mos unvíen dende dicha plataforma, funcionando independientemente. La web Pola Xuntanza siguirá funcionando cola llínea qu´amosáramos hasta agora, como meru espaciu d´alderique llibre y constructivu.

Yá conocéis el nuestru buzón:

polaxuntanza@gmail.com

Van ser eliminaos los correos con un nomatu o una identidá supuestamente falsa.  Munches gracies por collaborar. Asturies merezlo.