carlosXblanco

Conseyos d´emancipación nacional

En viendo los comentarios d´estes selmanes de magar salió la web Pola Xuntanza, pienso qu´hai un gran desánimu sobre les posibilidaes del nacionalismu asturianu. El desánimu afítase nos roinos resultaos electorales qu´añu sí y añu tamién vien collechando esta opción, una opción que vien representada por delles sigles. La simplaya suma de los votos a estes sigles nun reflexa, a mio entender, el resultáu sinérxicu d´una xuntanza real. Los comentaristes que mos indiquen consideraciones de mera aritmética electoral pequen, creo, de nun saber lo que son los efeutos “bola de ñeve” y de la “Gestalt”.

La bola de ñeve –si s´algama- ye roina al entamu, pero medra al rolar y va sumando xente. L´efeutu “Gestalt” diznos que´l Tou ye más que la suma de les partes. Un espaciu diversu (non un baturiciu o una mecigaya) pero de reclamación nacional xunitaria, diba llegar más a la sociedá que trés o cuatro minúsculos requexos.

D´otra banda, yo nunca fui “electoralista”. Yo nesto, confiésolo, teo una educación marxista: llegar a les instituciones parllamentaries y municipales ye un mediu y non un fin. Ye una manera de llegar a la sociedá y de facer axitación y propaganda. Y ye claro que los nacionalistes asturianos tenemos que dar solmenones a los sectores apigazaos de la sociedá. Tamién, sabiendo un pocu d´hestoria de los movimientos sociales, teníemos que saber de sobra que los CONSEYOS son una alternativa (non escluyente) a los partíos. Yá sé que la pallabra rusa soviet ta mui engochada pol estalinismu, pero toles verdaderes revoluciones del mundu entamaron arrincando de conseyos vecinales, fabriles, municipales, etc. Son conseyos onde la xente se conoz cara a cara y, pencima de militancies y partidismos, trabayen a comuña. Si estos conseyos que, recoyendo delles quexes con bon xacíu que s´asoleyaron nel foru de Polaxuntanza, fueren “Asturianos” pencima de cualesquier “-ismu”, y con un pequeñu garrapiellu d´idees-fuerza (asturianizar llingüísticamente la nación, torgar iniciatives españolistes, etc.), pali que pali diben llegar a toes partes: conceyos, barrios, universidá, institutos, entidaes culturales, movimientos vecinales, etc. Entamar dende la base con un trabayu “conseyista”. Les consideraciones electorales diben ser el teyáu, pero los pegoyos y muruecos taríen puestos.

27/06/2009 11:57 Autor: carlosxblanco. Enlace permanente. Tema: POLITICA ASTURIANA. Hay 2 comentarios.

Nacionalistes porque somos d´esquierdes.

Carlos X. Blanco.

Un amigu pasóme candialmente, va pocu, un enllaz d´una charra que´l líder históricu del BNG, X. M. Beiras, dio una vez, pémeque en Canaries. Ún de los asistentes entrugó-y, na riola de preguntes, que cómo yera aquello de compatibilizar nacionalismu y esquierda, que paecía que nun concasaben. La pregunta ye de lo más típico. Muncha xente fíxomela a min tamién. Beiras retrucó dalgo asina como “precisamente porque soi d´esquierdes soi nacionalista”. Si él vio que so país, Galiza, ta colonizáu y amenorgáu, ser d´esquierda y ser gallegu ye ser a fortiori nacionaliegu (y amás marxista) gallegu. Nin más nin menos. Pela cueta, lo que Beiras respondi (y que yo soscribo aplicándolo a Asturies) mui malamente s´entiende nel nuestru País. Yo diría a los asturianos lo mesmo: precisamente porque soi d´esquierda y asturianu soi nacionalista. Y puntu. La revolución mundial, y l'internacionalismu proletariu empiecen en casa. Nun sé quién pue aidar a que frañe l´eslabón más débil del Capitalismu mundial sinón ye quien a implicase coles llaceries del so propiu barriu, conceyu y país. Nun sé.

Yo nun creo que´l nacionalismu d´esquierda tenga que tener dos almes. Yo nun creo qu´esista disonancia o contradicción ente defender un pueblu primíu, una cultura persiguida, una llingua (deliberadamente) tapecía y escaecía, d´un banda, y d´otra, lluchar contra'l terrorismu patronal (los ERE´s), arecista (les “lleendes urbanes”) o ecoloxista (alta tensión, regasificadora, Caliao, AVE…). Ye la mesma llucha: defender a un pueblu. Y “pueblu” ye´l que trabaya. Ye la llucha d´un Pueblu por alitar, por ser autosuficiente, por vivir y trabayar dignamente. Lo demás son estremancies escolástiques, bizantines y estratosfériques.

Equí hai un Pueblu qu´en 2000 años nun muerre nin escaez del too lo que ye. Equí hai un mileniu de fidelidá a la llingua que, con tol aparatu institucional en contra, nunca ye a morrer del too. Equí hai una identidá que, davezu, namás que paez un calicor pero que tol Mmar Mediterrániu nun ye a apagar. Ye una lluz que nun escosa, cosa que paez milagru, pero qu´inda caltién un nidiu llastir.

Falta unión. Falta nun ser individualista nin sectariu. Sobra tou esi discursu qu´esparden perende: el discursu del “asturianismu”. Sobra porque nun se sabe lo que ye nin lo que quier, sacantes una hipotética Oficialidá que dalgunos quixeren magar que fore de segunda división. Confunde, divide, encabrona, eso de falar del “asturianismu”. Lo mesmo he dicir colos glayíos estemporánios sobre “independencia”. Cien persones glayando un imposible val pa que cienmil síamos tomaos por llocos, anque nun glayemos eso. Sirve pal descreitu total. Si yo salgo al balcón a pidir un pianu de cola, nun me lo van dar, y arriendes consigo que me tomen por tochu. Bastante radical-yos suena a dellos dicir a les clares qu´Asturies ye Nación, qu´Asturies nun ye España. Pero les verdaes hai que les decir, pa que les conoza´l Pueblu. Nun se puede ser independentista ensin ser enantes nacionalista. Pero, de xuro, lo más importante agora ye saber qu´esa nación tien el reló corriendo. Sinón demuestra suxetivamente que lo ye y que quier siguir siendo, oxetivamente va dilise como un chochu de zucre nel café. El café negro d´una España Negra.

19/06/2009 17:38 Autor: carlosxblanco. Enlace permanente. Tema: POLITICA ASTURIANA. Hay 6 comentarios.

"El nacionalismu español ye´l más escluyente"

Pueblu Astur

Entrevista a Juan Carlos Moreno Cabrera: "El nacionalismu español ye´l más escluyente"

Núria Navarro

Asturbulla 11 Junio 2009

Torna al asturianu: Carlos X. Blanco.

“España ye un Estáu multinacional y ye evidente qu´hai un drechu d'autodetermín que ye absolutamente necesariu respetar”

L´autor de El nacionalismo lingüístico opón argumentos a los de los firmantes del Manifiestu pola llingua común.

--¿Los roblantes del Manifiesto pola llingua común equivóquense?
--Non. Son coherentes con una ideoloxía nacionalista: el nacionalismu llingüísticu español. Pero nun dicen un res de nuevo...

--¿Qué quier dicir?
--El manifiestu tien unos pegoyos asemeyaos a los espuestos pola Real Academia Española nun escritu qu´elevó al presidente de les Cortes en 1978. Pidía que, nel artículu segundu de la Constitución, el que fala de les llingües españoles, constase que´l castellán ye la llingua española por antonomasia.

--La pérdiga nun fue aceptada.
--¡Pero actúase como si lo fuere! Les demás llingües españoles tán nun segundu planu. Considérense menos útiles, rexonales, minoritaries. Agora eso repítese nel manifiestu, qu'empieza diciendo qu´esisten llingües españoles, pero qu´hai una que ta pencima, que ye la llingua de la comunicación, la democracia, la ciencia. Na nueva versión inda se-y da un envís economicista, vencéyase a una "inversión en capital cultural".

--El castellanu gana en falantes.
--Cuando una llingua s´esparde débese a custiones polítiques, non a razones llingüístiques. Nun ye más apta nin más rica nin meyor. ¿Y cómo s´amazcarita esto? Diciendo que la llingua española tien una riestra valores intrínsecos superiores a les demás. El manifiestu insiste neso.

--Detrás tán Vargas Llosa, Pombo, Savater... ¡Iker Casillas!
--Nun se dan cuenta de que lo suyo ye una ideoloxía xabazmente nacionalista. El gran problema d´esta ideoloxía nacionalista ye que nun ye talantada como nacionalista. Atalántase como ideoloxía cívica. Nun tien valores étnicos, nin identitarios y, poro, vencéyase´l nacionalismu español con "llibertá" y "democracia", cosa que arrampla automáticamente a les otres llingues d´esos valores. El caciplamientu ye terrible, pero lo peor ye que la xente nun ye consciente d´esi caciplamientu. El nacionalismu español ye´l más radical y escluyente.

--Ellos dicen que los drechos pertenecen a los ciudadanos, non a los territorios.
--Son los mesmos que ven natural que´l español sía oficial en tou´l territoriu. Na ideoloxía nacionaliega española'l castellanu ye´l español. Y a los que falamos español paeznos mui bien, pero´l sofitu que-y da´l Gobiernu nun tien como oxetivu sofitar a los españoles sinón facer de menos a les otres llingües.

--Usté, madrilanu ensin tacha, almite que tuviera prexuicios.
--Tener, túvelos, pero un mayor conocimientu de la realidá llingüística ayudóme a esanicialos. Duelme que mios collacios, que saben lo mesmo que yo, nun lluchen nesa direición. La ciencia nun ye una disciplina inmune a les rellaciones de poder.

--Dea un argumentu inapellable.
--La llingua correcta, la de la RAE, la del diccionariu y la gramática, nun ye una llingua real. La xente piensa que la llingua coloquial nun ye más qu'una realización imprecisa de esi modelu. Y nun ye asina. Ye´l modelu'l que se basa na llingua falada.

--Siga.
--Dizse que´l español tien 450 millones de falantes. ¿Dominen toos la llingua estándar culta? Non. Tien munchísimes variedaes.

--D´alcuerdu.
--Nun se pue dicir que´l catalán o'l vascu son un ensame de fales, porque´l español tamién lo ye. asocede que, de toes les variedaes, seleccionóse lo que se llama un dialectu, el castellanu, y venceyóse cola construcción d´un Estáu supranacional, central y fuerte. Poro, l´español ye una especie d´idea de calter político que s´afitó basándose nel dialectu castellán.

--¿Cuándo escomenzó too?
--Nel sieglu XIII, el castellanu apienzó a usase na corte d'Alfonso X para custiones alministratives. En xuniéndose, pali que pali, los reinos y Castiella alquirió poder, el dialectu castellanu, que nun tenía valir lliterariu, impúnxose como modelu, asociáu al poder central.

--Demasiáu tiempu trescurrió. ¿Ve dalguna igua?
--España ye un Estáu multinacional y ye evidente qu´hai un drechu d'autodetermín que ye absolutamente necesariu respetar. La situación ameyorará cuando los pueblos vasco, catalán y gallegu decidan cómo quieren ser. Lo que nun ye de recibu ye que´l Parlamentu catalán te secuestráu pol español. Cada vez que toma una decisión, el Parlamentu español invéntase artículos d'inconstitucionalidá.

--¿Dalgún antepasáu catalán?
--Non. Solo quiero defender mio llingua, que nun se venceye a imposición nin a imperialismu dalu.

--Señale un error de los catalanes al plantear so defensa de la llingua.
--Reprocho-yos que nun foren más intransixentes nel so usu. Teníen de falalo en Madrid. Nel Congresu. Nes entrevistes.